បន្ទាយមានជ័យ: កម្លាំងនគរបាលស្រុកថ្មពួកបានបញ្ជូនជនសង្ស័យម្នាក់មកកាន់សាលាដំបូងខេត្តបន្ទាយមានជ័យដើម្បីចាត់ការតាមនីតិវិធីច្បាប់បន្ទាប់ពីចាប់ខ្លួនពាក់ពន្ធ័នឹងករណីចាប់រំលោភប្អូនស្រីថ្លៃរបស់ខ្លួនកាលពីព្រលប់ថ្ងៃទី១២ខែវិច្ឆិកាឆ្នាំ២០១៨កន្លងទៅ។
លោក សៅ សារឿន អធិការនៃអធិការដ្ឋាននគរបាលស្រុកថ្មពួកបានអោយដឹងថា ជនរងគ្រោះឈ្មោះ ហ ស ត អាយុ១៧ឆ្នាំ។
យោងតាមការរៀបរាប់របស់នារីរងគ្រោះបានអោយដឹងថា ជនសង្ស័យឈ្មោះ កែវ វណ្ណឌី អាយុ ២៦ឆ្នាំ រស់នៅក្នុងភូមិជាមួយគ្នាហើយក៏ត្រូវជាបងថ្លៃផងដែរ។ នៅយប់កើតហេតុថ្ងៃទី១២ខែវិច្ឆិកាឆ្នាំ២០១៨ម៉ោងប្រមាណ២០និង៣០នាទីជនសង្ស័យជាបងថ្លៃបានពឹងអោយខ្លួនជូនទៅផ្ទះវិញដោយបងថ្លៃជាអ្នកឌុប តែជិះមកដល់ផ្លូវចូលផ្ទះជនសង្ស័យជាបងថ្លៃអត់ឈប់ទេបែរជាជិះបង្ហួសទៅចូលផ្លូវលំដីក្រុមហ៊ុនជាតិអភវឌ្ឍន៍ចំងាយ ៥០០០ម៉ែត្រ ពីផ្លូវជាតិលេខ៥៨ជាកន្លែងស្ងាត់បន្ទាប់មកក៏ចាប់បង្ខំតែម្តង។
នារីរងគ្រោះ បន្តទៀតថា ខ្លួនត្រូវបានបងថ្លៃដាល់ចំក្បាលពោះពីរដៃបណ្តាលអោយសន្លប់ ហើយក៏ត្រូវបងថ្លៃរំលោភរហូតបានសម្រច។ ក្រោយពីដឹងខ្លួនក៏អង្វរអោយបងថ្លៃឌុបជូនខ្លួនមកផ្ទះវិញ។បន្ទាប់ពីជិះមកដល់ពាក់កណ្តាលផ្លូវក៏ជួបជាមួយអ្នករកសត្វខ្លួនក៏លោតចុះពីម៉ូតូស្រែកឡើងថាបងថ្លៃបានចាប់ខ្លួនរំលោភ លឺដូច្នេះបងថ្លៃក៏បន្ថែមល្បឿនគេចបាត់ស្រមោល។
លោក សៅ សារឿន បានបន្តថាក្រោយពីទទួលបានពាក្យបណ្តឹងនារីរងគ្រោះ លោកបានចាត់កម្លាំងស្រាវជ្រាវ រហូតដល់ថ្ងៃទី១៥ខែវិច្ឆិកាឆ្នាំ២០១៨វេលាម៉ោង១៥និង៣០នាទីទើបកម្លាំងយើងឃាត់ខ្លួនបាននិងបញ្ជូនទៅតុលាការដើម្បីចាត់ការតាមច្បាប់៕
