Monday, November 5, 2018

គួរឲ្យ​អាសូរ​! ​អ្នកបង់ត្រីម្នាក់ យកសំណាញ់មករុំខ្លួនហែលឆ្លងទឹកទន្លេ តែហែលមិនរួច ក៏លិចបាត់…

អាម៉ាប៉ាប៉ាញ៉ូស

ភ្នំពេញៈ បុរសដែលជាអ្នកបង់ត្រីម្នាក់ ក្នុងចំណោម៥នាក់ បានលិចបាត់ទៅក្នុងទឹកទន្លេ បង្កការភ្ញាក់ផ្អើលនៅវេលាម៉ោង៧៖៣០នាទីយប់ ថ្ងៃអាទិត្យ ទី៤ ខែវិច្ឆិកា ឆ្នាំ២០១៨ នៅត្រង់ចំណុចដៃទន្លេខាងជើងស្ពានហង្ស ចម្ងាយប្រហែល៥០ម៉ែត្រ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

បុរសដែលលិចបាត់មានឈ្មោះ ឡុង សំណាង អាយុ៣៧ឆ្នាំ ជនជាតិខ្មែរ មុខរបរ ធ្វើសំណង់ នៅកោះពេជ្រ ស្នាក់នៅការដ្ឋានសំណង់នៅជិតកោះពេជ្រ មានស្រុកកំណើតនៅភូមិបាត់ចិញ្ជៀន  ស្រុកភ្នំក្រវាញ ខេត្តពោធិ៍សាត់ មានប្រពន្ធ រួមទាំងកូនស្រីម្នាក់ អាយុជាង២ខួប។

តាមសម្តីអ្នកដែលហែលទឹកជាមួយ បានប្រាប់ឲ្យដឹងថា ពេលចប់ពីការងារសំណង់នៅជិតកោះពេជ្រ ពួកគាត់បានយកសំណាញ់ម្នាក់មួយទៅបង់ត្រី នៅទន្លេខាងកោះពេជ្រទន្លេធំ។ មួយសន្ទុះក្រោយមកពួកគាត់ ក៏បានមកបង់សំណាញ់នៅដៃទន្លេជិតស្ពានហង្ស។

ប្រភពបន្តថា ពេលបង់សំណាញ់រួចខ្ជិលដើរវៀងដើម្បីត្រឡប់ឡើងច្រាំងត្រើយម្ខាងមកផ្ទះ ពួកគាត់ក៏នាំគ្នាហែលទឹកឆ្លង ដោយជនរងគ្រោះបានរុំសំណាញ់លើខ្លួន ប្រឹងហែលឆ្លង ស្រាប់តែដល់ពាក់កណ្ដាលទឹកដៃទន្លេ ទំនងអស់ដៃអស់ជើង និងធ្ងន់សំណាញ់ផង ជនរងគ្រោះស្រែកឲ្យគេជួយ ប៉ុន្តែអ្នកដែលហែលមកជាមួយនោះងាកទៅមើល ក៏ឃើញលិចបាត់រហូត។

បន្ទាប់មកសន្តិសុខកោះពេជ្រ បានចេញទូកទៅជួយរាវបង់សំណាញ់រកដែរ តែរកមិនឃើញ រហូតដល់ជួលទូកខ្មែរឥស្លាមក្នុងតម្លៃ៤០០ដុល្លារ ដើម្បីរុករកតែរកអស់ជាច្រើនម៉ោង នៅតែមិនឃើញទៀត ដោយសារតែទឹកមានជម្រៅជ្រៅប្រហែលជាង៥ទៅ៦ម៉ែត្រ ទទឹងដៃទន្លេប្រវែងប្រហែល៣០ម៉ែត្រទៅ៤០ម៉ែត្រ ទឹកត្រជាក់ ហូរខ្លាំង នៅក្រោមបាតទឹក ខាងក្រោមមានចំរឹងដែក មានជើងសរសរច្រើន និងពេលយប់ផង ទើបលំបាកដល់អ្នករុករក ដោយរង់ចាំពេលព្រឹកគេនឹងបន្តរកទៀត។

ប្រពន្ធយំសោកសង្វេកអោបកូនតូចមួយអាយុជាង២ខួប ក្បែរច្រាំងទន្លេ ព្រមទាំងសាច់ញាតិបងប្អូនទាំងក្មួយ បានអុជធូបបន់ស្រន់ផង ជួលគេរកសពអស់លុយផង នៅតែរកមិនទាន់ឃើញ។

ក្រុមគ្រួសាររបស់គាត់ក្រីក្រ ហើយមកជួបរឿងអាក្រក់បែបនេះទៀត ទើបពលរដ្ឋអ្នកនៅកន្លែងហេតុការណ៍មានចិត្តអាណិត បានជួយជាថវិកាបន្តិចបន្តួច គ្រាន់ជួយសម្រាលទុក្ខលំបាកដ៏ធ្ងន់នេះ៕

@Amapapa.News

Feature Ads