លោក កឹម សុខា ប្រធានអតីតគណបក្សសង្គ្រោះជាតិដែលកំពុងតែត្រូវបានឃុំខ្លួននៅក្នុងគេហដ្ឋានបានសរសេរសារអបអរសាទរខួបលើកទី៦៥ នៃទិវាឯករាជ្យជាតិ ៩ វិច្ឆិកា ១៩៥៣- ៩ វិច្ឆិកា ២០១៨។ លោក កឹម សុខា សូមចូលរួមអបអរសាទរយ៉ាងកក់ក្តៅបំផុតជាមួយបងប្អូនជនរួមជាតិខ្មែរទាំងអស់។
ក្នុងលិខិតដដែលនោះ លោក កឹម សុខា បានសម្តែងនូវអំណរគុណប្រកបដោយកតញ្ញុតាធម៌យ៉ាងជ្រាលជ្រៅបំផុតជូនចំពោះបុព្វបុរសខ្មែរដែលបានធ្វើពលិកម្ម ការលះបង់ និងការតស៊ូដើម្បីទាមទារនូវឯករាជ្យជាតិជូនជាតិមាតុភូមិ។ អតីតប្រធានបក្ស CNRP បានសង្កត់ធ្ងន់ថា ការទាមទារ និងការថែរក្សាការពារឯករាជ្យជាតិពិតប្រាកដទៅបាន គឺអាស្រ័យលើការរួបរួមជាតិ ជាការពិតណាស់មិនអាចមានឯករាជ្យជាតិពិតប្រាកដបានទេ បើយើងបែកបាក់គ្នា។
ចុងបញ្ចប់សារនេះលោក កឹម សុខា ក៏បានបួងសួងឱ្យស្មារតីឯករាជ្យជាតិពិតប្រាកដស្ថិតនៅជាប់ជានិច្ចក្នុងបេះដូងខ្មែរគ្រប់រូប។
សូមបញ្ជាក់ថ្ងៃទី៩ ខែវិច្ឆិកា ឆ្នាំ២០១៨នេះ គឺជាខួបគម្រប់ ៦៥ឆ្នាំ នៃទិវាបុណ្យឯករាជ្យជាតិរបស់ព្រះរាជាណាចក្រកម្ពុជា ហើយទិវាបុណ្យឯករាជ្យជាតិ ដែលធ្វើឲ្យប្រជាពលរដ្ឋខ្មែរ និងពិភពលោកទាំងមូល បាននឹកឃើញដល់ស្នាព្រះហត្ថ របស់អតីតព្រះមហាក្សត្រកម្ពុជា ព្រះករុណា ព្រះបាទ សម្តេចព្រះនរោត្តម សីហនុ ព្រះបរមរតនកោដ្ឋ ដែលទ្រង់បានខិតខំប្រឹងប្រែង ទាមទារឯករាជ្យ ពីអាណានិគមនិយមបារាំង ហើយនាំឯករាជ្យភាព សន្តិភាព សម្រាប់ប្រទេសកម្ពុជា។
បុណ្យឯករាជ្យជាតិ ៩ វិច្ឆិកា ត្រូវបានប្រទេសកម្ពុជាប្រារព្ធធ្វើឡើងជារៀងរាល់ឆ្នាំ ដើម្បីរម្លឹកទៅដល់ថ្ងៃ ដែលកម្ពុជា ទទួលបានឯករាជ្យភាពពេញបរិបូណ៌ពីអាណានិគមនិយមបារាំង កាលពីថ្ងៃទី៩ វិច្ឆិកា ឆ្នាំ១៩៥៣ ក្រោមព្រះរាជបូនីយកិច្ចរបស់សម្តេចព្រះនរោត្តម សីហនុ ព្រះបរមរតនកោដ្ឋ អតីតព្រះមហាក្សត្រនៃព្រះរាជាណាចក្រកម្ពុជា។