ភ្នំពេញៈ ក្រុមចោរឆក់អាជីព២នាក់ មិនដឹងអស់លក្ខណ៍ត្រឹមនេះឬយ៉ាងណា ក្រោយពីត្រូវសមត្ថកិច្ចឃាត់ខ្លួន ព្រោះឆក់ទូរស័ព្ទបរទេសកំពុងជិះកង់បីមិនសម្រេច។ ហេតុការណ៍នេះ បានកើតឡើងនៅវេលាម៉ោង៩៖១៩នាទីយប់ ថ្ងៃទី២៦ ខែមករា ឆ្នាំ២០១៩ ត្រង់ចំណុចមុខផ្ទះលេខ៥៣ ផ្លូវ១៨៤ កែងផ្លូវ៦៣(ត្រសក់ផ្អែម) ស្ថិតក្នុងភូមិ១២ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។
របាយការណ៍របស់នគរបាលខណ្ឌដូនពេញ បានឲ្យដឹងថា ជនសង្ស័យ២នាក់ ជិះម៉ូតូ១គ្រឿងម៉ាក ហុងដា BEAT ពណ៌ខៀវលាយស បានធ្វើសកម្មភាពឆក់ទូរស័ព្ទពុំបានសម្រេចពីជនបរទេសម្នាក់ ភេទស្រី អាយុប្រហែល៤០ឆ្នាំ ដែលកំពុងធ្វើដំណើរតាមរ៉ឺម៉កកង់បី តាមបណ្ដាយផ្លូវលេខ៦៣ ពីត្បូងទៅជើង មកដល់កន្លែងកើតហេតុខាងលើ ជនសង្ស័យក៏ធ្វើសកម្មភាពឆក់ ហើយជនរងគ្រោះ ព្រមជាមួយប្រជាពលរដ្ឋ បានស្រែកឆោឡោ។ ភ្លាមនោះ កម្លាំងរបស់ខណ្ឌ ប៉ុស្ដិ៍ ដែលកំពុងឈរជើងតាមបណ្តាគោលដិ នឹងល្បាតទទួលបានព័ត៌មាន ក៏បានចេញអន្តរាគមន៍ប្រដេញចាប់ ដោយបង្ក្រាប និងឃាត់បានម្នាក់ យកមកប៉ុស្តិ៍ ដើម្បីធ្វើការសាកសួរ។ ដោយឡែកបក្ខពួកម្នាក់ទៀត បានលោតប្រាស់គេចខ្លួនបាត់។
ឆ្លងតាមវិធានការជំនាញសួរចម្លើយ ជនសង្ស័យខាងលើ គឺជាមុខសញ្ញាឆក់សកម្មជាប្រចាំថ្ងៃ (ឆក់អាជីព) តាមបណ្តាខណ្ឌ ក្នុងរាជធានីភ្នំពេញ និងបានធ្វើសកម្មភាពឆក់បានសម្រេចច្រើនដងលើជនបរទេសគ្រប់ជាតិសាសន៍។ ដើម្បីរំលត់នូវសភាពការណ៍ឆក់នេះ អធិការដ្ឋានបានពន្លាតដែនសមត្ថកិច្ចស្រាវជ្រាវជ្រាវ និងតាមច្បាមបន្តយកបក្ខពួក ដែលបានរត់គេចខ្លួនម្នាក់ទៀត ដល់ខណ្ឌចំការមន និងឈានដល់បង្ក្រាបឃាត់ខ្លួននៅវេលាម៉ោង១១៖៣០នាទីយប់ថ្ងៃដដែល។
ជាលទ្ធផលនៃប្រតិបត្តិការនេះ សមត្ថកិច្ចបានធ្វើការឃាត់ខ្លួនជនសង្ស័យចំនួន២នាក់ រួមមាន ១.ឈ្មោះ ពៅ ដារ៉ាវិត ភេទប្រុស អាយុ១៦ឆ្នាំ មុខរបរសិស្សវិទ្យាល័យព្រះស៊ីសុវត្ថិ ស្នាក់នៅផ្ទះលេខគ្មានលេខ ភូមិបឹងប្រលឹត សង្កាត់ព្រ ខណ្ឌច្បារអំពៅ និង២.ឈ្មោះ យឹម សំណាង ភេទប្រុស អាយុ១៧ឆ្នាំ មុខរបរសិស្ស ស្នាក់នៅផ្ទះលេខ១២ ផ្លូវសុធារស សង្កាត់ទន្លេរបាសាក់ ខណ្ឌចំការមន។ ចំណែកវត្តុតាងចាប់យក មានម៉ូតូ១គ្រឿងម៉ាក ហុងដា Beat ពណ៌ខៀវលាយស ពាក់ស្លាកលេខ ភំ្នពេញ 1HG 7595។
បច្ចុប្បន្ន អធិការដ្ឋាននគរបាលខណ្ឌដូនពេញ បន្តប្រើប្រាស់វិធានការជំនាញ សួរចម្លើយរកបក្ខពួកនៅសេសសល់ និងប្រវត្តិសកម្មភាពកន្លងមក ព្រមទាំងកសាងសំណុំរឿងបញ្ជូនទៅសាលាដំបូងរាជធានី ដើម្បីអនុវត្តន៍តាមច្បាប់៕
