ភ្នំពេញៈ ជនសង្ស័យពីរនាក់ ជិះម៉ូតូមួយគ្រឿង បានធ្វើសកម្មភាពឆក់កាបូបពីស្ត្រីម្នាក់ ដែលជាអ្នកលក់ស្រាបៀរក្នុងហាង ខណៈកំពុងជិះម៉ូតូត្រឡប់មកពីធ្វើការ តែត្រូវជនរងគ្រោះទាញកាបូបមកវិញ បណ្ដាលឲ្យម៉ូតូជនសង្ស័យដួល ហើយប្រជាលរដ្ឋជួយចាប់បានម្នាក់ និងដកហូតបានម៉ូតូមួយគ្រឿង។ ចំណែកបក្ខពួកម្នាក់ទៀត រត់គចខ្លួនបាត់ស្រមោល កាលពីវេលាម៉ោង១០៖៣០នាទី យប់ថ្ងៃទី២៩ ខែធ្នូ ឆ្នាំ២០១៨នេះ នៅត្រង់ចំណុចមុខផ្ទះលេខ៣៨៨ ផ្លូវម៉ៅសេទុងក្រុម៣០ ភូមិ១១ សង្កាត់បឹងសាឡាង ខណ្ឌទួលគោក រាជធានីភ្នំពេញ។
សមត្ថកិច្ចឲ្យដឹងថា ជនសង្ស័យចំនួន២នាក់ ១-ឈ្មោះ ឡា ភេទប្រុស អាយុប្រហែល២០ឆ្នាំ ពុំស្កាល់អាស្រ័យដ្ឋាន ជាអ្នកបើកម៉ូតូបានរត់គេចខ្លួនបាត់ (ស្គាល់គ្នានៅកោះពេជ្រ) និង២-ឈ្មោះ ផេន សៀវលី ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅម្តុំផ្សារស៊ីដនី ផ្លូវឌឿងហែម សង្កាត់មិត្តភាព ខណ្ឌ៧មករា រាជធានីភ្នំពេញ។ ចំណែកជនរងគ្រោះឈ្មោះ ករុណា ភេទស្រី អាយុ៣១ឆ្នាំ មុខរបរបុគ្គលិកស្រាបៀរកម្ពុជា មានទីលំនៅក្នុងខណ្ឌមានជ័យ រាជធានីភ្នំពេញ។
សម្ភារៈដកហូត រួមមាន ម៉ូតូ១គ្រឿង ម៉ាក ហុដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ ភ្នំពេញ 1DH-3636 (ម៉ូតូជិះធ្វើសកម្មភាព) និងកាបូបស្ពាយ ពណ៌ក្រហមចំនួន១ (ជារបស់ជនរងគ្រោះ)។
សមត្ថកិច្ចបន្តថា កាលពីវេលាម៉ោងប្រហែល១០៖២០នាទីយប់កើតហេតុ ជនរងគ្រោះបានជិះម៉ូតូចេញពីលក់ស្រាបៀរ នៅហាងហ្គោដថេស សង្កាត់ទឹកល្អក់១ ដោយមានអ្នកធ្វើការជាមួយគ្នាម្នាក់ទៀត ឈ្មោះ ខុម ជាអ្នកឌុប ក្នុងគោលបំណងទៅផ្ទះ។ ជនរងគ្រោះអង្គុយខាងក្រោយ ស្ពាយកាបូប នៅពេលជិះមកដល់ចំណុចមុខផ្ទះលេខ៣៨៨ ផ្លូវ២៤៥ ក្រុម៣០ភូមិ១១ សង្កាត់បឹងសាឡាង ស្រាប់តែមានម៉ូតូ១គ្រឿងម៉ាក ហុងដា១២៥ ពណ៌ខ្មៅ ឌុបគ្នាពីរនាក់ បានជិះមកអែបខាងឆ្វេងដៃ ហើយធ្វើសកម្មភាពឆក់កាបូបស្ពាយពីជនរងគ្រោះ។ ពេលនោះ ជនរងគ្រោះក៏ចាប់ទាញមកវិញ បណ្តាលឲ្យដួលម៉ូតូ ភ្លាមនោះជនសង្ស័យព្យាយាមរត់គេច តែជនរងគ្រោះបានស្រែកឆោឡោឡើង ធ្វើឲ្យអ្នករួមដំណើរ និងប្រជាពលរដ្ឋ នាំគ្នាជួយឃាត់បានជនសង្ស័យម្នាក់ រួមទាំងវត្ថុតាងបញ្ជូនប្រគល់ឲ្យនគបាលប៉ុស្តិ៍បឹងសាឡាង។ ចំណែកជនសង្ស័យម្នាក់ទៀត គេចខ្លួនបាត់ស្រមោល។
បច្ចុប្បន្នជនសង្ស័យខាងលើ ត្រូវបានឃាត់ខ្លួននៅអធិការដ្ឋាន ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមផ្លូវច្បាប់៕
