ភ្នំពេញៈ នារីខ្មែររូបស្រស់ម្នាក់ យំត្រហេបត្រហប ឡើងជិះ PassApp ទៅដាក់ពាក្យបណ្ដឹងនៅប៉ុស្តិ៍នគរបាលផ្សារថ្មី៣ ទាំងហួសចិត្ត នឹងទង្វើមិនគប្បីរបស់បុរសបរទេសម្នាក់ ដែលបានមកចាប់ចង្កេះនាងរួចចាប់ឱបថើប តែត្រូវនាងទះមួយកំផ្លៀង ហើយជននោះរត់ចូលសង្ងំក្នុងក្លិប HEART OF DARKNESS ខណៈនារីរងគ្រោះក៏ជាភ្ញៀវមួយរូបដែរ ប្រាប់ឲ្យបុគ្គលិក និងសន្តិសុខជួយរកបុរសបរទេសនោះផង បែរជាអ្នកគ្រប់គ្រងក្លិប និងបុគ្គលិកទាំងនោះ គ្មានអ្នកណាអើពើទៅលើបញ្ហានេះទៅវិញ ដោយទុកឱកាសឲ្យជននោះលួចរត់គេចខ្លួនបាត់ ដោយចាំបាត់ៗយូពេក ទើបនាងខឹងបោកកែវ ស្រែករកជនបរទេសនោះឲ្យចេញមក តែក៏ត្រូវបានសន្តិសុខដេញចេញមកក្រៅទើបអ្នកគ្រប់គ្រងក្លិបចេញមកសុំសម្រួល ព្រោះមិនចង់ឲ្យមានរឿងវែងឆ្ងាយ និងខ្លាចប៉ះពាល់ដល់ក្លិប គ្រាន់តែលឺការបកស្រាយ នាងក៏ត្រហ៊ោយំបង្កការភ្ញាក់ផ្អើលឡើងតែម្ដង។
ហេតុការណ៍នេះ បានកើតឡើងនៅវេលាម៉ោង៤៖០៥នាទីទាបភ្លឺ ឈានចូលថ្ងៃទី១០ ខែធ្នូ ឆ្នាំ២០១៨ នៅក្នុងក្លិបមួយឈ្មោះថា "HEART of Darkness Club" ម្ដុំសូរិយាម៉ល ផ្លូវលេខ៥១ (ប៉ាស្ទ័រ) ខណៈដែលភ្ញៀវជនបរទេសរូបនោះ បានចូលមកផឹកស្រាជុំមិត្តភក្ដិ នៅក្នុងក្លិបខាងលើ ហើយឆ្លៀតពេលដែលឃើញនាងឈរតែម្នាក់ឯង និងរូបសម្រស់ស្រស់នាងស្អាតទៀតនោះ ស្រាប់តែជនបរទេសនោះ បានងើបចេញពីតុផឹកស៊ី រួចដើរទៅឱបរួចចាប់ថើប ប៉ុន្តែ ត្រូវបាននាងខំរើបម្រាស់រួចចេញពីដៃ រួចក៏ទះមួយកំផ្លៀង ស្រាប់តែជននោះដើរចេញឡើងលឿន រួចចូលទៅសង្ងំខាងក្នុងបាត់។
បើតាមសម្ដីរបស់នារីរងគ្រោះ ដែលស្រែកស្ដីបន្ទោសដាក់បុរសម្នាក់ ដែលជាអ្នកគ្រប់គ្រងក្លិបនោះនៅចំពោះមុខមហាជនថា រូបនាងជាជនរងគ្រោះ និងជាភ្ញៀវមួយរូបដែរ ក្រោយពីបុរសបរទេសនោះ បានមកចាប់ចង្កេះនាងរួចចាប់ឱបថើប នាងក៏ទះមួយកំផ្លៀង ហើយបរទេសរូបនោះ ក៏គេចចូលទៅពួន ទើបនាងមកប្រាប់ឲ្យបុគ្គលិក និងសន្តិសុខ ជួយរកបុរសបរទេសនោះផង បែរជាបុគ្គលិកទាំងនោះ មិនមានអ្នកណាអើពើទៅលើបញ្ហារបស់នាងទៅវិញ ទើបនាងខឹងបោកកែវ ស្រែករកជនបរទេសនោះឲ្យចេញមក ព្រោះតែការមិនឲ្យតម្លៃនាងក៏ជាភ្ញៀវមួយរូបដែរ ហេតុអ្វីនាងប្រាប់ហើយម៉េចមិនមានអ្នកណាជួយដោះស្រាយ ឬទុកឱកាសឲ្យភ្ញៀវបរទេសនោះ លួចរត់គេចខ្លួនបាត់ហើយ បានសន្តិសុខដេញនាងឲ្យចេញមកក្រៅ ហើយទើបលោកដែលជាអ្នកគ្រប់គ្រងក្លិប ចេញមុខមកសុំនិយាយសម្របសម្រួល ព្រោះមិនចង់ឲ្យមានរឿងវែងឆ្ងាយ និងខ្លាចប៉ះពាល់ដល់ក្លិបរបស់លោកគ្រប់គ្រង? ចុះនាងជាមនុស្សស្រី ត្រូវគេមកបំពានរាងកាយក្នុងក្លិបរបស់លោក ហេតុអ្វីមិនជួយ? រួចបុរសដែលនាងនិយាយជាមួយថា ជាអ្នកគ្រប់គ្រងនោះបានបកស្រាយទៅវិញទៅមក។
មួយសន្ទុះក្រោយមក អ្នកគ្រប់គ្រងនោះនិយាយថា បើអ្នកនាងសង្ស័យថា ខាងក្នុងមានលាក់ទុកបុរសបរទេសនោះ ខ្ញុំនាំអ្នកនាងចូលទៅឆែករកមើលទាំងអស់គ្នា នាងក៏ឆ្លើយវិញថា ជាងមួយម៉ោងទៅហើយ វាហួសពេលដែលត្រូវរកហើយ នាងខ្ញុំសូមអរគុណលោកខ្លាំងណាស់ដែលបានជួយ ហើយក៏ត្រហ៊ោយំហៅកង់បី PassApp ឡើងជិះចេញទៅ ហើយអ្នកយកព័ត៌មាន CAM POST យើងក៏បានសាកសួរឈ្មោះ នាងមិនឆ្លើយអ្វីច្រើនទេ ដោយប្រាប់មួយម៉ាត់ថា ឈ្មោះ អន សុខណាង អាយុប្រហែល៣០ឆ្នាំ ហើយក៏ទៅដាក់ពាក្យបណ្ដឹងនៅប៉ុស្តិ៍នគរបាលផ្សារថ្មី៣ តែម្ដង។
សូមជម្រាបជូនថា បើយោងមាត្រា២៤៦ នៃក្រមព្រហ្មទណ្ឌ ស្តីពីបទប្រទូស្តកេរខ្មាសចែងថា គ្រប់អំពើ ប៉ះពាល់ ស្ទាប អង្អែលកេរភេទ ឬផ្នែកផ្សេងទៀតរបស់បុគ្គលដទៃតែបុគ្គលនេះ មិនស្ម័គ្រផងទេ ឬបង្ខំឲ្យបុគ្គលដទៃប្រព្រឹត្តអំពើនេះមកលើខ្លួន ឬទៅលើតតិយបុគ្គល ក្នុងគោលបំណងធ្វើឲ្យរំជួល ឬរីករាយដល់ចំណងផ្លូវភេទរបស់ជនល្មើស គឺជាអំពើប្រទូស្តកេខ្មាស ។ អំពើប្រទូស្តកេខ្មាស ត្រូវផ្តន្ទាទោស ដាក់ពន្ធនាគារពី ១ឆ្នាំទៅ ៣ឆ្នាំ និងពិន័យជាប្រាក់ពី ២លានរៀល ទៅ៦លានរៀល។
ម្យ៉ាងវិញទៀត យោងតាមច្បាប់ព្រហ្មទណ្ឌ ចំពោះបទមជ្ឍិម និងបទឧក្រិដ្ឋ បណ្តឹងអាជ្ញាមិនអាចរលត់ដោយសារការសម្របសម្រួល ឬការបង់ប្រាក់ពិន័យបានឡើយ វៀរលែងតែបទលហុ៕