ភ្នំពេញៈ អ្នកបើកម៉ូតូរងរបួសធ្ងន់ នឹងអ្នកជិះពីក្រោយរងរបួសស្រាល ខណៈកំពុងជិះម៉ូតូឌុបគ្នា ធ្វើដំណើរឆ្លងកាត់ផ្លូវបំបែកជាបួន ត្រូវរថយន្តកូរ៉េធុនតូច ដឹកធុងហ្គាសមួយគ្រឿង បើកបុកពេញទំហឹង កៀបជាប់ម៉ូតូក្រោមរថយន្ត ហើយព្យាយាមបើករត់ អូសទាំងម៉ូតូបែកផ្កាភ្លើងពេញផ្លូវ ចម្ងាយជិត១គីឡូម៉ែត្រ តែត្រូវប្រជាពលរដ្ឋនាំគ្នា ដេញតាមស្រែកសម្លុត រកវាយអ្នកបើកបរ ទើបព្រមឈប់ រួចចុះមក បម្រុងឡើងជិះម៉ូតូគេចខ្លួនទៀត ទើបត្រូវបានប្រជាពលរដ្ឋឃាត់មិនអោយទៅណាទេ រួចរាយការណ៍ប្រាប់សមត្ថកិច្ចចុះមកអន្តរាគមន៍តែម្ដង។
គ្រោះថ្នាក់ចរាចរណ៍ដ៏រន្ធត់នេះ បានកើតឡើងកាលពីវេលាម៉ោង១០៖២០នាទីយប់ ថ្ងៃទី៦ ខែវិច្ឆិកា ឆ្នាំ២០១៨ ត្រង់ចំណុចជិត(កៅដាយ) តាមបណ្តោយផ្លូវ៣៧៤ កែងផ្លូវ១៧៣ ក្នុងសង្កាត់ទួលស្វាយព្រៃ២ ខណ្ឌចំការមន រាជធានីភ្នំពេញ។
ប្រភពព័ត៌មានពីកន្លែងកើតហេតុ បានប្រាប់មកកាន់ភ្នាក់ងារ ខេមប៉ុស្តិ៍ ឲ្យដឹងថា មុនពេលកើតហេតុ គេឃើញបុរស២នាក់ ជិះម៉ូតូមួយគ្រឿង ម៉ាក MSX ពាក់ស្លាកលេខភ្នំពេញ 1FA-4096 ឌុបគ្នា ធ្វើដំណើរតាមបណ្ដោយផ្លូវ១៧៣ ក្នុងទិសដៅពីកើតទៅលិច លុះពេលមកដល់ណុចផ្លូវបំបែកជាបួនកើតហេតុខាងលើ ស្រាប់តែមានរថយន្តកូរ៉េធុនតូចមួយគ្រឿង ដឹកធុងហ្គាសធំៗ ពណ៌ស ពាក់ស្លាកលេខព្រះសីហនុ 2A-8375 ធ្វើដំណើរតាមផ្លូវ៣៧៤ ឆ្លងកាត់ផ្លូវ១៧៣ ទិសដៅពីត្បូងទៅជើង ទើបជ្រុលទៅបុកចំពាក់កណ្តាល ម៉ូតូជនរងគ្រោះពេញទំហឹងតែម្ដង បណ្តាលឲ្យប៉ើងអ្នកទាំងពីរបោកនឹងផ្ទប់នឹងកញ្ចក់រថយន្ដ រងបួសសន្លប់ស្តូកស្តឹង រីឯម្នាក់ទៀត រលាត់ដៃជើងចេញឈាម រងរបួសស្រាល។
ប្រភពបន្ថែមទៀតថា រថយន្តបង្កបានបន្ថែមល្បឿន បើកអូសទាំងគៀបជាប់ម៉ូតូក្រោមរថយន្ត ឡើងបែកផ្កាភ្លើងពេញផ្លូវ ប្រហែល១គីឡូម៉ែត្រឯណោះ តែត្រូវប្រជាពលរដ្ឋនាំគ្នា ដេញតាមរហូត ដោយសាររថយន្តបង្កជារថយន្តដឹកហ្គាស ហើយខណៈដែលកំពុងបែករត់អូសបែកផ្កាភ្លើង ឡើងដូចក្នុងកុនទៀតនោះ ប្រជាពលរដ្ឋដែលជិះដេញតាមបាន ស្រែកសម្លុតខ្លាំងៗ រកវាយអ្នកបើកបរ បើមិនព្រមឈប់ ទើបពេលចុះពីរថយន្តមក ប្រញាប់ប្រញាល់ឡើងជិះម៉ូតូគេចខ្លួនទៀត ទើបត្រូវបានប្រជាពលរដ្ឋនាំគ្នារារាំង មិនអោយអ្នកបើកបររត់ទៅណាទេ បន្ទាប់មកក៏រាយការណ៍ប្រាប់សមត្ថកិច្ចអោយចុះមកអន្តរាគមន៍តែម្ដង ។
អ្នកបើកបររថយន្តបង្កឈ្មោះ ប៊ុន ឈឿន ភេទប្រុស បានប្រាប់ថា មូលហេតុដែលរូបគាត់ ព្យាយាមបើកគេចចេញពីកន្លែងកើតហេតុនោះ គឺដោយសារតែគាត់ឃើញ ជនរងគ្រោះទាំង២នាក់នោះដេកស្ដូកស្ដឹងនៅលើផ្លូវ ហើយខ្លាចប្រជាពលរដ្ឋមកព្រួតវាយគាត់ ពេលជួបគ្រោះថ្នាក់បែបនេះ ទើបគាត់បង្ខំចិត្តបន្ថែមល្បឿន បើកចេញទៅមុខរហូត ក៏ត្រូវប្រជាពលរដ្ឋជិះដេញតាមឃាត់បានតែម្ដង។
បន្ទាប់ពីកើតហេតុភ្លាមៗ ជនរងគ្រោះ ត្រូវបានរថយន្ដសង្គ្រោះគ្លីនិកឯកជន ហុង ហាក់ ដឹកយកទៅសង្គ្រោះនៅឯមន្ទីរពេទ្យ ចំណែកឯម៉ូតូរងគ្រោះរួមទាំងរថយន្តបង្ក ត្រូវបានកម្លាំងសមត្ថកិច្ចមូលដ្ឋាន ប្រគល់ទៅអោយសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែង នឹងយកទៅរក្សាទុកបណ្តោះអាសន្ន ដើម្បីរង់ចាំដោះស្រាយគ្នានៅពេលក្រោយ៕