លោក ស៊ន តារា អតីតគ្រូបង្រៀនទស្សនវិទ្យាដែលកំពុងនិរន្ទេសខ្លួននៅបរទេស បានទទួលប័ណ្ណសរសើរពីលោក សម រង្ស៊ី ប្រធានចលនាសង្គ្រោះជាតិ នៅក្នុងវេទិកាសាធារណៈដែលដឹកនាំដោយលោក សម រង្ស៊ី នាក្រុងប៉ារីស ប្រទេសបារាំង កាលពីថ្ងៃទី១៥ ខែធ្នូ ឆ្នាំ២០១៨។ ប័ណ្ណសរសើរនេះ បានទទួលស្គាល់ពីការលះបង់និងមានតម្លៃរបស់លោក ស៊ន តារា សម្រាប់បម្រើដល់ចលនាសង្គ្រោះជាតិ ។
បុរសសម្បូរវោហាស័ព្ទរូបនេះបានបញ្ជាក់តាមរយៈហ្វេសប៊ុកថា៖ ហ៊ុន សែនកំពុងតែភ័យស្លន់ស្លោខ្លាចសម រង្ស៊ី កឹម សុខាតែ១ ដែលនាំឲ្យពិភពលោករញ្ជួយ ឯពលរដ្ឋក្នុងស្រុកពុះកញ្ជ្រោល ក្រោកឈរគ្រប់ទិសទី។ ហ៊ុន សែនប្រឹងបិទបាំងភាពស្រុតចុះ និងភាពអន្តរាយឆាប់ៗជីវិតនយោបាយរបស់ខ្លួនតាមរូបភាព សន្តិភាពនិងអភិវឌ្ឃន៍ដែលគ្រាន់តែជាសំបក ក្រេមម្សៅបំភ័នភ្នែករាស្ត្រនិងសហគមន៍អន្តរជាតិថាខ្លួនរឹងមាំ។
លោក តារា បន្ថែមទៀតថា៖ មិនយូរទេឲ្យតែយើងរួមគ្នាក្រោមពាក្យកឹម សុខា សម រង្ស៊ី តែ១ មិនចុះចូល មិនចុះចាញ់ មិនឆ្វេចឆ្វាច ផ្តុំកម្លាំងតែ១ប្រយុទ្ធ ហ៊ុន សែននឹងចប់ដូចស្លឹកឈើទុំជ្រុះពីមែក។ (ពាន់រង្វាន់អ្នកប្រយុទ្ធអហិង្សាប្រជាធិបតេយ្យ) ហ៊ុន សែនចប់ហើយ។ ប្តូរ!
សូមរំលឹកថា វេទិការសាធារណៈ យុទ្ធសាស្ត្រគណបក្សសង្រ្គោះជាតិដឹកនាំដោយ សម រង្ស៊ី នាក្រុងប៉ារីស បារាំង កាលពីថ្ងៃទី១៥ ខែធ្នូ ឆ្នាំ២០១៨ បានប្រកាសទទួលស្គាល់លោក សម រង្ស៊ី ឱ្យកាន់តំណែងជាប្រធានស្តីទីគណបក្សសង្គ្រោះជាតិជាផ្លូវការ។ ក្នុងឱកាសនោះប្រធានស្តីទីរូបនេះបញ្ជាក់ថា៖ យើងមិនត្រូវឲ្យ ហ៊ុន សែន គេចផុតពីដំណោះស្រាយរួម ៥ ចំណុច ដែលសហគមន៍អន្តរជាតិ បង្ខំឲ្យជនផ្តាច់ការនេះ អនុវត្តទាំងស្រុង ដើម្បីដោះស្រាយវិបត្តិនយោបាយ នៅកម្ពុជា គឺ៖ ដោះលែងលោក កឹម សុខា ទម្លាក់ចោលរាល់ការចោទប្រកាន់ មកលើថ្នាក់ដឹកនាំ និងសកម្មជនគណបក្សសង្គ្រោះជាតិ ឲ្យគណបក្សសង្គ្រោះជាតិដំណើរការឡើងវិញ សងគណបក្សសង្គ្រោះជាតិវិញនូវតំណែងដែលប្រជាពលរដ្ឋបានបោះឆ្នោតឲ្យ និងបោះឆ្នោតឡើងវិញដោយមានការចូលរួមពីគណបក្សសង្គ្រោះជាតិ។