លោក William A. Heidt ឯកអគ្គរដ្ឋទូតផុតអាណត្តិសហរដ្ឋអាមេរិកប្រចាំកម្ពុជា បានស្នើទៅកាន់រដ្ឋាភិបាលអាមេរិក ពិចារណាដកទណ្ឌកម្មទិដ្ឋាការមកលើមន្រ្តីក្រសួងការបរទេសកម្ពុជា ហើយថាទោះជាមិនទាន់មានចម្លើយបែបណា ឯកឧត្តមនឹងបន្តជំរុញសំណើនេះបន្ថែមទៀត។
ការថ្លែងបែបនេះធ្វើឡើង ក្នុងជំនួបសម្តែងការគួរសម និងជម្រាបលា សម្តេចក្រឡាហោម ស ខេង នាយករដ្ឋមន្ត្រីស្តីទី ពីសំណាក់ ឯកឧត្ដម William A. Heidt ឯកអគ្គរដ្ឋទូតសហរដ្ឋអាមេរិកចូល នារសៀលថ្ងៃពុធ ៧កើត ខែកត្ដិក ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី១៤ ខែវិច្ចិកា ឆ្នាំ២០១៨ នៅទីស្តីការក្រសួងមហាផ្ទៃ។
លោក Heidt បានបញ្ជាក់ថា លោកកំពុងរង់ចាំចម្លើយ ពីខាងអន្តោប្រវេសន៍អាមេរិកលើបញ្ហាទិដ្ឋាការមន្ត្រីកម្ពុជានេះ។
អ្នកនាំពាក្យក្រសួងមហាផ្ទៃ ឯកឧត្ត ផាត សុផានិត បានបញ្ជាក់ថាបំណងរបស់លោក Heidt ដែលចង់ឲ្យរដ្ឋាភិបាលអាមេរិក ដកទណ្ឌកម្មទិដ្ឋាការពីមន្ត្រីរដ្ឋាភិបាលកម្ពុជា គឺស្របតាមគោលគំនិតរបស់កម្ពុជាដែរ។
ជាការឆ្លើយតប សម្ដេចក្រឡាហោម ស ខេង បានមានប្រសាសន៍ថា ប្រសិនបើសហរដ្ឋអាមេរិកពិតជាដកទណ្ឌកម្មទិដ្ឋាការមែននោះ វាប្រៀបបាននឹងការផ្ដល់ត្រឡប់មកកម្ពុជាវិញនូវអ្វី ដែលកម្ពុជាបានផ្ដល់ជូនសហរដ្ឋអាមេរិក តាមរយៈការអនុវត្តកិច្ចព្រមព្រៀងនានាជាមួយគ្នា ពិសេសវាប្រៀបបាននឹងការដូរដ៏ល្អមួយ សម្រាប់កិច្ចសហប្រតិបត្តិការរវាងប្រទេសទាំងពីរ។
ជាមួយគ្នានេះដែរភាគីទាំងពីរ ក៏បានប្ដេជ្ញាបន្តកិច្ចសហប្រតិបត្តិការប្រឆាំងការជួញដូរមនុស្ស ឧក្រិដ្ឋកម្មឆ្លងដែន និងការពារសន្តិសុខដល់បុគ្គលិកស្ថានទូតអាមេរិក តាមរយៈកម្លាំងអនុវត្តច្បាប់នៃប្រទេសទាំងពីរ។ ក្រៅពីនេះកម្លាំងអនុវត្តច្បាប់កម្ពុជា-អាមេរិក គ្រោងចុះហត្ថលេខារួមគ្នា ក្នុងការបង្កើតក្រុមការងារមួយ សម្រាប់ការពង្រឹងទៅលើការអនុវត្តច្បាប់ឲ្យកាន់តែមានប្រសិទ្ធភាពថែមទៀត។
ជាចុងបញ្ចប់នៃជំនួបដ៏មានសារៈសំខាន់នេះ សម្ដេចក្រឡាហោមក៏បានអរគុណរដ្ឋមន្រ្តីការបរទេសអាមេរិកចំពោះសារលិខិតអបអរសាទរថ្ងៃឯករាជ្យជាតិកម្ពុជា ៩ វិច្ឆិកា ខណៈដែលឯកឧត្តមអគ្គរដ្ឋទូតអាមេរិបានអញ្ជើញដោយផ្ទាល់សម្ដេចក្រឡាហោម ស ខេង ទៅបំពេញទស្សនកិច្ចសហរដ្ឋអាមេរិកតាមពេលវេលាសមរម្យ ឬបើអាចគឺនៅឆ្នាំ២០១៩ខាងមុខនេះ។