ភ្នំពេញៈ ខ្ទាតសាច់ពេញផ្លូវ បន្ទាប់ពីម៉ូតូសណ្ដោងរ៉ឺម៉កដឹកសាច់គោ យកទៅដាក់ឲ្យម៉ូយ ត្រូវបានរថយន្តមិនស្គាល់ម៉ាកមួយគ្រឿង បើកលឿនដូចហោះបុកពីក្រោយពេញទំហឹង បណ្ដាលឲ្យមនុស្ស៣នាក់ បានរងរបួសធ្ងន់ និងស្រាល រីឯរថយន្តរួចបើករត់បាត់ស្រមោល។
គ្រោះថ្នាក់ចរាចរណ៍នេះ បានបង្កការភ្ញាក់ផ្អើលយ៉ាងខ្លាំងដល់អ្នកដំណើរនៅតាមបណ្ដោយផ្លូវសហព័ន្ធរុស្ស៊ី ត្រង់ចំណុចខាងមុខទីស្ដីការគណៈរដ្ឋមន្ត្រី ស្ថិតក្នុងសង្កាត់ស្រះចក ខណ្ឌដូនពេញ កាលពីវេលាម៉ោង៤៖០៥នាទីទៀបភ្លឺឈានចូលថ្ងៃសុក្រ ទី២ ខែវិច្ឆិកា ឆ្នាំ២០១៩នេះ។
អ្នកបើកម៉ូតូសណ្ដោងរ៉ឺម៉កដឹកសាច់គោ ជារងគ្រោះ បានប្រាប់ភ្នាក់ងារ CAM POST ឲ្យដឹងថា មុនពេលកើតហេតុ រូបគាត់ជាអ្នកបើកម៉ូតូមួយគ្រឿងពាក់ស្លាកលេខកណ្ដាល 1E-2784 សណ្ដោងរ៉ឺម៉កដឹកសាច់គោពេញរ៉ឺម៉ក និងមានកម្មករ២នាក់ទៀតអង្គុយពីលើផងដែរ ដោយធ្វើដំណើរតាមបណ្ដោយផ្លូវសហព័ន្ធរុស្ស៊ី ទិសដៅពីកើតទៅលិច បំណងដឹកសាច់គោខាងលើទៅដាក់អោយម៉ូយ លុះមកដល់ចំណុចកើតហេតុខាងលើ ស្រាប់តែមានរថយន្តមួយគ្រឿង (មិនចាំម៉ាក) បើកស្របទិសគ្នាមកពីក្រោយ ក្នុងល្បឿនលឿនដូចហោះ បានមកបុកចំរ៉ឺម៉ករបស់គាត់ពេញទំហឹង បណ្ដាលឲ្យខ្ទាតប៉ើងសាច់គោពេញផ្លូវ និងកម្មករ២នាក់ទៀត ខ្ទាតធ្លាក់ពីលើរ៉ឺម៉ក បណ្ដាលរបួសធ្ងន់ហូរឈាមពេញខ្លួន ចំណែកឯរូបគាត់បានរងរបួសធ្ងន់គួរសមដែរ ។ ភ្លាមនោះរថយន្តបង្កមិនព្រមឈប់ចុះមកដោះស្រាយទេ បានបន្ថែមល្បឿនគេចបាត់ស្រមោលតែម្ដង បង្កឲ្យមានការភ្ញាក់ផ្អើលដល់ប្រជាពលរដ្ឋ ដែលជាអ្នកដំណើរមកឃើញ ទើបរាយការណ៍ប្រាប់សមត្ថកិច្ច ទាក់ទងហៅរថយន្តសង្គ្រោះ មកដឹកអ្នករបួសធ្ងន់ទៅមន្ទីរពេទ្យផងដែរ។
ក្រោយកើតហេតុសមត្ថកិច្ចមូលដ្ឋានបានចុះមកកន្លែងកើតហេតុ ចំណែកបុរសដែលជាអ្នកបើករ៉ឺម៉ករបួសធ្ងន់គួរសមនោះ អាចទាក់ទងហៅកម្មករដែលធ្វើការនៅកន្លែងជាមួយគ្នា អោយមកជួយដឹករ៉ឺម៉ក និងប្រមូលសាច់គោទាំងនោះ យកត្រឡប់ទៅកន្លែងវិញផងដែរ៕
