ភ្នំពេញៈ គួរឲ្យសោកស្តាយណាស់ ចំពោះរឿងរ៉ាវដ៏យង់ឃ្នងរបស់ហ្វូងមនុស្សមួយក្រុម ដែលប្រជាពលរដ្ឋអះអាងថា សុទ្ធតែជាក្រុមទាហាន នៅកងពលតូចលេខ៧០ «ង៧០» ដោយបានព្រួតគ្នាធ្វើសកម្មភាពវាយដំច្រំធាក់ស្រេចតែអំពើចិត្ត ទៅលើអ្នកកាសែតមួយរូប បណ្តាលឲ្យហូរឈាមតាមមាត់ និងច្រមុះ ដួលដេកនៅលើដី រងរបួសជាទម្ងន់ និងឈឺចាប់បំផុត ។
គេបានរាយការណ៍ថា មានក្រុមនាយទាហាន នៅកងពលតូចលេខ៧០ «ង៧០» បាននាំគ្នាព្រួតវាយអ្នកសារព័ត័មានវ័យចំណាស់ម្នាក់ បណ្ដាលឲ្យដួលសន្លប់ស្តូកស្តឹង និងរងរបួសធ្ងន់ធ្ងរ រហូតហូរឈាមតាមច្រមុះ និងតាមមាត់ ស្ថិតនៅខាងមុខបន្ទាយកងពលតូចលេខ៧០ (ង៧០) តែម្តង កាលពីវេលាម៉ោង៧យប់ ថ្ងៃទី៣ ខែវិច្ឆិកា ឆ្នាំ២០១៨ ។
ប្រភពប្រាប់ឲ្យដឹងថា ដោយសារតែអ្នកសារព័ត៌មាន បានលួចថតនូវទង្វើអាក្រក់របស់នាយទាហានទាំងនោះ ទើបភ្លាមនោះ នាយទាហានខាងលើ បានមកប្រើអំពើហិង្សា មកលើអ្នកសារព័ត៌មាន (មិនស្គាល់ឈ្មោះស្ថាប័ន) តែម្តង។ ហើយក្រោយមក បានកញ្ឆក់យកទូរស័ព្ទផ្ទុកឯកសារភស្តុតាងរបស់អ្នកសារព័ត៌មាននោះ យកទៅលុបវីដេអូចោល ដែលជនរងគ្រោះបានថតពីសកម្មភាពអាក្រក់របស់ពួកគេ។ ប៉ុន្តែអ្នកសារព័ត៌មាន មិនឲ្យលុប ហើយស្រាប់តែពួកគេមួយក្រុមនេះ ស្ទុះមកវាយជនរងគ្រោះតែម្តង បណ្ដាលឲ្យដួលដាច់ផ្ងារ រងរបួសធ្ងន់ធ្ងរ ហូរឈាមតាមច្រមុះ និងមាត់កក្លាក្ស ។
ទាក់ទងព័ត៌មានខាងលើនេះ អង្គភាពសារព័ត៌មាន Cam Post នៅថ្ងៃទី៤ ខែវិច្ឆិកា ឆ្នាំ២០១៨ មិនទាន់អាចសុំការបំភ្លឺបានឡើយ ជាមួយលោកឧត្តមសេនីយ៍ឯក ម៉ៅ សុផាន់ ដែលជាមេបញ្ជាការកងពលតូច «ង៧០» ។
ទោះជាបែបណា មហាជនចង់បានការបំភ្លឺខ្លះៗ ពីលោកមេបញ្ជាការថា តើហ្វូងមនុស្សខាងលើនេះ ពិតជាទាហានរបស់អង្គភាព «ង៧០» មែន ឬក៏គ្រាន់តែជនមកបន្លំទេ ដែលធ្វើសកម្មភាពបង្កហិង្សាមកលើអ្នកសារព័ត៌មាន នាំឲ្យប៉ះពាល់ដល់កិត្តិយស សេចក្តីថ្លៃថ្នូររបស់អង្គភាពង៧០ យ៉ាងដូច្នេះទៅវិញ? ហើយតើអ្នកណាជាអ្នកទទួលខុសត្រូវលើករណីវាយដំមនុស្សឲ្យរបួសធ្ងន់ធ្ងរបែបនេះ?
គ្រប់គ្នាបានដឹងថា ប្រទេសជាតិសព្វថ្ងៃនេះ បាន និងកំពុងគ្រប់គ្រងដោយច្បាប់ ប្រជារាស្ត្រមាននូវសុខ សន្តិភាពពេញលេញ ក្រោមការដឹកនាំរបស់សម្តេច ហ៊ុន សែន ។ រឿងរ៉ាវខាងលើនេះ បើពួកជនបង្កពិតជាក្រុមទាហានចំនួនតិចតួចណាមួយនៅក្នុងអង្គភាពង៧០ ដូចដែលប្រជាពលរដ្ឋបានលើកឡើងខាងលើមែននោះ ស្នើសុំឲ្យលោកមេបញ្ជាការ មេត្តាចាត់វិធានការឲ្យខានតែបាន ទៅលើជនទំនើងទាំងនោះផង ដើម្បីបង្ការថ្ងៃក្រោយ កុំឲ្យចេះតែក្អេងក្អាង មិនស្គាល់ច្បាប់ទម្លាប់ ដើរវាយគេវាយឯង ស្រេចតែចិត្តនឹកឃើញបែបនេះទៀត ៕