ភ្នំពេញៈ យុវជន២នាក់ បានសន្លប់ស្ដូកស្ទឹងកណ្ដាលផ្លូវ បន្ទាប់ពីស្រវឹងស្រាស្រឿងៗ ជិះម៉ូតូធំ XR ឌុបគ្នា ក្នុងល្បឿនយ៉ាងលឿន ខ្វះការប្រុងប្រយ័ត្ន ត្រង់ចំណុចស្តុបផ្លូវភ្លោះ ក៏ជ្រុលទៅបុកចំទ្វាររថយន្ត LEXUS-RX330 ដែលកំពុងបើកឆ្លងផ្លូវពេញទំហឹង បណ្តាលឲ្យអ្នកបើកម៉ូតូបោកផ្ទប់ជាមួយរថយន្ត រីឯអ្នកជិះពីក្រោយខ្ទាតផ្លោងទៅមុខ២ម៉ែត្រ។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង៣៖៣៥នាទីទាបភ្លឺ ឈានចូលថ្ងៃសៅរិ៍ ទី១០ ខែវិច្ឆិកា ឆ្នាំ២០១៨ នៅត្រង់ចំណុចភ្លើងស្តុបផ្លូវភ្លោះ មុខមន្ទីរពេទ្យព្រះអង្គឌួង ផ្លូវព្រះនរោត្តម កែងផ្លូវព្រះអង្គឌួង ស្ថិតក្នុងសង្កាត់ផ្សារចាស់ ខណ្ឌដូនពេញ រាជធានីភ្នំពេញ។
សមត្ថកិច្ចដែលជាអ្នកឃើញហេតុការណ៍ផ្ទាល់ បានរៀបរាប់ប្រាប់ភ្នាក់ងារ CAM POST ថា នៅមុនពេលកើតហេតុ គេឃើញបុរស៣នាក់ បើករថយន្ត LEXUS RX-330 មួយគ្រឿង ពណ៌ទឹកមាស ពាក់ស្លាកលេខ ភ្នំពេញ 2F-9736 ធ្វើដំណើរតាមផ្លូវសហព័ន្ធរុស្ស៊ី ពីលិចមកកើត ខណៈដែលមកដល់ចំណុចកើតហេតុ រថយន្តបានបើកឆ្លងស្តុបបានជិតផុតហើយ ស្រាប់តែមានបុរស២នាក់ ជិះម៉ូតូធំមួយគ្រឿង ម៉ាក XR ពណ៌ក្រហម ពាក់ស្លាកលេខ ភ្នំពេញ 1GS-1422 ធ្វើដំណើរតាមបណ្ដោយផ្លូវព្រះនរោត្តម ពីត្បូងមកជើង ក្នុងល្បឿនយ៉ាងលឿន ខ្វះការប្រុងប្រយ័ត្ន ត្រង់ចំណុចស្តុបផ្លូវភ្លោះ ទើបជ្រុលទៅបុកចំទ្វាររថយន្តខាងលើ ដែលកំពុងបើកឆ្លងផ្លូវពេញទំហឹង បណ្តាលឲ្យអ្នកបើកម៉ូតូបោកផ្ទប់ជាមួយរថយន្ត រីឯអ្នកជិះពីក្រោយខ្ទាតផ្លោងទៅមុខ២ម៉ែត្រ សន្លប់ស្ដូកស្ដឹងទាំង២នាក់ ទើបគាត់បោះដៃតាមវិទ្យុទាក់ទងហៅរថយន្តសង្គ្រោះចុះមកយកជនរងគ្រោះទាំង២ទៅមន្ទីរពេទ្យផង។
សមត្ថកិច្ចខាងលើបន្តថា មួយសន្ទុះក្រោយមកមានរថយន្តសង្គ្រោះគ្លីនិកឯកជនមកដល់កន្លែងកើតហេតុ ហើយជនរងគ្រោះទាំង២នាក់ ក៏បានដឹងខ្លួនឡើង ចំណែកអ្នកជិះពីក្រោយបានសួរសមត្ថកិច្ច និងអ្នកសារព័ត៌មានថា រូបគាត់កើតអីបានមកសម្ភាសន៍ សួរនាំច្រើនម៉្លេះ ទើបសមត្ថកិច្ចប្រាប់វិញថា ប្អូនជិះម៉ូតូឌុបគ្នាលឿនពេកទៅបុកជាមួយរថយន្តបណ្ដាលឲ្យសន្លប់ទាំង២នាក់ តែបុរសនោះមិនទាន់ជឿទេ ទើបអ្នកសារព័ត៌មានបានបង្ហាញវិដេអូដែលសន្លប់នោះឲ្យបុរសនោះមើល ហើយនៅតែមិនចង់ជឿទៀត ទាល់តែប្រាប់ថា បើមិនជឿមើលអាវរបស់បងទៅប្រលាក់សុទ្ធតែដី ដល់ពេលឃើញដូច្នេះ ទើបទទួលស្គាល់ថា ខ្លួនឯងសន្លប់ ដោយសារគ្រោះថ្នាក់ចរាចរណ៍នោះពិតមែន។ រីឯបុរសដែលជាអ្នកបើកម៉ូតូ បានរបួសធ្ងន់ មានឈាមកកក្នុងភ្នែក និងបាក់ឆ្អឹងកដខាងស្ដាំផងដែរ តែអ្នកទាំង២នាក់ មិនព្រមឡើងរថយន្តសង្គ្រោះនោះទេ។ ទើបអ្នកបើករថយន្តសង្គ្រោះនោះប្រាប់ឲ្យក្រុមការងារយកឧបករណ៍មកជួយអបឆ្អឹងកដៃនោះបណ្ដោះអាសន្នសិន។
ក្រោយពីកើតហេតុ សមត្ថកិច្ចមូលដ្ឋានបានឲ្យភាគីទាំង២ ធ្វើការចរចារគ្នាមួយជំហានសិន និងដាស់តឿនឲ្យឡើងរថយន្តសង្គ្រោះបន្ទាន់ដឹកទៅពេទ្យសិនដែរ តែជនរងគ្រោះនៅតែប្រកែកមិនព្រមទៅ ខណៈដែលភាគីរថយន្តទារសំណងជួយត្រឹម១៥០ដុល្លារ សម្រាប់ជួសជុលរថយន្តដែលខូចនោះ រីឯជនរងគ្រោះទាំងពីរនាក់បានព្យាយមទាក់ទងទៅគ្រួសារអោយចុះមកកន្លែងកើតហេតុ ដើម្បីឲ្យមកជួយដោះស្រាយផងដែរ៕