ព្រះសីហនុៈ ជនសង្ស័យចំនួន៥នាក់ ត្រូវបានកម្លាំងជំនាញផែនព្រហ្មទណ្ឌ សហការជាមួយកម្លាំងអធិការនគរបាលក្រុង ប៉ុស្តិ៍នគរបាលរដ្ឋបាល បានធ្វើការប្រដេញ និងស្ទាក់ចាប់បានជាបន្តបន្ទាប់ ពាក់ព័ន្ធករណីឆក់ទូរស័ព្ទជនបរទេស និងទទួលផលចោរកម្ម។
សមត្ថកិច្ចក្រុងព្រះសីហនុ បានឲ្យដឹងថា នៅថ្ងៃទី២៣ ខែវិច្ឆិកា ឆ្នាំ២០១៨ វេលាម៉ោង៧យប់ ស្ថិតនៅម្តុំឧតុនិយម ភូមិ៣ សង្កាត់៣ ក្រុងព្រះសីហនុ ខេត្តព្រះសីហនុ មានករណីឆក់ជនបរទេស បង្កឡើងដោយជនសង្ស័យ២នាក់ ជិះម៉ូតូសេ១២៥ ឆ្នាំ២០១៨។ ក្រោយទទួលបានព័ត៌មានភ្លាម កម្លាំងជំនាញសហការគ្នា ដេញចាប់បានជនសង្ស័យ២នាក់ នៅចំណុចខ្ទមយាយម៉ៅ ហើយធ្វើការសាកសួរជាបន្តបន្ទាប់ ឈានទៅដល់ការចាប់ខ្លួនជនសង្ស័យចំនួន៣នាក់ បន្ថែមទៀត។
ជនសង្ស័យ ១.ឈ្មោះ យិន ទីទី ភេទប្រុស អាយុ១៦ឆ្នាំ មុខរបរ ជាងភ្លើង មានទីលំនៅ ភូមិ២ សង្កាត់២ ក្រុង-ខេត្តព្រះសីហនុ (ជនដៃដល់ )។ ២.ឈ្មោះ សាន ប្រុស ភេទប្រុស អាយុ១៦ឆ្នាំ មុខរបរមិនពិតប្រាកដ មានទីលំនៅ ភូមិ២ សង្កាត់២ ក្រុង-ខេត្តព្រះសីហនុ (ជនដៃដល់ )។ ៣.ឈ្មោះ និត ម៉ាណាន់ ភេទប្រុស អាយុ១៦ឆ្នាំ មុខរបរសិស្ស មានទីលំនៅភូមិ៣ សង្កាត់៤ ក្រុង-ខេត្តព្រះសីហនុ(ជនដៃដល់ )។ ៤.ឈ្មោះ ឆៀង វឌ្ឍនៈ ភេទប្រុស អាយុ១៧ឆ្នាំ មុខរបរ មិនពិតប្រាកដ មានទីលំនៅភូមិ២ សង្កាត់៤ ក្រុង-ព្រះសីហនុ (ជនដៃដល់ )។ ៥.ឈ្មោះ ស ម៉េង អាយុ២៨ឆ្នាំ មុខរបរ រត់ម៉ូតូឌុប មានទីលំនៅភូមិ១ សង្កាត់៤ ក្រុង-ខេត្តព្រះសីហនុ (អ្នកទទួលផលចោរកម្ម)។ ជនរងគ្រោះជាជនជាតិចិន មិនស្គាល់អត្តសញ្ញាណ ក្រោយកើតពុំទាន់បានមកដាក់ពាក្យបណ្តឹងឡើយ។
វត្ថុតាងចាប់យកបានរួមមាន ៖ ម៉ូតូម៉ាកសេ១២៥ ឆ្នាំ២០១៨ ពណ៌ខ្មៅ១គ្រឿង(មធ្យោបាយធ្វើសកម្មភាព)។ ទូរស័ព្ទ២គ្រឿង (អាយហ្វូន១គ្រឿង និង ម៉ាកOPPO ១ គ្រឿង)។
បច្ចុប្បន្ន ជនសង្ស័យ និងវត្ថុតាងខាងលើ កំពុងបន្តនីតិវិធីនៅការិយាល័យនគរបាលព្រហ្មទណ្ឌស្រាល ដើម្បីកសាងសំណុំរឿងទៅសាលាដំបូងខេត្ត៕
