ភ្នំពេញៈ បុរសម្នាក់ បើករថយន្តសេរីទំនើបមួយគ្រឿង ដេញបុកទៅលើយុវជនម្នាក់ កំពុងជិះម៉ូតូមួយគ្រឿងពីក្រោយ បណ្ដាលឲ្យដួលបោកទៅនិងថ្នល់រងរបួស ហើយបម្រុងថយមកកិនបន្ថែមទៀត ខណៈនោះក៏មានបុរសម្នាក់ ស្លៀកពាក់ស៊ីវិល ឃើញហេតុការណ៍នេះ ដកកាំភ្លើងខ្លីបាញ់ឡើងលើ៦គ្រាប់ ដើម្បីគំរាមទៅលើរថយន្តបង្ក។
ហេតុការណ៍ផ្ទុះអាវុធនេះ បានកើតឡើងនៅវេលាម៉ោង២៖១០នាទីទាបភ្លឺ ឈានចូលថ្ងៃសៅរ៍ ទី១០ ខែវិឆ្ឆិកា ឆ្នាំ២០១៨ ត្រង់ចំណុចមុខផ្ទះលក់គ្រឿងបន្លាស់រថយន្តមួយកន្លែង "យីហោ សាម ឃុន" ស្ថិតតាមបណ្ដោយផ្លូវ៩៣ ខាងឆ្វេងរង្វង់មូលគួចកាណុង២០០ម៉ែត្រ (ជិតផ្សារតូច) ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងថា ម៉ូតូរងគ្រោះម៉ាក Honda Dream ពណ៌ខ្មៅ ពាក់ស្លាកលេខ ភ្នំពេញ 1FH-2579 បើកបរដោយបុរសម្នាក់ រងរបួសធ្ងន់។ រីឯរថយន្តបង្ក មិនចាំអត្តសញ្ញាណ បានរត់គេចបាត់។
តាមសាក្សីនៅកន្លែងកើតហេតុ បានឲ្យប្រាប់ភ្នាក់ងារ CAM POST ថា នៅមុនពេលកើតហេតុ គេឃើញរថយន្តបង្កមិនចាំម៉ាក បើកបរពីជើងទៅត្បូង លុះមកហួសកន្លែងលក់បង្អែម ក៏បានវ៉ាក់អឺជាមួយយុវជនរងគ្រោះកំពុងជិះម៉ូតូពីត្បូងទៅជើង ដោយមិនដឹងថាមានរឿងអ្វីឲ្យច្បាស់នោះទេ ជនរងគ្រោះក៏បន្តដំណើរហូតមកដល់ជិតដល់ចំណុចកើតហេតុ ក៏ងាកក្រោយឃើញរថយន្តទំនើបមិនចាំម៉ាកនោះ បើកត្រលប់មកវិញក្នុងល្បឿនលឿនពីក្រោយ ដេញតាមបុកម៉ូតូជនរងគ្រោះពីក្រោយ ទើបជនរងគ្រោះជិះឡើងលើចិញ្ចើមផ្លូវមុខផ្ទះលក់គ្រឿងបន្លាសរថយន្ត រួចផ្ដួលម៉ូតូចោលបម្រុងរត់តែបានរងរបួសជើង ទើបស្ទុះងើបមិនទាន់ រីឯរថយន្តក៏បើកហួសទៅផុតបានបន្តិច ក៏ជាន់ហ្វ្រាំងឈប់។
សាក្សីបន្តថា បន្ទាប់មករថយន្តបង្កបានបើកថយក្រោយមកវិញ បម្រុងកិនជនរងគ្រោះបន្តែមទៀត ស្រាប់តែមានជនស៊ីវិលម្នាក់ ដែលកំពុងអង្គុយញាំអីតាមចិញ្ចើមផ្លូវនៅជិតនោះដែរ បានឃើញហេតុការណ៍ប្រមាថទៅលើជីវិតបែបនេះ ទើបសម្រេចចិត្តដកកាំភ្លើងខ្លីរបស់ខ្លួន បាញ់គំរាមឡើងលើ៦គ្រាប់ផ្ទួនៗគ្នា គ្រាន់ជួយបញ្ឈប់សកម្មភាពដ៏អាក្រក់នេះ របស់ម្ចាស់រថយន្តបង្កនោះប៉ុណ្ណោះ ទើបរថយន្តបង្កនោះបន្ថែមល្បឿនបើករត់គេចខ្លួនពីកន្លែងកើតហេតុបាត់ស្រមោលតែម្ដង។
ទោះបីជាការបាញ់គំរាមដើម្បីជួយមនុស្សក៏ដោយ ជនស៊ីវិលដែលមានបំណងល្អនោះ ក៏បានឡើងរថយន្តបើកចេញពីកន្លែងកើតបាត់ភ្លាមៗផងដែរ។ បន្តិចក្រោយមកជនរងគ្រោះ ត្រូវបានរថយន្តគ្លីនិកឯកជន ហុង ហាក់ ចេញជួយដឹកយកទៅសង្គ្រោះនៅឯមន្ទីរពេទ្យរួចហើយ។
ក្រោយកើតហេតុសមត្ថកិច្ចមូលដ្ឋាន បានចុះមកដល់កន្លែងកើតហេតុ រួចដើររកសំបកគ្រាប់ បានចំនួន៥គ្រាប់ យកមករក្សាទុក ដើម្បីធ្វើកំណត់ហេតុរាយការណ៍ជូនថ្នាក់លើ និងបានយកម៉ូតូជនរងគ្រោះទៅរក្សាទុកបណ្ដោះអាសន្នសិន នៅប៉ុស្តិ៍នគរបាលស្រះចក ដើម្បីរងចាំសាច់ញាតិជនរងគ្រោះ យកឯកសារមកផ្ទៀងផ្ទាត់ ទើបប្រគល់ឲ្យជូនវិញ៕
