Sunday, January 27, 2019

រថយន្ត៣គ្រឿង ព្រលះគ្នាទាំងព្រលឹមអុរ នៅលើកំណាត់ផ្លូវជាតិលេខ៤ ខ្ទេចទាំង៣...

កំពង់ស្ពឺៈ រថយន្ត៣គ្រឿង មានទាំងឡិចស៊ីស និងរថយន្តបែន បានបោលបុកគ្នាយ៉ាងពេញទំហឹង បណ្ដាលឲ្យខូចខាតយ៉ាងដំណំទាំង៣គ្រឿង នៅលើកំណាត់ផ្លូវជាតិលេខ៤ ចន្លោះគីឡូម៉ែត្រលេខ៣៣ និង៣៤ ចំណុចភូមិធ្លក ឃុំត្រពាំងគង ស្រុកសំរោងទង ខេត្តកំពង់ស្ពឺ កាលពីវេលាម៉ោង៦៖៣០នាទីព្រឹក ថ្ងៃទី២៧​ ខែមករា ឆ្នាំ២០១៩។ គ្រោះថ្នាក់នេះ បង្កឡើងដោយរថ​យន្ត ហ៊ីណូ ប្រភេទបែន ពណ៌ត្រួយចេក ពាក់ផ្លាកលេខ ចង្កូតស្តាំ PP.2630 អ្នកបើ​កបរ​មិនស្គាល់អត្តសញ្ញាណ(ចុះរត់គេចខ្លួន​បាត់)។

អ្នកឃើញហេតុការណ៍ដំបូង បានឲ្យដឹងថា គេឃើញ​រថយន្ត​បែនខាងលើ បើកបរទិសដៅពីលិចទៅកើត លុះម​ក​ដល់ចំណុចខាងលើបានបុកជាមួយរថយន្ត១​គ្រឿង​ម៉ាក ​Lexus RX330 ពណ៌​ស ពាក់ស្លាកលេខ ភ្នំពេញ AJ-1339 បើកបរ​ដោយឈ្មោះ ជា សុភ័ក្ត្រ ភេទប្រុស អាយុ២៦ឆ្នាំ រស់នៅផ្ទះលេខ១៣៥ ភូមិតាព្រហ្ម សង្កាត់ព្រែកឯង ខណ្ឌ​មាន​ជ័យ រាជធានី​ភ្នំពេញ បើកបរបញ្រ្ចាសទិសគ្នា។

ប្រភពបន្តថា ស្រប​ពេល​ជាមួយគ្នានោះ ក៏មានរថយន្ត១គ្រឿងទៀតម៉ាក​ ហ៊ីយ៉ាន់ដាយ (ប្រភេទបែន) ពណ៌ស​ ពាក់ស្លាកលេ​ខ ​ភ្នំពេញ 3D-1489 (អ្នកបើកបរមិនស្គាល់​អត្តសញ្ញាណ ព្រោះរត់គេចខ្លួនបាត់)​ បើកបរពីទិសខា​ងលិ​ចទៅកើតស្របគ្នា ជាមួយ​រថយន្ត Le​xus បានមកដ​ល់ចំណុចកើតហេតុខាងលើ ដោយគេចគ្រោះថ្នាក់ ក៏ផ្ទេ​កខ្លួនក្រឡាប់ដោយខ្លួនឯងតែម្ដង​(បាត់ម្ចាស់​ការ​)។

បើតាមសមត្ថកិច្ច​ហេតុការណ៍​គ្រោះថ្នាក់​ចរាចរណ៍​ខាងលើ ​ប​ណ្តាលឲ្យអ្នកបើករថយន្ត ឡិចស៊ីស ​រងរបួសស្រា​ល​ ហើយបានបញ្ជូនទៅព្យាបាលរបួសនៅពេទ្យសម្ភពថ្នល់ទទឹង។ ចំណែក​រថយន្ត​ខូចខាត​ផ្នែក​មុខ​ស្ទើរ​ទាំ​ង​ស្រុង ខណៈរថយន្តប្រភេទបែនទាំង២​គ្រឿង ខូចខាត​កម្រិតស្រាល​។

បច្ចុប្បន្ន​មធ្យោបាយ​បង្ក​ (រ​ថយន្ត​បែន​)​ សរុប​ទាំង​៣​គ្រឿង យក​ម​ក​រក្សាទុ​កនៅអធិការដ្ឋាននគរបាលស្រុកសំរោង​ទង ប​ណ្ដោះអាសន្ន​ ដើម្បីកសាងសំណុំរឿង​បញ្ជូន​ទៅជំនា​ញការិយាល័យចរាចរណ៍ខេត្ដ​ ចាត់ការតាមនីតិវិធី​ច្បាប់៕

Feature Ads