Monday, December 10, 2018

ទ្រូងផ្លូវ “ស្តុបក្ដាន់២” ជាឧបសគ្គ​បង្ក​ឲ្យ​អ្នក​ដំណើរ​គ្រោះថ្នាក់ញឹកញ៉ាប់ ខណៈយប់មិញនេះ​ ជនជាតិចិន បើក​រថយន្ត​ LEXUS ទៅបុកលាន់ដូចរន្ទះ

អាម៉ាប៉ាប៉ាញ៉ូស

ភ្នំពេញៈ ក្បាលព្រួញពុះចែកទ្រូងផ្លូវ ដែល​ខាងមន្ទីរសាធារណការ​រាជធានីភ្នំពេញ​ បានដាក់នៅចំគន្លងរថយន្ត ប្រៀបដូចជាឧបសគ្គ​មួយ ដែលតែងតែ​បង្ក​ឲ្យ​អ្នក​ដំណើរ​គ្រោះថ្នាក់រងរបួសធ្ងន់ស្រាលជាបន្តបន្ទាប់គ្នា ​រហូត​ឈានដល់មានអ្នកស្លាប់បាត់​បង់ជីវិត​ទៀតក៏មានដែរ គឺនៅ​​​ត្រង់ចំណុចផ្លូវបំបែកជាបួន​ ស្តុបសួនច្បារក្ដាន់២​ ស្ថិតតាមបណ្ដោយផ្លូវសហព័ន្ធរុស្សី កែងផ្លូវR6 ស្ថិតក្នុងសង្កាត់ស្រះចក ខណ្ឌដូនពេញ​ រាជធានីភ្នំពេញ​ ព្រំប្រទល់​ជាប់នឹងខណ្ឌ៧មករា។

ជាក់ស្ដែង​ បុរសជនជាតិចិន២នាក់ ស្រវឹងស្រាជោគជាំ បើករថយន្តឡិចស៊ីសមួយគ្រឿង បោះពួយទៅបុកក្បាលនាគចែកទ្រូងផ្លូវបណ្តាលឲ្យបាក់អស់១កង់ រីឯរថយន្តដាច់កាឡេកង់ខាងមុខទៅលែងរួច កាលពីវលាម៉ោង១២យប់រំលងអធ្រាត្រ ឈានចូលថ្ងៃទី១០ ខែធ្នូ ឆ្នាំ២០១៨ ស្ថិតនៅចំណុចស្តុបក្តាន់ពីរ តាមបណ្តោយផ្លូវសហពន្ធ័រុស្ស៊ី ក្នុងសង្កាត់ស្រះចក ខណ្ឌដូនពេញ។

តាមប្រភពព័ត៌មានពីកន្លែងកើតហេតុ បានឲ្យដឹងថា មុនកើតហេតុ គេឃើញបុរសជនជាតិចិន ស្រវឹងស្រា២នាក់ បើករថយន្តឡិចស៊ីស RX-300 ពណ៌ទឹកប្រាក់ ពាក់ស្លាកលេខ ភ្នំពេញ 2L-5899 ធ្វើដំណើរទិសដៅពីកើតទៅលិចក្នុងល្បឿនលឿន លុះមកដល់ចំណុចកើតហេតុ ក៏រេចង្កូតទៅបុកក្បាលនាគចែកទ្រូងផ្លូវ បណ្តាលឲ្យបាក់អស់១កង់ ចំណែករថយន្តបង្កខូចខាតផ្នែកមុខកង់ខាងឆ្វេងដាច់កាឡេទៅមុខលែងរួច។

ក្រោយពេលកើតហេតុ សមត្ថកិច្ចមូលដ្ឋានប៉ុស្តិ៍នគរបាលស្រះចក បានចុះមកដល់កន្លែង និងទាក់ទងទៅសមត្ថកិច្ចជំនាញចរាចរណ៍ មកធ្វើការវាស់ និងយករថយន្តបង្កទៅរក្សាទុកនៅ ការិយាល័យចរាចរណ៍ រាជធានីភ្នំពេញ ដើម្បីរងចាំធ្វើការដោះស្រាយ​សងថ្លៃខូចខាតទ្រព្យសម្បត្តិរដ្ឋ​ តាមនីតិវិធីច្បាប់នៅពេលក្រោយ៕

@Amapapa.News

Feature Ads