ភ្នំពេញៈ សមត្ថកិច្ចមន្ទីរប្រឆាំងគ្រឿងញៀនក្រសួងមហាផ្ទៃ នាល្ងាចថ្ងៃទី២១ ធ្នូ ឆ្នាំ២០១៨នេះ បានបញ្ជូនក្រុមឌីជេ ដែលពាក់ព័ន្ធករណីលក់គ្រឿងញៀននៅមុខក្លឹបកម្សាន្តរ៉ុក មកសាលាដំបូងដើម្បីធ្វើការសាកសួរ។
កម្លាំងសមត្ថកិច្ចនគរបាលការិយាល័យទី៦ នៃមន្ទីរប្រឆាំងគ្រឿងញៀន បើកប្រតិបត្តិការដ៏ក្តៅគគុក បង្ក្រាបលើករណីជួញដូរ និងរក្សាទុកគ្រឿងញៀនមួយបានយ៉ាងជោគជ័យ ធ្វើឡើងកាលពីវេលាម៉ោង២៖២០យប់ចូលថ្ងៃទី១៩ ខែធ្នូ ស្ថិតនៅមជ្ឈមណ្ឌលកម្សាន្តរ៉ុក ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ដោយឃាត់ខ្លួនជនសង្ស័យប្រុស-ស្រីចំនួន៤នាក់។
សមត្ថកិច្ច បានឲ្យដឹងថា អ្វីដែលភ្ញាក់ផ្អើលបំផុត គឺជនសង្ស័យម្នាក់ ក្នុងចំណោម៤នាក់នេះ គឺជាពិធីករទូរទស្សន៍ល្បីម្នាក់ និងដកហូតបានថ្នាំញៀនបានជាង១គីឡូក្រាម។
ជនសង្ស័យទាំង៤នាក់ ១-ឈ្មោះ ហែម បូរិទ្ធ ភេទប្រុស អាយុ៣៣ឆ្នាំ ជាពិធីករទូរទស្សន៍ (ឌីជេឡាយអិន) ស្នាក់នៅផ្ទះលេខ៦៣ ផ្លូវសុធារស សង្កាត់ទន្លេបាសាក់ ខណ្ឌចំការមន។ ២-ឈ្មោះ វ៉ា ស្រីណា ភេទស្រី អាយុ៣៨ឆ្នាំ មុខរបរមិនពិតប្រាកដ ស្នាក់នៅផ្ទះជួល ក្នុងសង្កាត់បឹងត្របែក ខណ្ឌចំការមន ។ ៣-ឈ្មោះ អ៊ិន សាខន ភេទប្រុស អាយុ៥១ឆ្នាំ ស្នាក់ផ្ទះជួលលេខ៦A ផ្លូវលំ សង្កាត់ស្ទឹងមានជ័យ ខណ្ឌមានជ័យ (មេក្លោង)។ ៤-ឈ្មោះ ស៊ិន សំភ័ស្ត ភេទប្រុស អាយុ៣៣ឆ្នាំ អាសយដ្ឋានស្នាក់នៅភូមិ៤ សង្កាត់បឹងស្រឡាង ខណ្ឌទួលគោក រាជធានីភ្នំពេញ (ឈ្មោះនេះទើបចេញពីពន្ធនាគារ ពាក់ពន្ធករណីជួញដូរគ្រឿងញៀន) និងត្រូវជាក្មួយនាយករងមន្ទីរគ្រឿងញៀនម្នាក់ ហើយក៏ជាម្ចាស់អាវុធខ្លី១ដើមនោះផងដែរ ។
សមត្ថកិច្ច បានបន្តថា ជាមួយការឃាត់ខ្លួនជនសង្ស័យទាំង៤នាក់ខាងលើនេះ សមត្ថកិច្ចដកហូតវត្ថុតាងនៅក្នុងបន្ទប់១០៨ ក្នុងមជ្ឈមណ្ឌលកម្សាន្តរ៉ុក រួមមាន ១-ថ្នាំមេតំហ្វេតាមីន(ICE)ទម្ងន់៣៧៤.៣៩ក្រាម ២-សារធាតុញៀនប្រភេទអ៊ិចស្តាស៊ីចំនួន១៥៦២គ្រាប់ ស្មើទម្ងន់ និង៦០៩.៣៣ក្រាម (សរុបជាង១គីឡូក្រាម) ៣-អាវុធខ្លី១ដើម (ឡុក) ៤-ជញ្ជីងថ្លឹងគ្រឿងញៀនធំ១គ្រឿង និងតូច២គ្រឿង ។
បច្ចុប្បន្នជនសង្ស័យទាំង៤ រួមទាំងវត្ថុតាង ត្រូវបានតំណាងអយ្យការកំពុងធ្វើការសាកសួរនៅឡើយ៕
