បន្ទាយមានជ័យៈ មានហេតុការណ៍គ្រោះថ្នាក់ចរាចរណ៍ដ៏រន្ធត់មួយបានកើតឡើងរវាងរថយន្តបាឡែន បុកជាមួយរថយន្តដឹកត្រី ប្រភេទកង់៦ បញ្ច្រាសទិសគ្នាលាន់ដូចរន្ទះ បណ្តាលឱ្យស្លាប់២នាក់ និងរបួស២នាក់។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១១៖៥នាទីព្រឹកថ្ងៃទី៤ ខែធ្នូ ឆ្នាំ២០១៨ លើផ្លូវជាតិលេខ៥ ត្រង់ចំណុចខាងកើតផ្លូវ៥០ ប្រហែល៥០០ម៉ែត្រ ស្ថិតក្នុងភូមិកូន ដំរី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ត្រី ឈឿន ប៊ុនថា អធិការរងទទួលបន្ទុកផ្នែកចរាចរណ៍ បានប្រាប់ឱ្យដឹងថា គ្រោះថ្នាក់ចរាចរណ៍នេះ បង្កឡើងរវាងរថយន្តធុនតូច (បាឡែន) បើកពីលិចទៅកើត លុះមកដល់ចំណុចខាងលើ បានឡើងជែង ហើយក៏ជ្រុលទៅបុករថយន្តធុនធំដឹកត្រី បើកបរពីកើតមកលិច (ច្រាសទិសគ្នា) បណ្តាលឲ្យរបួសមនុស្សធ្ងន់ចំនួន២នាក់(ស្រី) និងស្លាប់២នាក់ (ប្រុស)។
លោកបានបន្តទៀតថា ចំពោះស្រ្តីពីរនាក់ រងរបួសធ្ងន់ ត្រូវបានរថយន្តរបស់លោក នួន នីគីដា អ្នកជួយផ្នែកមនុស្សធម៌ ប្រចាំក្រុងប៉ោយប៉ែត ដឹកយកទៅសង្រ្គោះនៅមន្ទីរពេទ្យបង្អែកដីថ្មី២៕
