កាលពីរសៀលថ្ងៃចន្ទ ១១រោច ខែកត្តិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៣ ខែធ្នូ ឆ្នាំ២០១៨ ឯកឧត្តម ជាវ តាយ អភិបាលនៃគណៈអភិបាលខេត្តកំពត បានអញ្ចើញជាអធិបតីភាពក្នុងកិច្ចប្រជុំគណៈអភិបាលខេត្ត ប្រចាំខែវិច្ឆិកា ឆ្នាំ២០១៨ និងកិច្ចប្រជុំគណ:បញ្ជាការឯកភាពខេត្ត កិច្ចប្រជុំនេះក៏មានការចូលរួមពីសំណាក់ ឯកឧត្តម លោកជំទាវ អភិបាលរងខេត្ត នាយក នាយករងរដ្ឋបាលសាលាខេត្ត នាយកទីចាត់ការ ប្រធានអង្គភាពចំណុះសាលាខេត្ត ប្រធានមន្ទីរ អង្គភាពជុំវិញខេត្ត អភិបាលក្រុង ស្រុក ប្រធានប៉ុស្តិច្រកទ្វារព្រំដែន ប្រធានស្នាក់ការកំពង់ផែ សរុប ៦៨ នាក់។
ឯកឧត្តម ជាវ តាយ អភិបាលខេត្តកំពតថ្លែងថា ភ្នំមួយចំនួននៅក្នុងខេត្តកំពតបានក្លាយជាកម្មសិទ្ធិរបស់អ្នករកស៊ីធ្វើអាជីវកម្មកាយដីលក់ទៅហើយ។
ទាក់ទងនឹងការយកដីមកធ្វើផ្លូវតាមភូមិ ឃុំ លោកអភិបាលក៏បានស្នើនិងជំរុញឱ្យប្រធានមន្ទីររ៉ែ និងថាមពលខេត្ត ធ្វើការពិនិត្យឡើងវិញ ស្វែងរកឯកសារ អាជ្ញាប័ណ្ណធ្វើអាជីវកម្មកាយដីភ្នំ ហើយទាមទារឱ្យក្រសួងរ៉ែ និងថាមពលត្រូវកាន់កាប់គ្រប់គ្រងភ្នំឡើងវិញ ព្រោះភ្នំនៅក្នុងខេត្តសុទ្ធតែមានម្ចាស់កម្មសិទ្ធិស្ទើរតែអស់ទៅហើយ លោកមិនដែលជួបបញ្ហាបែបនេះទេ ហើយរដ្ឋបាលខេត្តក៏មិនអាចទៅទិញភ្នំខ្លួនឯងមកធ្វើផ្លូវបាននោះដែរ។
គួរររំលឹកថា ឯកឧត្តម ជាវ តាយ ត្រូវបានព្រះមហាក្សត្រតែងតាំងជាអភិបាលខេត្តកំពតកាលពីខែសីហា ឆ្នាំ២០១៨ កន្លងទៅជំនួសលោក ចាន់ ចេស្តា។