Friday, December 28, 2018

បើក​រថយន្ត LEXUS បុករ៉ឺម៉កប៉ើងជិត១០ម៉ែត្រ ស្រាប់តែភ្ញាក់ផ្អើលមានជនឆ្លៀតឱកាស លួចយលុយជិត៤ម៉ឺនដុល្លារ

អាម៉ាប៉ាប៉ាញ៉ូស

ភ្នំពេញៈ ជនមិនស្គាល់មុខ​ ឆ្លៀតឱកាសបន្លំចូលទៅលួចរបស់របរនៅក្នុងរថយន្ត មានលុយជិត៤ម៉ឺនដុល្លារ​ ក្នុងកាបូប ត្រូវពួកអ្នកបន្លំនោះ យកចេញពីក្នុងរថយន្ត LEXUS ES300h​ ស៊េរីទំនើប ដែលបើកបរដោយ យុវជន៣នាក់ ទំនងជាស្រវឹងស្រា​ បោះពួយយ៉ាងលឿន ជ្រុលទៅបុកពីក្រោយរ៉ឺម៉កកង់បីកំពុងបណ្ដើរតាមផ្លូវពេញទំហឹង ប៉ើងជិត១០ម៉ែត្រក្រឡាប់ផ្ញារជើង និងបណ្ដាលឲ្យម្ចាស់រ៉ឺម៉កផ្លោងខ្ទាតទៅកណ្ដាលផ្លូវ​ រងរបួសធ្ងន់ រីឯរថយន្តបង្កនៅមិនទាន់អស់ល្បឿន បានហួសទៅមុខជិត២០ម៉ែត្រ​ទៀត​ទើបអែបឆ្វេងឈប់ ពេលនោះក៏លេចមុខក្រុមមិនស្គាល់មុខ​ នាំគ្នាយកដុំឥដ្ឋមក​គប់កម្ទេច​រថយន្ត​ បង្កឲ្យមានការភ្ញាក់ផ្អើលទាំងកណ្ដាលអធ្រាត្រ។

ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង០១៖៤០នាទី រំលងអធ្រាត្រ ឈានចូលថ្ងៃទី២៨ ខែធ្នូ​ ឆ្នាំ២០១៨ នៅត្រង់ចំណុចមុខក្រសួង​បរិស្ថាន​(ថ្មី) ស្ថិតតាមបណ្ដោយផ្លូវក្រសួងបរិស្ថានថ្មី ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ​។

សាក្សីដែលឃើញហេតុការណ៍ផ្ទាល់បានប្រាប់ភ្នាក់ងារ Cam Post (ខេមប៉ុស្តិ៍​)​ ដឹងថា នៅមុនពេលកើតហេតុ គេឃើញរថយន្តបង្កម៉ាក LEXUS ES300h​ ស៊េរីទំនើប ពណ៍ស​ (មិនមែនពាក់ស្លាកលេខ) បើកបរដោយ យុវជន៣នាក់ ទំនងជាស្រវឹងស្រា​ ព្រោះទើបចេញពីផឹកស៊ីនៅក្នុងហាងមួយកន្លែងនៅកោះពេជ្រ បានធ្វើដំណើរតាមផ្លូវក្រសួងបរិស្ថានថ្មី ទិសដៅពីត្បូងទៅជើង​ ក្នុងល្បឿនយ៉ាងលឿន លុះមកដល់ចំណុចកើតហេតុហួសក្រសួងបរិស្ថានបន្តិច ក៏ជ្រុលទៅបុកពីក្រោយរ៉ឺម៉កកង់បីមួយគ្រឿង ដែលម្ចាស់កំពុងបណ្ដើរតាមផ្លូវពេញទំហឹង ប៉ើងជិត១០ម៉ែត្រក្រឡាប់ផ្ញាជើង ដាច់កង់ម្ខាង​ និងបណ្ដាលឲ្យបុរសម្ចាស់រ៉ឺម៉កខ្ទាតទៅកណ្ដាលផ្លូវ​ រងរបួសធ្ងន់ដេកក្នុងថ្លុកឈាម ត្រូវបានរថយន្តគ្លីនិកឯកជន​ មហានគរ​ ដឹកយកទៅសង្គ្រោះភ្លាមៗផងដែរ រីឯរថយន្តបង្កនៅមិនទាន់អស់ល្បឿន បានហួសទៅមុខជិត២០ម៉ែត្រ​ទៀត​ទើបអែបឆ្វេងឈប់​ ។

សាក្សីបន្តថា ភ្លាមនោះបែរជាលេចមុខក្រុមមិនស្គាល់មុខ​ មិនដឹងថាមកពីកន្លែងណាខ្លះទេ​ បានយកដុំឥដ្ឋមក​គប់កម្ទេច​រថយន្ត​ មិនដឹងមូលហេតុ​អ្វីនោះទេ​ បណ្ដាលឲ្យរថយន្តរងការខូចខាតទាំងសងខាង​ និងបែកកញ្ចក់ផ្នែកខាងក្រោយ​ រួចជនទាំងនោះនាំគ្នាទាញអ្នកបើកបរ​ និងអ្នករួមដំណើរម្នាក់ទៀត ឲ្យចុះពីលើរថយន្តមកបម្រុងវាយ​ ទើបបង្កឲ្យមានការភ្ញាក់ផ្អើល​ឆោឡោ​ដល់អ្នកដែលនៅក្បែរនោះនាំគ្នាេត់មកចោមរោមមើល ទើបធ្វើឲ្យពួកគេមានការ​ភ័យខ្លាច​មានគេព្រួតវាយ ទើបរត់គេចចេញបាត់ទៅ ដោយបន្សុលទុកឲ្យយុវជនម្នាក់ដែលរួមដំណើរជិះពីក្រោយនៅតែម្នាក់ឯង បន្តិចក្រោយមក​ក៏មានកម្លាំងល្បាតប៉ុស្តិ៍ទន្លេបាសាក់ចុះមកកន្លែងកើតផងដែរ។

