ភ្នំពេញៈ កម្លាំងនគរបាលខណ្ឌមានជ័យ សហការជាមួយកម្លាំងប៉ុស្តិ៍ចាក់អង្រែលើ បានល្បាតក្នុងភូមិសាស្ត្រ បានប្រទះឃើញជនសង្ស័យ ដើរចេញពីតំបន់អនាធិបតេយ្យ(វាលខ្សាច់) ដោយមានការសង្ស័យ កម្លាំងល្បាតបានសុំធ្វើការឆែកឆេរ ដោយរកឃើញគ្រឿងញៀនចំនួន ៤៥កញ្ចប់តូច និង១កញ្ចប់ធំ នៅក្នុងការបូបស្ពាយ ទើបសមត្ថកិច្ចធ្វើការឃាត់ខ្លួន រួចបញ្ជូនទៅស្នាក់ការប៉ុស្តិ៍នគរបាលចាក់អង្រែលើ ដើម្បីធ្វើការសាកសួរ។
ការឃាត់ខ្លួននេះ ធ្វើឡើងនៅវេលាម៉ោង១១៖១០នាទីយប់ថ្ងៃចន្ទ ទី១៧ ខែធ្នូ ឆ្នាំ២០១៨ នៅចំណុចតំបន់អនាធិបតេយ្យ ផ្លូវ៦០ម៉ែត្រ ក្រុមទី៨ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
លោក សឹម ប៊ុនធឿន នាយរងផ្នែកអន្តរាគមន៍ នៃអធិការនគរបាលខណ្ឌមានជ័យ បានប្រាប់ឲ្យភ្នាក់ងារ ខេមប៉ុស្តិ៍ ដឹងថា មុនពេលកើតហេតុ កម្លាំងល្បាតប៉ុស្តិ៍នគរបាលចាក់អង្រែលើ សហការជាមួយនឹងកម្លាំងល្បាតអធិការនគរបាលខណ្ឌមានជ័យ បានចេញល្បាតពួនស្ទាក់ និងត្រៀមលក្ខណៈអន្តរាគមន៍ ទប់ស្កាត់បទល្មើស នៅតាមភូមិសាស្ត្រនានា ក្នុងមូលដ្ឋាន លុះមកដល់ចំណុចជិតសំណង់មិនរៀបរយ ផ្លូវ៦០ម៉ែត្រ ក៏បានប្រទះឃើញស្ត្រីខាងលើ ដើរចេញពីតំបន់អនាធិបតេយ្យ(វាលខ្សាច់) ដោយមានការសង្ស័យ កម្លាំងល្បាតបានសុំធ្វើការត្រួតពិនិត្យ ឆែកឆេរ ដោយរកឃើញក្រាមពណ៌សថ្លា (សង្ស័យជាគ្រឿងញៀន) ចំនួន៤៥កញ្ចប់ថង់តូច និង១កញ្ចប់ធំ នៅក្នុងកាបូបស្ពាយរបស់ជនសង្ស័យ ទើបកម្លាំងសមត្ថកិច្ចក៏បានឃាត់ខ្លួន យកមកសាកសួរនៅស្នាក់ការនគរបាលប៉ុស្តិ៍ចាក់អង្រែលើ។
លោក អុំ រតនា នាយប៉ុស្តិ៍ចាក់អង្រែលើ បានប្រាប់ឲ្យដឹងថា ជនសង្ស័យឈ្មោះ ស៊ីណា ភេទស្រី អាយុ២៦ឆ្នាំ មុខរបរលក់ថ្នាំញៀន ស្នាក់នៅក្រោយសង្កាត់ចាក់អង្រែលើ និងវត្ថុតាងដកហូតបានរួមមាន៖ ក្រាមពណ៌សថ្លា (សង្ស័យជាគ្រឿងញៀន) ចំនួន៤៥កញ្ចប់ថង់តូច និង១កញ្ចប់ធំ ដោយពិនិត្យជាក់ស្តែង ក្រាមក្នុងថង់ទាំង៤៥កញ្ចប់នោះជាសាច់ជូរ បុកឲ្យម៉ត់ហើយច្រកថង់ទេ មិនមែនជាថ្នាំញៀនឡើយ។
ស្រ្តីអនាថាសង្ស័យសតិមិនគ្រប់ ក្រោយពីឃាត់ខ្លួន ទោះជាគ្មានថ្នាំញៀនពិតប្រាកដមែនក៏ដោយកុំឲ្យស៊យ សមត្ថកិច្ចខណ្ឌមានជ័យ រួមជាមួយប៉ុស្តិ៍ចាក់អង្រែលើ ឃាត់ខ្លួន កសាងសំណុំរឿងបញ្ជូនទៅតុលាការ ចាត់ការតាមផ្លូវច្បាប់៕