Loading...

Wednesday, November 21, 2018

ឯកអគ្គរដ្ឋទូត Heidt ស្នើសុំសម្តេច ហ៊ុន សែន ឱ្យដោះលែងលោក កឹម សុខា និងអ្នកទោសនយោបាយដទៃទៀត

រិទ្ធី

នាព្រឹកថ្ងៃអង្គារ ១៣កើត ខែកត្ដិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២០ ខែវិច្ឆិកា ឆ្នាំ២០១៨ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យលោក William A. Heidt ឯកអគ្គរដ្ឋទូតអាមេរិកប្រចាំកម្ពុជាដែលចប់អាណត្តិបេសកកម្មការងារនៅកម្ពុជា ចូលជួបសំណេះសំណាល និងជម្រាបបលា ដែលបានធ្វើឡើងនៅវិមានសន្តិភាព រាជធានីភ្នំពេញ។

លោកឯកអគ្គរដ្ឋទូត Heidt បានកត់សម្គាល់ថា លោកមានការ​លើកទឹកចិត្តដោយសារជំហាន​វិជ្ជមានក្នុងពេលថ្មីៗ​នេះ ដែលរួម​មានការ​បន្តឡើងវិញ​នូវកិច្ច​សហប្រតិបត្តិការ​ទាក់ទង​នឹងឈ្លើយសឹក និងយុទ្ធជនបាត់​ខ្លួនអាមេរិក ហើយបានលើកទឹកចិត្ត​អោយរដ្ឋាភិបាលកម្ពុជាបន្តកែលំអ​ចំណងទាក់ទងទ្វេភាគី ដែលរួមមានការ​ជំរុញការផ្សះផ្សាជាតិ ការដោះលែងលោក កឹម សុខា និងអ្នកទោសនយោបាយ​ដទៃទៀត ហើយបន្ធូបន្ថយការ​រឹតត្បិតលើសង្គមស៊ីវិល និងប្រព័ន្ធផ្សព្វផ្សាយ។

សម្ដេចតេជោ ហ៊ុន សែន បានបញ្ជាក់នៅចំពោះមុខឯកអគ្គរដ្ឋទូតសហរដ្ឋអាមេរិកថា កម្ពុជាមិនអនុញ្ញាតឱ្យមានវត្តមានមូលដ្ឋានទ័ពបរទេសនៅកម្ពុជានោះទេមិនថាប្រទេសណានោះឡើយ។ សម្ដេចតេជោនាយករដ្ឋមន្ត្រី បានលើកឡើងបញ្ជាក់ចំណុចនេះទៅកាន់លោកអគ្គរដ្ឋទូត កុំឲ្យសហរដ្ឋអាមេរិកមានការងឿងឆ្ងល់និងព្រួយបារម្មណ៍ចំពោះមូលដ្ឋានទ័ពបរទេសនៅកម្ពុជា។ សម្តេចតេជោនាយករដ្ឋមន្ត្រីបានមានប្រសាសន៍ថា កន្លងមកកម្ពុជាក៏ធ្វើការជាមួយនឹងបណ្តាប្រទេស ផ្សេងៗរួមទាំងការធ្វើសមយុទ្ធយោធាជាមួយសហរដ្ឋអាមេរិក ចិន ឥណ្ឌា ជប៉ុន ជាដើម ពិសេសបានធ្វើឡើងលើសពីទ្វេភាគីទៅទៀត ក្នុងគោលដៅដើម្បីក៏សាងជំនឿ និងបទពិសោធន៍ ជាពិសេសឆ្លើយតបទៅនឹងគ្រោះមហន្តរាយផ្សេងៗ។

លោកឯកអគ្គរដ្ឋទូត Heidt បានអរគុណសម្តេច ហ៊ុន សែន ចំពោះការដឹកនាំ​របស់​លោកក្នុងការជំរុញបន្ថែម​​នូវទំនាក់ទំនងប្រកបដោយផ្លែផ្កា រវាងសហរដ្ឋអាមេរិក និងប្រទេសកម្ពុជា និងក្នុងការធ្វើឱ្យមានស្ថាន​ភាពសម្រាប់ការ​អភិវឌ្ឍន៍សេដ្ឋកិច្ចដ៏ឆាប់រហ័ស នៅកម្ពុជា។

នៅក្នុងជំនួបនេះផងដែរ សម្ដេចតេជោ ហ៊ុន សែន បានបញ្ជាក់ថាសម្ដេចស្វាគមន៍រាល់ការវិនិយោគ ពីបណ្ដាប្រទេសទាំងអស់មិនថាប្រទេសចិន, ជប៉ុន ឬ សហរដ្ឋអាមេរិកជាដើមអាចមកធ្វើការ វិនិយោគនៅកម្ពុជា។ទន្ទឹមនឹងនេះផងដែរសម្តេចតេជោក៏បានបញ្ជាក់ដែរថាសម្ដេចមិនអនុញ្ញាតឲ្យមានឥទ្ធិពលបរទេសនៅលើទឹកដីរបស់កម្ពុជាឡើយ។

@Amapapa.News

Feature Ads