បុរសដែលជាអ្នករួមដំណើរជាមួយបានបញ្ជាក់ប្រាប់ក្រុមអ្នកយកព័ត៌មានថា ក្នុងអំឡុងពេលកំពុងមានការផ្អើល​ឆោឡោ​នោះ មុនសមត្ថកិច្ចមកដល់​ មានជនមិនស្គាល់មុខ​ ឆ្លៀតឱកាស បន្លំចូលលួចរបស់របរនៅក្នុងរថយន្តថែមទៀតផង លុយ៤ម៉ឺនដុល្លារ​ ក្នុងកាបូបដៃទុកក្នុងរថយន្ត ត្រូវបានពួកអ្នកបន្លំនោះ លួចយកចេញពីក្នុងរថយន្តគេចទៅណាបាត់​អស់ហើយ ទើបឃើញមានកម្លាំងល្បាតមកដល់តាមក្រោយ ។ តែមិនទាន់ដឹងថា​មានលុយជិត៤ម៉ឺនដុល្លារ​​ ទុកនៅក្នុងរថយន្តនោះទេ ទាល់តែម្ចាស់រថយន្តទាក់ទងមកប្រាប់វិញ ក៏ចូលទៅរកមើលដែរ តែមិនឃើញនោះទេ​ ។ នេះជាការលើកឡើងរបស់​យុវជនដែលរួមដំណើរជាប៉ុណ្ណោះ។

សាក្សីបន្តទៀតថា មួយសន្ទុះក្រោយមកមានមិត្តភក្តិរបស់ម្ចាស់រថយន្តប៉ុន្មាននាក់ទៀត បើករថយន្តLEXUS RX400h ពណ៍ស​ មួយគ្រឿងទៀត​ ពាក់ស្លាកលេខភ្នំពេញ​ 2AK-8908 មកដល់កន្លែងកើតហេតុដែរ​ ហើយបាននាំគ្នាចូលទៅជួយរកមើល​ ក៏មិនឃើញដូចគ្នា​ ទើបយុវជនម្នាក់ដែលរួមដំណើរជាមួយនោះ​ ប្រាប់ឲ្យប្រមូលឯកសារ និងរបស់របរផ្សេងៗទៀត​ពីក្នុងរថយន្តបង្ក យកចេញមកដាក់​ក្នុងរថយន្ត រួចនាំគ្នាឡើងរថយន្តបើកចេញពីកន្លែងកើតហេតុបាត់ទៅ។

ក្រោយកើតហេតុកម្លាំងសមត្ថកិច្ចដែលនៅកន្លែងកើតហេតុ បានរាយការណ៍​ប្រាប់សមត្ថកិច្ចផ្នែកចរាចរណ៍​ខណ្ឌចំការមន​ ឲ្យចុះមកពិនិត្យមើលជាក់ស្ដែង​ ហើយបានទាក់ទងទៅកាន់សមត្ថកិច្ចជំនាញឲ្យមកវាស់វែង និងស្ទូចយករថយន្តបង្ក និង​រ៉ឺម៉ក​កង់បី ទៅរក្សាទុកបណ្ដោះអាសន្ន នៅការិយាល័យចរាចរណ៍ជើងគោក នៃស្នងការដ្ឋាននគរបាល រាជធានីភ្នំពេញ ដើម្បីរងចាំដោះស្រាយតាមផ្លូវច្បាប់។

ចំណែកឯបុរសដែលរួមដំណើរជាមួយ​ដែលប្រាប់ថា បាត់លុយជិត៤ម៉ឺនដុល្លារ​ ក្នុងកាបូប​ដៃ​ ទុកក្នុងរថយន្ត ក្នុងអំឡុងពេលកំពុងមានការផ្អើល​ឆោឡោ​ មុនសមត្ថកិច្ចមកដល់​នោះ​ គឺមិនទាន់ឃើញទៅដាក់ពាក្យបណ្ដឹងឲ្យ​សមត្ថកិច្ច​ស្រាវជ្រាវ​តាមបណ្ដឹងនៅឡើយទេ​។

យ៉ាងណាមិញ​បើសិនជាពិតមែន! យើងសង្ឃឹមថា សមត្ថកិច្ច និងចាប់ខ្លួនបក្ខពួកជនឆ្លៀតឱកាសទាំងនោះយកមកផ្តន់ទាទោសតាមផ្លូវច្បាប់ កុំឲ្យបន្ត​ប្រព្រឹត្ត​អំពើ​បែបនេះតទៅទៀត៕

@Amapapa.News

Feature Ads