ភ្នំពេញៈ ជនសង្ស័យម្នាក់ ធ្វើដំណើរដោយថ្មើរជើង មកឆក់កាបូបពីស្ត្រីជាអ្នកលក់ដូរម្នាក់ មិនបានសម្រេច ហើយព្យាយាមរត់គេចខ្លួន តែត្រូវកម្លាំងអាវុធហត្ថខណ្ឌសែនសុខ ល្បាតឃើញដេញចាប់ភ្លាមៗ នៅវេលាម៉ោង៧៖៣០នាទីយប់ ថ្ងៃទី២ ខែវិច្ឆិកា ឆ្នាំ២០១៨ នៅលើផ្លូវបេតុង ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យមានឈ្មោះ ឡោះ ស្មាន ភេទប្រុស អាយុ២៨ឆ្នាំ ជនជាតិចាម មុខរបរ មិនពិតប្រាកដ ស្នាក់នៅមិនពិតប្រាកដ មានស្រុកកំណើតនៅភូមិពាមជាឡាំង ឃុំពាមជាឡាំង ស្រុកស្ទឹងត្រង់ ខេត្តកំពង់ចាម។ ចំណែកជនរងគ្រោះ ឈ្មោះ លី សុភា ភេទស្រី អាយុ៤៣ឆ្នាំ មុខរបរ លក់ដូរ ស្នាក់នៅផ្ទះជួល ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ហើយកម្លាំងបានប្រគល់កាបូបលុយឲ្យជនរងគ្រោះវិញ។
តាមប្រភពពីសមត្ថកិច្ច បានឲ្យដឹងថា មុនពេលកើតហេតុ គេឃើញជនសង្ស័យម្នាក់ ដើរស្មើរជើងទៅវិញទៅមក នៅចំណុចកើតហេតុខាងលើ ហើយឃើញជនរងគ្រោះកំពុងអង្គុយលក់ដូរ ស្រាប់តែជនសង្ស័យ ធ្វើសកម្មភាពឆក់កាបូបបានសម្រេច ហើយក៏រត់គេចខ្លួន តែជនរងគ្រោះស្រែកថាចោរៗ ត្រូវបានកម្លាំងអាវុធហត្ថកំពុងក្នុងភូមិសាស្រ្តឃើញ បានដេញចាប់បានភ្លាមៗ។
បច្ចុប្បន្ន ជនសង្ស័យត្រូវបានឃុំខ្លួនបណ្ដោះអាសន្ន នៅកងរាជអាវុធហត្ថខណ្ឌសែនសុខ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមផ្លូវច្បាប់៕