ភ្នំពេញៈ កម្លាំងសមត្ថកិច្ចខណ្ឌទួលគោកធ្វើការចុះបង្ក្រាប និងធ្វើការឃាត់ខ្លួនជនសង្ស័យជួញដូរគ្រឿងញៀនចំនួន២នាក់ រួមទាំងថ្នាំញៀន៧កញ្ចប់តូច កាលពីវេលាម៉ោង១០៖៣០នាទីយប់ ថ្ងៃព្រហស្បត្តិ៍ ទី៦ ខែធ្នូ ឆ្នាំ២០១៨ នៅត្រង់ចំណុចផ្លូវរថភ្លើង(ត្រឡោកបែក) កែងផ្លូវ៥៩៨ ស្ថិតក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។
សមត្ថកិច្ចខណ្ឌទួលគោក បានឲ្យដឹងថា នៅមុនពេលកើតហេតុកម្លាំងរបស់ពួកគាត់ បានធ្វើការស្រាវជ្រាវ និងស៊ើបអង្កេត រហូតឈានទៅដល់ការកំណត់មុខសញ្ញា និងចុះបង្ក្រាបត្រង់ចំណុចខាងលើ ហើយបានធ្វើការឃាត់ខ្លួនជនសង្ស័យទាំងពីរនាក់ខាងលើ ដែលតែងតែឈរចែកចាយគ្រឿងញៀន នៅត្រង់ចំណុចកើតហេតុខាងលើយ៉ាងសកម្មតែម្ដង រួមទាំងដកហូតបានថ្នាំញៀន ប្រភេទក្រាមសថ្លា ចំនួន៧កញ្ចប់តូច។
សមត្ថកិច្ចបន្តថា ជនសង្ស័យទាំង២នាក់ ទី១-ឈ្មោះ ម៉ៅ ភេទប្រុស អាយុ១៦ឆ្នាំ មុខរបរ និងស្នាក់នៅមិនពិតប្រាកដ។ ទី២-ឈ្មោះ ប៊ុន ជិត ភេទប្រុស អាយុ១៧ឆ្នាំ មុខរបរ មិនពិតប្រាកដ ស្នាក់នៅទីតាំងកន្លែងកើតហេតុខាងលើ។
ក្រោយពេលកើតហេតុ ជនសង្ស័យទាំង២នាក់ រួមទាំងវត្ថុតាងត្រូវបានកម្លាំងសមត្ថកិច្ច នាំខ្លួនយកទៅសាកសួរនាំបន្ត នៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿង បញ្ជូនទៅតុលាការរង់ចាំការចាត់ការទៅតាមនីតិវិធីជាបន្តទៀត៕
