ភ្នំពេញៈ លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា បានថ្លែងថា សហរដ្ឋអាមេរិក មិនមែនជាបិតាប្រជាធិបតេយ្យនោះទេ ហើយបើនិយាយអំពីសិទ្ធិមនុស្សវិញ កម្ពុជា មានភាពល្អប្រើសើរជាងអាមេរិក។
ការលើកឡើងរបស់លោក កែវ រ៉េមី ធ្វើឡើងនៅព្រឹកថ្ងៃទី១០ ខែធ្នូនេះ ក្នុងឱកាសដែលកម្ពុជា ប្រារព្ធពិធីខួបលើកទី៧០ ទិវាសិទ្ធិមនុស្សអន្តរជាតិ ១០ធ្នូ ឆ្នាំ២០១៨ ក្រោមប្រធានបទ "រួមគ្នាថែរក្សាសន្តិភាព ដើម្បីលើកកម្ពស់សិទ្ធិមនុស្ស" ក្រោមអធិបតីភាពសម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៅសាលមហោស្រពកោះពេជ្រ។
លោក កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកគណៈកម្មាធិការសិទ្ធិមនុស្សកម្ពុជា បានបញ្ជាក់យ៉ាងដូច្នេះថា "សហរដ្ឋអាមេរិក មានបងប្អូនប្រជាជនខ្មែរយើងខ្លះ លោកមានការយល់ច្រឡំថា ជាបិតាប្រជាធិបតេយ្យ តាមពិតមិនមែនទេ។ បញ្ហាច្រើនណាស់"។
លោក កែវ រ៉េមី បានលើកទិន្នន័យមួយពីអង្គការសង្គមស៊ីវិលអាមេរិក ដើម្បីបញ្ជាក់បន្ថែម។ បើតាមលោក កែវ រ៉េមី អង្គការនោះ បានឲ្យដឹងថា ប្រជាជនអាមេរិក ស្មើនឹង៥ភាគរយ នៃប្រជាជននៅលើសកលលោក។ ក៏ប៉ុន្តែអ្នកដែលជាប់ពន្ធនាគារ មិនមែនតួលេខ៥ភាគរយ ដូចប្រជាជនលើសកលលោកទេ គឺ២៥ភាគរយ ស្នើនឹងចំនួនអ្នកជាប់គុកទូទាំងសកលលោក។
លោកថា បើគិតអត្រានៃអ្នកជាប់គុកនៅអាមេរិក គឺខ្ពស់មែនទែន ហើយបើគិតជាតួលេខ គឺ២.៤លាននាក់ បើគិតជាប្រជាជននៅរាជធានីភ្នំពេញ ប្រហាក់ប្រហែលនៅទីក្រុងភ្នំពេញ។
លោក កែវ រ៉េមី បានបន្តថា គេសង្កេតឃើញទៀតថា អ្នកជាប់គុកនៅសហរដ្ឋអាមេរិក៦០ភាគរយ សម្បុរមិនមែនពណ៌សទេ គឺដូចជាស្បែកខ្មៅ ម៉ិចស៊ីកូ និងអាស៊ី។
លោក កែវ រ៉េមី គូសបញ្ជាក់ដែរថា ចំណែកស្ថានភាពសិទ្ធិមនុស្សនៅកម្ពុជា មានភាពល្អប្រសើរ បើប្រៀបធៀបនឹងបណ្តាប្រទេសមួយចំនួន នៅទ្វីបអាស៊ី នៅអឺរ៉ុប ជាពិសេសបើប្រៀបធៀបនឹងអាមេរិក។ ជាមួយគ្នានេះ សន្តិភាព គឺជាគន្លឹះមួយ នៃការដែលនាំឲ្យសិទ្ធិមនុស្ស កាន់តែត្រូវបានលើកកម្ពស់។
លោកបញ្ជាក់បន្ថែមថា "មានប្រជាពលរដ្ឋ សួរខ្ញុំតាម Facebook ថា កម្ពុជា មានសិទ្ធិមនុស្សទេ? មានការគោរពសិទ្ធិមនុស្សអត់? ខ្ញុំឆ្លើយថា ស្ថានភាពសិទ្ធិមនុស្សនៅកម្ពុជា មានភាពល្អប្រសើរណាស់ ប្រៀបធៀបជាមួយបណ្តាប្រទេសជិតខាងមួយចំនួន នៅអាស៊ី នៅអឺរ៉ុប នៅអាមេរិក ស្ថានភាពរបស់យើង មានលក្ខណៈល្អប្រសើរ។ អញ្ចឹងខ្ញុំ សូមជម្រាបជូនទៀតថា កត្តាសន្តិភាព គឺជាគន្លឹះមួយនៅក្នុងការលើកកម្ពស់សិទ្ធិមនុស្ស"៕
