ភ្នំពេញៈ យុវជន២នាក់ បើកម៉ូតូលឿនទាក់ដៃចង្កូតជាមួយម៉ូតូមួយគ្រឿងទៀត ហើយត្រូវបានរថយន្តបុកបន្ថែមបណ្តាលឲ្យស្លាប់ម្នាក់យ៉ាងអាណោចអាធ័ម និងម្នាក់ទៀតរងរបួសស្រាល បង្កឲ្យមានការភ្ញាក់ផ្អើលកាលវេលម៉ោង ៧ និង៤៥នាទីយប់ ថ្ងៃទី១៦ ខែធ្នូ ឆ្នាំ២០១៨ នៅតាមបណ្ដោយផ្លូវជាតិលេខ៤ ទល់មុខបុរីពិភពថ្មីកំបូល ដែលស្ថិតនៅសង្កាត់កំបូល ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះ ឈ្មោះ សាំង ជីវ័ន្ត ភេទប្រុស អាយុ១៧ឆ្នាំ មុខរបរជាងជាងសំណង់ ស្នាក់នៅក្នុងបុរីពិភពថ្មីកំបូល មានស្រុកកំណើតនៅភូមិកន្ទៀន ឃុំរោងដំរី ស្រុកបាភ្នំខេត្តព្រៃវែង។ ជនរងគ្រោះជិះម៉ូតូ ម៉ាកឌ្រីមសង់ស៊េរី២០១៨ ពណ៌ខ្មៅ ពាក់ស្លាកលេខ ព្រៃវែង 1N-0791បើកបរដោយយុវជន២នាក់ បើកបរក្នុងទិសដៅពីកើតទៅលិច ។
ប្រភពព័ត៌មានពីយុវជនដែលជិះជាមួយជនរងគ្រោះដែលស្លាប់ បានឲ្យដឹងថា មុនពេលកើតហេតុគាត់បានជិះម៉ូតូតាមបណ្ដោយផ្លូវជាតិលេខ៤ ក្នុងទិសដៅពីកើតទៅលិច ក្នុងល្បឿនលឿន ហើយបន្ទាប់មកបានទាក់ដៃចង្កូតជាមួយម៉ូតូ ១គ្រឿងទៀតបណ្ដាលឲ្យដួលហើយបន្ទាប់មក ស្រាប់តែមានរថយន្តមួយគ្រឿងម៉ាកតូយ៉ូតាប្រូស បានបុកបន្ថែមបណ្តាលឲ្យដួលបោកនឹងថ្នល់ បាក់កស្លាប់យ៉ាងអាណោចអាធ័ម។
ប្រភពព័ត៌មានបានបន្តទៀតថា ខណៈពេលភ្លាមៗ រថយន្តម៉ាកតូយ៉ូតាព្រូស ខាងលើ បានបើក គេចខ្លួនបាត់ស្រមោល។ ក្រោយពេលកើតហេតុ សពត្រូវបានជំនាញចរាចរខណ្ឌពោធិ៍សែនជ័យ បានធ្វើលិខិត ប្រគល់សាកសពឲ្យក្រុមគ្រួសារដើម្បីយកទៅធ្វើបុណ្យតាមប្រពៃណីនៅស្រុកកំណើត៕