កំពង់ឆ្នាំងៈ ក្រុមក្មេងស្ទាវជាច្រើនក្រុម តែងតែធ្វើសកម្មភាពយកដុំថ្មគប់ទៅលើរថយន្តមិនថាតូច ឬធំ នៅពេលយប់ តែងតែបង្កឲ្យមានអ្នករងរបួស និងខូចខាតរថយន្តផងដែរ។
ករណីនេះមានសេចក្តីរាយការណ៍មកថា កើតឡើងញយដងហើយ ដែលក្មេងពាលគប់រថយន្តធ្វើដំណើរតាមផ្លូវ ជាក់ស្ដែង កាលពីយប់ថ្ងៃទី១២ ខែវិច្ឆិកា ឆ្នាំ២០១៨ មានករណីភ្ញាក់ផ្អើលមួយកើតឡើង បុរសម្នាក់បានបែកក្បាល បន្ទាប់ពីត្រូវបានក្រុមក្មេងពាលគប់បែកកញ្ចក់រថយន្ត នៅចំណុចសាលារៀនស្មែត ស្ថិតក្នុងស្រុករលាប្អៀរ ខេត្តកំពង់ឆ្នាំង ។
ដោយឡែកក្រុងកំពង់ឆ្នាំងវិញ ចាប់ពីចុងស្ពានខ្សាម សង្កាត់ខ្សាម រហូតដល់ ចុងទន្លេសាប ក្រុងកំពង់ឆ្នាំង ក៏ធ្លាប់មានករណីក្មេងពាលមួយក្រុម ជិះម៉ូតូចាំឆ្មក់ យកដុំថ្មគប់ទៅលើរថយន្តដែលធ្វើដំណើរតាមផ្លូវ ដូចគ្នាផងដែរ។
ជុំវិញបញ្ហាខាងលើនេះ ពលរដ្ឋសូមឲ្យសមត្ថកិច្ចនៅតាមបណ្តាចំណុះខាងលើនេះ គួរតែមានវិធានការបន្ទាន់ផង បើមិនអ៊ីចឹងទេ អាចកើតមានគ្រោះថ្នាក់ដល់អាយុជីវិតអ្នកដទៃ ដែលកំពុងធ្វើដំណើរតាមផ្លូវសាធារណជាក់ជាមិនខាត៕