(ស្វាយរៀង)៖ នៅព្រឹកថ្ងៃទី១០ ខែវិច្ឆិកា ឆ្នាំ២០១៨នេះ ឯកឧត្ដម ម៉ែន វិបុល អភិបាល នៃខណះអភិបាលខេត្តស្វាយរៀង បានដឹកនាំមន្ត្រីរាជការ កងកម្លាំងប្រដាប់អាវុធ ទាំង៣ប្រភេទ ព្រះសង្ឃ សិស្សនិស្សិត លោកគ្រូ អ្នកគ្រូ ប្រជាពលរដ្ឋ ប្រារព្ធខួបលើកទី៦៥ ។
គួរបញ្ជាក់ថា ទិវាបុណ្យឯករាជ្យជាតិនេះ ត្រូវបានប្រារព្ធឡើង ដើម្បីរំលឹកដល់ស្នាព្រះហស្ថរបស់សម្តេចព្រះរតនកោដ នរោត្តម សីហនុ ដែលព្រះអង្គបានដឹកនាំធ្វើព្រះរាជបូជនីយកិច្ច ដ៏សកម្ម ដើម្បីដណ្តើមឯករាជ្យភាពពេញលេញពីប្រទេសបារាំង ។
បារាំងបានធ្វើជាអាណាព្យាបាលកម្ពុជា ចាប់តាំងពីឆ្នាំ១៨៦៣ ដល់ថ្ងៃទី៩ វិច្ឆិកា ឆ្នាំ១៩៥៣ ។
សូមរំលឹកថា៖ តាមប្រវត្តិសង្ខេបនៃព្រះរាជបូជនីយកិច្ចទាមទារឯករាជ្យនៅកម្ពុជាបានបញ្ជាក់ថា នៅក្នុងព្រះរាជបេសកកម្មដើម្បីជាតិមាតុភូមិ និងប្រជារាស្ត្រខ្មែរ សម្តេចឪ នរោត្តម សីហនុ ទ្រង់បានលះបង់ព្រះកាយពល និងព្រះបញ្ញាញាណ ដើម្បីទាមទារឯករាជ្យនៅកម្ពុជាឲ្យរួចចាកផុតពីអាណានិគមនិយមបារាំង ដែលមានខ្លឹមសារជាអាទិ៍ថាៈ តាមសន្ធិសញ្ញាចុះថ្ងៃទី៨ខែវិច្ឆិកាឆ្នាំ១៩៤៩ បារាំងបានទទួលស្គាល់តាមផ្លូវច្បាប់នូវឯករាជ្យ របស់ព្រះរាជាណាចក្រកម្ពុជា ។
ជាចុងបញ្ចប់នៃកម្មវិធី ឯកឧត្ដមតូច ប៉ូលីវ៉ា អភិបាលរងខេត្តស្វាយរៀង បានអានសុន្ទរកថា ដែលមានខ្លឹមសារថា ខួបអនុស្សាវរីយ៍លើកទី៦៥ នៃទិវាបុណ្យឯករាជ្យជាតិ៩ វិច្ឆិកា ទូទាំងប្រទេសកម្ពុជា តែងតែប្រារព្ធធ្វើជារៀងរាល់ឆ្នាំ ព្រោះជាទិវាប្រវត្តិសាស្ត្រដ៏រុងរឿង ដែលកម្លាំងមហាសាមគ្គីរបស់ប្រជាជាតិទាំងមូល ដណ្តើមបានទាំងស្រុង មកវិញពីអាណានិគមនិយមបារាំង នាឆ្នាំ១៩៥៣ នូវឯករាជ្យពិតប្រាកដ ក្រោមព្រះរាជបូជនីយកិច្ចដ៏ថ្លៃថ្លានៃ ព្រះបរមរតនកោដ្ឋ ព្រះករុណាព្រះបាទសម្តេច នរោត្តម សីហនុ ព្រះមហាវីរក្សត្រ ព្រះវររាជបិតាជាតិនៃយើង នៅចុងបញ្ចប់កម្មវិធីក៏មានការបង្ហោះប៉ោងប៉ោងផងដែរ ៕ ដោយ៖ភក្ដី