ព្រះសីហនុៈ ករណីគ្រោះថ្នាក់ចរាចរណ៍មួយបានបង្កឡើង ដោយជនជាតិចិនម្នាក់ បើករថយន្តមួយគ្រឿង ម៉ាក Lexus RX300 ក្នុងល្បឿនយ៉ាងលឿន រេចង្កូតបុករះរថយន្ត និងម៉ូតូ រុញទៅបុកផ្ទប់ជញ្ជាំងផ្សារទំនើបមួយកន្លែង បង្កការភ្ញាក់ផ្អើលដល់ប្រជាពលរដ្ឋនាំគ្នាជួយដេញចាប់ជនជាតិចិននោះ ប្រគល់អោយសមត្ថកិច្ច។
គ្រោះថ្នាក់ចរាចរណ៍នេះ បានកើតឡើងនៅវេលាម៉ោងជិត៦ល្ងាច ថ្ងៃទី៥ ខែតុលា ឆ្នាំ២០១៨នេះ នៅត្រង់ចំណុចមុខផ្សារទំនើប តូសឺគ័រស៊ូ ស្ថិតក្នុងក្រុងព្រះសីហនុ ខេត្តព្រះសីហនុ។
ប្រភពព័ត៌មានពីកន្លែងកើតហេតុបានប្រាប់អោយដឹងថា មុនពេលកើតហេតុ គេឃើញរថយន្តមួយគ្រឿង ម៉ាក LEXUS RX300 ពណ៌ខ្មៅ (មិនចាំស្លាកលេខ) បើកបរដោយបុរសជនជាតិចិនម្នាក់ ក្នុងល្បឿនយ៉ាងលឿន លុះដល់ចំណុចកើតហេតុខាងលើ ស្រាប់តែរេចង្កូតទៅបុករះរថយន្ត CAMARY ពណ៌ទឹកប្រាក់ ពាក់ស្លាកលេខភ្នំពេញ 2Y-3825 និងម៉ូតូ TODAY មួយគ្រឿងទៀត (មិនចាំស្លាកលេខ) ហើយរុញទៅបុកបង្គោលស្លាកប៉ាណូឈ្មោះផ្សារទំនើប តូសឺគ័រស៊ូ បោកផ្ទប់ជាប់និងថ្មរបងផ្សារទំនើបខាងលើ បណ្ដាលឲ្យរថយន្តខ្ទេចយ៉ាងដំណំទាំង២គ្រឿង តែពិតជាសំណាង ដែលមិនបណ្តាលអោយមានមនុស្សរងគ្រោះថ្នាក់នោះទេ។ ភ្លាមនោះបុរសជនជាតិចិន ដែលជាអ្នកបើករថយន្តបង្ក បានចុះពីលើរថយន្ត បម្រុងរត់គេចខ្លួន តែត្រូវបានបងប្អូនប្រជាពលរដ្ឋនាំគ្នា ស្រែកអោយជួយដេញចាប់បានមកវិញ ប្រគល់អោយសមត្ថកិច្ចឃាត់ខ្លួន យកទៅប៉ុស្តិ៍តែម្ដង។
បច្ចុប្បន្នអ្នកបើកបររថយន្តហេតុត្រូវបានសមត្ថកិច្ចឃាត់ខ្លួន ដើម្បីរង់ចាំធ្វើការដោះស្រាយ សំណងលើការខូចខាត ទៅកាន់ភាគីម្ចាស់រថយន្តរងគ្រោះនិងម៉ូតូនិងម្ចាស់ផ្សារទំនើប ដែលខូចខាតទាំងប៉ុន្មាននោះ៕