ភ្នំពេញៈ ពិតជាសំណាងណាស់! បុរសម្នាក់ មិនដឹងផឹកស្រវឹងមកពីណា បានបើករថយន្តស៊េរីទំនើប Audi Q5 មកដល់ពាក់កណ្តាលផ្លូវដេកលង់លក់ក្នុងរថយន្ត តែជើងនៅជាន់ហ្គែជាប់ ធ្វើរថយន្តបន្តបើកទៅមុខតិចៗ រហូតជ្រុលទៅបុកចូលកន្លែងលក់ងាវលើចិញ្ចើមផ្លូវ ប៉ើងខ្ទាតរាយបាយពេញដី និងបុកម៉ូតូមួយគ្រឿងទៀតកល់ជាប់ទៅមុខលែងរួច បណ្តាលឲ្យខូចខាតយ៉ាងដំណំ បង្កការភ្ញាក់ផ្អើលដល់អ្នកជិតខាង និងអ្នកដំណើរចោមរោមមើលយ៉ាងណែនណាន់តាន់តាប់ រហូតមានសមត្ថកិច្ចចុះមកអន្តរាគមន៍ផងដែរ។
គ្រោះថ្នាក់ចរាចរណ៍នេះ បានកើតឡើងកាលពីនៅវេលាម៉ោង១០យប់ ថ្ងៃពុធ ទី២ ខែមករា ឆ្នាំ២០១៩ នៅចំណុចកន្លែងលក់ងាវតាមចិញ្ចើមផ្លូវមួយ ខាងមុខហាងបោះពុម្ពនិងថតចម្លង ម្ដុំច្រមុះជ្រូកក្បាលថ្នល់ ស្ថិតនៅតាមបណ្ដោយផ្លូវព្រះមុនីវង្ស ជាប់ផ្លូវ២៧១ ភូមិ៧ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
យោងតាមសម្ដីបងប្រុសម្នាក់ ដែលជាអ្នកឃើញហេតុការណ៍ផ្ទាល់ បានរៀបរាប់ប្រាប់ភ្នាក់ងារខេមប៉ុស្តិ៍ថា ដំបូងឡើយគាត់ឃើញ រថយន្តស៊េរីទំនើបមួយគ្រឿង ម៉ាក Audi Q5 ពណ៌ស ពាក់ស្លាកលេខភ្នំពេញ 2AH-8186 បើកបរដោយបុរសម្នាក់ មិនដឹងថា ផឹកស្រវឹងមកពីណា បានបើកមកពីក្រោយគាត់សន្សឹមៗ ក្នុងទិសដៅពីលិចទៅកើត តាមបណ្ដោយផ្លូវ២៧១ លុះមកដល់ស្តុបផ្លូវ៦០ម៉ែត្រ ស្រាប់តែគាត់ងាកមើល ឃើញដេកលង់លក់ក្នុងរថយន្តបាត់ហើយ ហើយគាត់ខំគោះកញ្ចក់រថយន្តដែរ តែមិនងើបទេ រីឯជើងនៅជាន់ហ្គែជាប់ ធ្វើឲ្យចេះតែបន្តដំណើរទៅមុខសន្សឹមៗដដែល រួចប៉ះបញ្ច្រិតគូទរថយន្តកូរ៉េមួយគ្រឿង ដែលបត់ទៅផ្លូវ៦០ម៉ែត្រ ហើយរថយន្តនៅតែទៅមុខតិចៗទៀត ទើបគាត់ជិះទៅប្រាប់អ្នកនៅខាងមុខឲ្យបានដឹង បន្តិចក្រោយមករថយន្តក៏ជ្រុលទៅបុកចូលកន្លែងលក់ងាវ នៅចិញ្ចើមផ្លូវកើតហេតុខាងលើ បណ្ដាលឲ្យប៉ើងខ្ទាតតុដាក់លក់ងាវ រាយបាយពេញដី និងបុកម៉ូតូ Honda Dream ពណ៌ខ្មៅ មួយគ្រឿងទៀត ស្លាកលេខភ្នំពេញ 1BQ-1020 បណ្ដាលឲ្យដួលកល់ជាប់ពីក្រោមរថយន្តផ្នែកខាងមុខ ទើបរថយន្តទៅមុខលែងរួច ធ្វើឲ្យបងប្អូនដែលជាអ្នកលក់ដូររត់គេចចេញកន្លែងកើតហេតុនោះ នាំគ្នាខឹងសម្បារ ស្រែកឆោឡោឡើង បង្កការភ្ញាក់ផ្អើលដល់អ្នកជិតខាងនាំគ្នាចេញមក គោះកញ្ចក់រថយន្ត ដាស់ម្ចាស់រថយន្តឲ្យចេះមកអង្គុយកៅអីសិន ដោយមិនមានការប្រើអំពើហិង្សាលើម្ចាស់រថយន្តឡើយ រួចរាយការណ៍ប្រាប់កម្លាំងល្បាតប៉ុស្តិ៍នគរបាលចាក់អង្រែលើ ឲ្យចុះមកដល់កន្លែងកើតហេតុភ្លាមៗផងដែរ។
ក្រោយកើតហេតុសមត្ថកិច្ចនគរបាលផ្នែកវាស់វែងនៃអធិការដ្ឋាននគរបាលខណ្ឌមានជ័យ ក៏បានចុះមកកន្លែងកើតហេតុ រួចឲ្យភាគីទាំងសងខាងធ្វើការសម្របសម្រួលគ្នាមួយជំហានសិន ដោយបងប្អូនម្ចាស់រថយន្តមកដល់កន្លែងកើតហេតុផងដែរ តែការដោះស្រាយនៅមិនទាន់ត្រូវគ្នា ទើបបង្កឲ្យមានការភ្ញាក់ដល់អ្នកដំណើរឆ្លងកាត់ចុះមកចោមរោមមើលយ៉ាងណែនណាន់តាន់តាប់ ពេញកន្លែងកើតហេតុផងដែរ។
បើតាមសម្ដីបងប្អូនអ្នកលក់ដូរនៅកន្លែងកើតហេតុបានប្រាប់ខេមប៉ុស្តិ៍ដែរថា ពួកគាត់ពិតជាសំណាងហើយ ដែលមិនបង្កអោយមានអ្នកណាម្នាក់រងរបួស ព្រោះមានគេស្រែកប្រាប់បន្តគ្នា ទើបពួកគាត់ជាអ្នកលក់ដូរនៅម្ដុំនោះ នាំគ្នារត់គេចចេញទាន់ពេល កុំអីមិនដឹងជាយ៉ាងណានោះទេ នេះហើយជាលទ្ធផលអ្នកដែលស្រវឹងហើយដេក ក្នុងរថយន្ត ដូច្នោះប្រជាពលរដ្ឋក៏សូមសំណូមពរឲ្យសមត្ថកិច្ចធ្វើការទៅផ្លូវច្បាប់ កុំឲ្យតែអាងអីដោះស្រាយសំណងលើការខូចខាត តែចំណាត់ការផ្លូវច្បាប់ មិនព្រមអនុវត្តទៅលើអ្នកដែលបើកបរក្នុងស្ថានភាពស្រវឹង និងអ្នកផឹកស្រវឹងហើយ រហូតទាល់តែដេកក្នុងរថយន្តបែបនេះ ដែលងាយនឹងបង្កឲ្យមានគ្រោះថ្នាក់ដល់គេឯង ដែលមិនដឹងអីសោះ ។
យ៉ាងណាមិញនៅតែមិនមានចំណាត់ការផ្លូវច្បាប់ចំពោះអ្នកដែលបើកបរ ក្នុងស្ថានភាពស្រវឹងដដែល ព្រោះក្រោយកើតហេតុកម្លាំងល្បាតប៉ុស្តិ៍ចាក់អង្រែលើ និងសមត្ថកិច្ចផ្នែកវាស់វែងខណ្ឌមានជ័យ បានតែជួយអន្តរាគមន៍ជាក់ស្ដែង ព្រោះភាគីខាងរថយន្តមានអ្នកអន្តរាគមន៍ សុំសម្របសម្រួលជាមួយខាងម្ចាស់ម៉ូតូ និងអ្នកលក់ងៀវរងគ្រោះទាំងនោះ ដោយយល់ព្រមចេញសំណងលើការខូចខាត ទៅឲ្យខាងភាគីម៉ូតូចំនួន៨០០ដុល្លារ និងអ្នកលក់ងៀវ ចំនួន៤០០ដុល្លារ ដើម្បីបញ្ចប់រឿង រួចក៏ឡើងបើករថយន្តបង្កនោះ ដឹកបុរសម្ចាស់រថយន្តដែលស្រវឹងនោះ ចេញពីកន្លែងកើតហេតុតែម្ដង៕