បន្ទាយមានជ័យ: មន្ត្រីជំនាញសាខាកាំកុងត្រូលខេត្តបន្ទាយមានជ័យបានរកឃើញស្ថានីយ៍ប្រេងជាច្រើនកន្លែងដែលស្ថិតតាមបណ្តោយផ្លូវជាតិលេខ៦៨នៃស្រុកបីជាប់ព្រំដែនបានលក់ប្រេងមិនអនុលោមភាពកេងបន្លំបរិមាណលីត្រ។ ការរកឃើញមានភាពមិនប្រក្រតីនេះគឺបន្ទាប់ពីមន្ត្រីជំនាញចុះត្រួតពិនិត្យកាលពីព្រឹកថ្ងៃទី៥ ខែធ្នូ ឆ្នាំ២០១៨ តាមរយៈនៃការត្រួតពិនិត្យដោយ រថយន្តមន្ទីរពិសោធន៍ចល័តប្រេងឥន្ធនៈ របស់អគ្គនាយកដ្ឋានកាំកុងត្រូល។
លោក សានវិជ្ជាសារ៉ាវុធ ប្រធានកាំកុងត្រូលសាខាខេត្តបន្ទាយមានជ័យ បានឲ្យដឹងថា តាមរយៈនៃការត្រួតពិនិត្យដោយ រថយន្តមន្ទីរពិសោធន៍ចល័តប្រេងឥន្ធនៈ របស់អគ្គនាយកដ្ឋានកាំកុងត្រូល ដែលបានចុះត្រួតពិនិត្យបរិមាណ និងគុណភាពប្រេងឥន្ធនៈ តាមដេប៉ូ និងស្ថានីយប្រេងនានាក្នុងស្រុកជាប់ព្រំដែនលក់មិនមានអនុលោមភាពឡើយ គឺលក់មិនគ្រប់លីត្រ បាត់រហូតដល់ទៅ៥លីត្រក្នុងបរិមាណ១០០លីត្រ ខុសស្តង់ដានិងគ្មានគុណភាព។
លោក សាន វិជ្ជាសារ៉ាវុធ បានបញ្ជាក់ទៀតថាដោយរកឃើញពីមិនអនុលោមភាពនេះក្រុមការងារបានធ្វើការណែនាំដល់ម្ចាស់ដេប៉ូ និងស្ថានីយប្រេងឥន្ធនៈ ធ្វើយ៉ាងណាឲ្យមាននិរន្តភាព និងមានគុណភាពបរិមាណកម្រិតស្តង់ដា ព្រមទាំងធ្វើកិច្ចសន្យាជាលើកទី១ ដើម្បីឲ្យពួកគាត់កែប្រែបរិមាណគុណភាពនិងកែខ្លួនរៀបចំឲ្យមានភាពត្រឹមត្រូវតាមលក្ខណ:បច្ចេកទេសស្តង់ដាឲ្យល្អប្រសើរជាងមុន ប៉ុន្តែបើសិនជាមានលើកទី២ និងករណីរកឃើញភាពមិនប្រក្រតីនោះទៀត ពួកគាត់អាចប្រឈមមុខនឹងការបិទដេប៉ូ ស្ថានីយ៍ និងដកហូតអាជ្ញាប័ណ្ណទៅតាមនិតិវិធី៕
