ភ្នំពេញៈ បុរសចិត្តខ្លាំងម្នាក់ ដែលគេស្គាល់ច្បាស់ថា ជាមន្ត្រីនគរបាលនៅនាយកដ្ឋានធ្វើលិខិតឆ្លងដែន (ប៉ាស្ព័រ) គ្រាន់តែម្ដាយដែលជាអ្នកមានគុណខំចិញ្ចឹមបីបាច់ថែរក្សាតាំងពីក្នុងពោះរហូតកូនបានចូលរៀនសូត្រ មានចំណេះដឹងរហូតក្លាយជាមន្ត្រីរាជការ មានបុណ្យស័ក្ដិខ្ពង់់ខ្ពស់ នៅតែព្រួយបារម្ភពីសុខទុក្ខ និងសុវត្ថិភាពកូន ទើបតាមមកហៅកូនប្រុសកុំឲ្យផឹកស៊ីស្រវឹងខ្លាំងពេក ដឹងអីបែរជាទាញកាំភ្លើងពីក្នុងរថយន្តបាញ់រះអស់ជាង១០គ្រាប់ ហើយឡើងជិះម៉ូតូរ៉ឺកម៉កកង់បី គេចខ្លួនបាត់ស្រមោល។
ហេតុការណ៍បាញ់បោះសេរីនេះ កើតឡើងកាលវេលាម៉ោង១១យប់ ថ្ងៃទី១៦ ខែ វិច្ឆិកា ឆ្នាំ ២០១៨ នៅចំណុចភោជនីយដ្ឋាន និងខារ៉ាអូខេ ពិភពរាត្រី តាមផ្លូវ១៧៣ ក្រុម៤៧ ស្ថិតនៅភូមិ៧ សង្កាត់ទួលស្វាយព្រៃទី១ ខណ្ឌចំការមន រាជធានីភ្នំពេញ។
ជនបង្កបាញ់បោះសេរីឈ្មោះ ឌិន វណ្ណណូរ៉ា ភេទប្រុស អាយុ៣៨ឆ្នាំ ជាមន្ត្រីនគរបាល ឋានន្តរសក្ដិ វរសេនីយ៍ឯក (សក្តិ៥) មានតួនាទីជានាយការិយាល័យភស្តុភា នៃអគ្គនាយយកដ្ឋានអត្តសញ្ញាណកម្ម ដកកាំភ្លើងបាញ់ទៅលើរថយន្តម៉ាក Toyota Highlander ពណ៌ប្រផេះ ពាក់ស្លាកលេខ ភ្នំពេញ 2U-3913 ចំនួន១០គ្រាប់។
សមត្ថកិច្ច ឲ្យដឹងថា មានប្រជាពលរដ្ឋបានរាយការណ៍ថា មានករណីផ្ទុះអាវុធបាញ់បោះជាច្រើនគ្រាប់ ក្រោយមកក៏បានចុះទៅកន្លែងកើតហេតុ ហើយពេលទៅដល់ក៏ឃើញសភាពការបាញ់បោះមែន និងសាកសួរនាំសាក្សីបុគ្គលិក និងម្ចាស់ខារ៉ាអូខេនោះមិនឆ្លើយប្រាប់សមត្ថកិច្ច ហើយចង់លាក់បាំងថែមទៀត ព្រោះបុរសជានគរបាលនេះជាម៉ូយប្រចាំហាងពីភពរាត្រីតែម្ដង ក្រោយមកមានប្រជាពលរដ្ឋលួចខ្សឹប និងចង្អុលថា ម្ចាស់ឡានដកកាំភ្លើងបាញ់ឡានខ្លួនឯងជាច្រើនគ្រាប់ រួចក៏ដើរទៅមើលរថយន្តឃើញស្នាមគ្រាប់កាំភ្លើងបាញ់ធ្លុះប្រហោង១០គ្រាប់ ។
សមត្ថកិច្ចបន្តថា ក្រោយពីចុះត្រួតពិនិត្យកន្លែងកើតហេតុដោយបុរសជានគរបាលនាយការិយាល័យ បានរត់គេចខ្លួនបាត់ដោយសាកសួរនាំសាក្សី ដែលឃើញហេតុ គឺបុរសនគរបាលសង្ស័យខឹងម្ដាយមកតាមដល់កន្លែងផឹកស៊ី ខណៈកំពុងតែខឹងខ្លាំងពេក ក៏ដើរចេញពីហាង រួចបើកទ្វារចូលក្នុងរថយន្ត គាប់ជួនរថយន្តសង្ស័យដេរមិនឆេះទៀត ធ្វើឲ្យទើសទាល់អារម្មណ៍កាន់តែក្ដៅបន្ថែមទៀត ហើយក៏ស្ទុះចេញពីរថយន្តមកក្រៅវិញ ដកកាំភ្លើងបាញ់សំដៅទៅលើរថយន្តរបស់ខ្លួនជាច្រើនគ្រាប់តែម្ដង សំណាងល្អម្ដាយមិនអង្គុយក្នុងរថយន្តជាមួយ បើអង្គុយក្នុងរថយន្តច្បាស់ជាកូនប្រុសស្វាងស្រា និងស្ដាយក្រោយមួយជីវិតមិនខានឡើយ ។ បន្ទាប់មកសមត្ថកិច្ចបានចុះមកកន្លែងកើតហេតុ រួមទាំងលោកអធិការនគរបាលខណ្ឌចំការមន យិន សាន្ត ចុះមកជាមួយគ្នាដែរ ហើយបញ្ជាអោយហៅរថយន្តស្ទួចអូសយករថយន្ត ដែលរងការបាញ់ មករក្សាទុកនៅស្នាក់ការប៉ុស្តិ៍នគរបាលទួលស្វាយព្រៃទី១ ខណ្ឌចំការមន ជាបណ្ដោះអាសន្ន ដើម្បីរង់ចាំស្រាវជ្រាវ តាមចាប់ជនបង្កបាញ់បោះសេរី យកមកចាត់ការតាមច្បាប់ ដោយយើងជាអ្នកកាន់ច្បាប់បែរជាបំពានច្បាប់។
ប្រជាពលរដ្ឋតាមរយៈនគរបាលប៉ុស្តិ៍បានស្នើសុំលោក ព្រុំ សំខាន់ គណៈអភិបាលខណ្ឌចំការមន មានចំណាត់ការចំពោះហាងខាងលើនេះ ខណៈមានបញ្ហាមិនព្រមរាយការណ៍ រួចព្យាយាមលាក់សភាពការទៀត កន្លងមកហាងពិភពរាត្រីនេះ តែងតែឃើញរថយន្តដែលជារបស់ភ្ញៀវឈប់ចតនៅលើពេញដងផ្លូវសាធារណៈ ធ្វើអោយមានការកកស្ទះចរាចរណ៍រាល់យប់ ហើយគង់តែថ្ងៃណាមានគ្រោះចរាចរណ៍កើតឡើង តើអ្នកណាទទួលខុសត្រូវ? ៕