ភ្នំពេញៈ ទោះបីជាមិនបានបញ្ជាក់កាលបរិច្ឆេទច្បាស់យ៉ាងណាក្តីអតីតមន្ត្រីជាន់ខ្ពស់គណបក្សសង្គ្រោះជាតិ នឹងជាមនុស្សស្និត ហើយគាំទ្រនយោបាយលោក សម រង្ស៊ី អតីតមេបក្សប្រ ឆាំង បានអះអាងថា មេបក្សប្រឆាំង និងមន្ត្រីជាច្រើនទៀត ដែលនៅបរទេស នឹងមកកម្ពុជាវិញ ក្នុងពេលឆាប់ៗខាងមុខនេះ។
លោក គង់ សាភា កូនប្រុសបង្កើតលោក គង់ គាំ ដែលបានលាលែងពីបក្សប្រឆាំង បានឲ្យដឹងនៅថ្ងៃទី១៤ វិច្ឆិកា យ៉ាងដូច្នេះថា "នៅពេលដ៏ខ្លីខាងមុខនេះ លោកប្រធាន សម រង្ស៊ី និងក្រុមអ្នកតំណាងរាស្ត្រគណបក្សសង្គ្រោះជាតិជាច្រើនរូប ដែលបាននិរទេសខ្លួនមកក្រៅប្រទេសនឹងធ្វើដំណើរចូលទៅកាន់ប្រទេសកម្ពុជាវិញ" ។
លោកបានដាក់សំណួរថា តើមានបងប្អូនសកម្មជន ប្រជាពលរដ្ឋ និងអ្នកស្នេហាជាតិណាខ្លះមកទទួលលោកប្រធាន សម រង្ស៊ី? តើបងប្អូនប្រជាពលរដ្ឋត្រៀមខ្លួនហើយឬនៅ?
ជាមួយគ្នានោះដែរ លោក គង់ សាភា ដែលគេដឹងថា មនុស្សជំនិតលោក សម រង្ស៊ី ដែលខុសពីបងប្អូនខ្លួនបានប្រឆាំងនយោបាយលោក សម រង្ស៊ី ក៏បានឱ្យអ្នកគាំទ្រជួយផ្សព្វផ្សាយដំណឹងពីគម្រោងវិញចូលស្រុករបស់លោក សម រង្ស៊ី ផងដែរ។
កាលទម្លាយព័ត៌មានពីគម្រោងចូលស្រុកវិញរបស់មេបក្សប្រឆាំងនេះ បន្ទាប់ពីមេបក្សនេះ បានធ្វើការភ្នាល់គ្នាជាមួយសម្តេចតេជោ ហ៊ុន សែន ពីការដោះលែងលោក កឹម សុខា នឹងធ្វើឡើងចាប់ពីចន្លោះថ្ងៃទី២៩ ធ្នូ ឆ្នាំ២០១៨ខាងនេះ ដល់ថ្ងៃទី៣ មីនា ឆ្នាំ២០១៩។ លក្ខខណ្ឌ ដែលមេដឹកនាំបក្សប្រឆាំង និងមេដឹកនាំបក្សកាន់អំណាច បានភ្នាល់គ្នានោះ គឺប្រសិនបើមានការដោះលែង លោក កឹម សុខា ពិតមែន សម្តេចតេជោ ហ៊ុន សែន នឹងចុះចេញពីតំណែង ចំណែក លោក សម រង្ស៊ី វិញថា បើមិនមានការដោះលែងលោក កឹម សុខា លោកនឹងមកកម្ពុជាវិញ ដើម្បីសមត្ថកិច្ចចាប់ដាក់ពន្ធនាគារ។
ទាក់ទិននឹងការភ្នាល់គ្នារវាងលោក សម រង្ស៊ី និងសម្តេចតេជោ ហ៊ុន សែន គេឃើញនៅលើបណ្តាញសង្គម មានការរិះគន់យ៉ាងខ្លាំងចំពោះទង្វើរបស់លោក សម រង្ស៊ី ពិសេសនោះ ក្រុមគាំទ្រលោក កឹម សុខា បានហៅទង្វើរបស់លោក សម រង្ស៊ី ជាអមនុស្សធម៌បំផុត ដែលយកលោក កឹម សុខា ជាកម្មវត្ថុភ្នាល់គ្នាបែបនេះ។
លើសពីនេះក្រុមគាំទ្រលោក កឹម សុខា និងលោក សម រង្ស៊ី បានវាយប្រហារគ្នាជាសំណេរ រៀងខ្លួនៗលើបណ្តាញសង្គម ដោយអ្នកគាំទ្រ សម រង្ស៊ី ថា លោក សម រង្ស៊ី ធ្វើត្រឹមត្រូវ ចំណែកអ្នកគាំទ្រ កឹម សុខា ថា ខុស។
មិនត្រឹមតែអ្នកគាំទ្រនោះទេ សូម្បីតែក្រុមមេធាវីការពារលោក កឹម សុខា ក៏បានលើកឡើងថា មិនគួរលោក សម រង្ស៊ី ធ្វើទង្វើបែបនេះ ក្នុងការយកសំណុំរឿងលោក កឹម សុខា ជាកម្មវត្ថុភ្នាល់ ជាមួយសម្តេចតេជោ ទាល់តែសោះ៕