ភ្នំពេញៈ បុរសម្នាក់ ជិះម៉ូតូឌុបប្អូនបំណងជូនទៅបន្ទប់ជួលវិញ បានពាក់កណ្ដាលផ្លូវ ត្រូវក្រុមចោរជិះម៉ូតូ៤គ្រឿងគ្នាជិត១០នាក់ ដេញកាប់ ប្លន់យកម៉ូតូ ហុងដា ឌ្រីមស៊េរី២០១៨ បានសម្រេច រួចជិះគេចខ្លួនបាត់ស្រមោល កាលពីវេលា១០៖២០នាទីយប់ ថ្ងៃទី២៥ ខែវិច្ឆិកា ឆ្នាំ២០១៨ នៅតាមបណ្ដោយផ្លូវ ទំនប់កប់ស្រូវ ជិតប៉ុស្តិ៍២៤ម៉ោង ស្ថិតក្នុងភូមិ ស្រែដែកជះ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបានឲ្យដឹងថា ជនរងគ្រោះឈ្មោះ សយ វីន ភេទប្រុស អាយុ២៧ឆ្នាំ មុខរបរជាង បាញ់ថ្នាំ ស្នាក់នៅភូមិត្រពាំងពោធិ៍សង្កាត់គោករកា ខណ្ឌព្រែកព្នៅ មានស្រុកកំណើតនៅភូមិទួល ឃុំបាធាយ ស្រុកបាធាយ ខេត្តកំពង់ចាម។ ចំណែកម៉ូតូដែលជនសង្ស័យកាប់ប្លន់យកទៅ ម៉ាក ហុងដា ឌ្រីមសង់ ពណ៌ខ្មៅ ស៊េរី២០១៨ ពាក់ស្លាកលេខ បាត់ដំបង 1AC-1610។
បើតាមសម្ដីជនរងគ្រោះបានឲ្យដឹងថា មុនពេលកើតហេតុ រូបគាត់បានឌុបប្អូនប្រុសគាត់ពីបន្ទប់របស់គាត់ទៅបន្ទប់ជួលប្អូនវិញ ដោយជិះម៉ូតូតាមផ្លូវទំនប់កប់ស្រូវ ខណៈដល់ចំណុចកើតហេតុ ស្រាប់តែមានជនសង្ស័យមួយក្រុមគ្នាប្រមាណជិត១០នាក់ ជិះម៉ូតូចំនួន៤គ្រឿង ដែលឈប់ផ្តុំគ្នាកន្លែងម៉ាតជិតប៉ុស្តិ៍២៤ម៉ោងផ្លូវកបស្រូវ ជិះម៉ូតូដេញពីក្រោយពួកគាត់ហើយបានដកដាវព្រមទាំងខ្សែក្រវាត់មកវាយ ធ្វើឲ្យរូបគាត់និងប្អូនភ័យស្លន់ស្លោរ ផ្ដួលម៉ូតូលោតចូលទឹកបឹងឈូកយករួចខ្លួន ។ ភ្លាមៗក្រុមជនសង្ស័យឃើញឱកាសល្អបានលើកម៉ូតូជនរងគ្រោះនាំគ្នាជិះគេចខ្លួនបាត់ស្រមោល ដោយសុវត្ថភាព។
ក្រោយពេលកើតហេតុ ជនរងគ្រោះ២នាក់បងប្អូនបានឡើងពីទឹករត់ទៅប៉ុស្តិ៍២៤ម៉ោង បំណងទៅប្ដឹងតែអកុសល់មានតែប៉ុស្តិ៍២៤ម៉ោង តែគ្មានកម្លាំងសមត្ថកិច្ចប្រចាំការ។ បន្ទប់មកពួកគាត់បានជិះម៉ូតូឌុបមកប៉ុស្តិ៍នគរបាលចោមចៅទី៣ ដើម្បីដាក់ពាក្យបណ្ដឹងប៉ុន្តែដោយសារទឹកដីផ្សេងគ្នាទើបសមត្ថកិច្ចនគរបាលចោមចៅ៣ បានឲ្យជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលសំរោងក្រោមវិញ ដើម្បីឲ្យសមត្ថកិច្ចស្រាវជ្រាវរកមុខសញ្ញាក្រុមជនសង្ស័យចាប់មកផ្ដន្ទាទោសតាមច្បាប់៕
