បាត់ដំបងៈ សិស្សានុសិស្សនៅវិទ្យាល័យថ្មគោល ស្ថិតក្នុងស្រុកថ្មគោល ខេត្តបាត់ដំបង ប្រមាណជាង៦០នាក់ បានដួលសន្លប់ជាបន្តបន្ទាប់ នៅរសៀលថ្ងៃទី៧ ខែធ្នូនេះ។ ទោះជាយ៉ាងណា សមត្ថកិច្ច និងអាណាព្យាបាលសិស្ស បានអន្តរាគមន៍បញ្ជូនទៅសង្គ្រោះនៅមន្ទីរពេទ្យភ្លាមៗផងដែរ។
បើតាមសេចក្ដីរាយការណ៍បឋម សិស្សានុសិស្សបានដួលសន្លប់ភាគច្រើន ជាសិស្សស្រី ដោយពួកគេមានអាការៈវិលមុខ រួចដួលសន្លប់តៗគ្នានៅក្នុងថ្នាក់រៀន។ ប្រភពពីសិស្សានុសិស្សមួយចំនួន បានប្រាប់ថា យុវសិស្សទាំងនោះ បានសន្លប់បាត់មាត់ ពេលកំពុងរៀននៅក្នុងថ្នាក់។ ពេលនោះ នៅក្នុងថ្នាក់រៀនហាក់ថប់ខ្យល់យ៉ាងខ្លាំង។ នៅខណៈពេលឃើញមានសិស្សខ្លះដួលសន្លប់បែបនេះ ទើបសិស្សដទៃទៀត មានអាការៈវិលមុខ ដួលជាបន្តបន្ទាប់តែម្ដងដូចគ្នា។
ដោយឡែក សមត្ថកិច្ចឲ្យដឹងដែរថា រហូតមកដល់ពេលនេះ ជនរងគ្រោះបានកើនឡើងដល់៦៣នាក់ ប៉ុន្តែចំនួននេះហាក់មានការកើនឡើង ដែលមិនអាចប៉ាន់ប្រមាណបានច្បាស់លាស់ឡើយ ហើយសិស្សខ្លះដែលមានស្ថានភាពធ្ងន់ធ្ងរ ត្រូវបានបញ្ជូនបន្តទៅកាន់មន្ទីរពេទ្យខេត្តផងដែរ។
យ៉ាងណា ករណីនេះ គេមិនទាន់ដឹងអំពីមូលហេតុ ដែលនាំឲ្យសិស្សានុសិស្សទាំងនោះដួលសន្លប់នៅឡើយទេ ព្រោះពេលនេះ កំពុងស្ថិតក្នុងជួយសង្គ្រោះបន្ទាន់ពីសមត្ថកិច្ច និងក្រុមគ្រូពេទ្យនៅឡើយ។ តែប្រភពខ្លះថា ពួកគេអាចពុលនំចំណីលក់នៅក្នុងសាលា ដែលដាក់លក់គ្មានអនាម័យ និងគ្មានការត្រួតពិនិត្យឲ្យបានត្រឹមត្រូវ បូករួមបរិយាកាសរបស់សាលាមិនអំណោយផលផងនោះ៕