Monday, January 7, 2019

រថយន្តមិនចាំម៉ាក បើក​បុកបុរស២នាក់​ ​ស្លាប់១​ របួស១ ឡាន​ដឹក​សពទៅ​ទុកចោល នៅវត្តតាំងកសាងខាងត្បូង

ភ្នំពេញៈ រថយន្ត​មិនចាំម៉ាក​មួយគ្រឿង បើ​កបុកម៉ូតូ​ជិះឌុបគ្នា២នាក់ បណ្ដាលឲ្យ​បុរស​ម្នាក់​ស្លាប់​ ​ម្នាក់ទៀត​រងរបួស​ធ្ងន់​ ​នៅលើ​កំណាត់​ផ្លូវជាតិ​លេខ​១ ​ក្នុងភូមិ​ទួល​អំពិល ​សង្កាត់​ក្បាលកោះ ​ខណ្ឌ​ច្បារអំពៅ​​ កាលពី​វេលាម៉ោង​១២:០៥នាទី​រំលងអធ្រាត្រ​ឈាន ចូល​ថ្ងៃចន្ទ​ ទី​៧ ​ខែមករា ​ឆ្នាំ​២០១៩។

ជនរងគ្រោះ​ ដែល​ស្លាប់ ​និង​អ្នករបួស​ មិន​ត្រូវបាន​ស្គាល់​អត្តសញ្ញាណ​ទ្បើយ​។

តាមប្រភពព័ត៌មានពីប្រជាពលរដ្ឋម្នាក់ បានប្រាប់ឲ្យដឹងថា ដំបូងឡើយគេឃើញម៉ូតូឌ្រីមសង់ ពណ៌ខ្មៅ ពាក់ស្លាកលេខភ្នំពេញ 1AG-4430 ជិះគ្នា២នាក់ តាមបណ្ដោយផ្លូវជាតិលេខ១ ទិសដៅពីលិចទៅកើតក្នុងល្បឿនយ៉ាងលឿន ខណៈមកដល់ចំណុចកើតហេតុខាងលើ ក៏រេចង្កូតមកឆ្វេងដៃបុកជាមួយនឹងរថយន្តមិនស្គាល់ម៉ាកមួយគ្រឿង ដែលបើកតាមបណ្តោយផ្លូវជាតិលេខ១ ទិសដៅពីកើតទៅលិច បញ្រ្ចាសទិសគ្នា បណ្ដាលឲ្យបុរសម្នាក់ជាអ្នកបើក បែកក្បាលស្លាប់ភ្លាមៗនៅនឹងកន្លែងកើតហេតុ និងម្នាក់ទៀត ដែលជិះពីក្រោយរងរបួសធ្ងន់ ត្រូវបានរថយន្តសង្គ្រោះដឹកយកទៅសង្គ្រោះភ្លាមៗផងដែរ។ ចំណែកម៉ូតូរបស់ជនរងគ្រោះរងការខូចខាតផ្នែកខាងមុខឡើងរួញ និងដាច់-ក ម៉ូតូ ឯរថយន្តបានបើករត់បាត់ស្រមោល។

ក្រោយកើតហេតុសមត្ថកិច្ច មូលដ្ឋានចុះមកដល់កន្លែងកើតហេតុ ហើយក៏បានទំនាក់ទំនងទៅសមត្ថកិច្ចជំនាញផ្នែកវាស់វែងចរាចរណ៏ ខណ្ឌច្បារអំពៅ មកវាស់វែងយកម៉ូតូទៅរក្សាទុក និងអោយរថយន្តដឹកសព (អត់មានឈ្មោះ)​ ដឹកយកទៅតម្កល់ទុកនៅវត្តទឹកថ្លា ដើម្បីរង់ចាំស្រាវជ្រាវរកសាច់ញាតិមកទទួលយកធ្វើបុណ្យតាមប្រពៃណី។

លុះមកដល់វេលាម៉ោង៩ព្រឹក​ថ្ងៃទី៧ មករា ឆ្នាំ២០១៩នេះ នៅវត្តតាំងកសាងខាងត្បូង​ ស្ថិតក្នុងភូមិចំការឪឡឹក២​ សង្កាត់កាកាបទី២​ ខណ្ឌពោធិ៍សែនជ័យ រាជធានីភ្នំពេញ មានការភ្ញាក់ផ្អើល​មួយ​ បន្ទាប់​ពីប្រទះឃើ​ញរថយន្ត​ដឹកសពមួយគ្រឿង (មិនមានស្លាកសម្គាល់)​ បានដឹកសពបុរសម្នាក់​ មកចតទុកចោល និងមិនឃើ​ញតៃកុងរថយន្តដឹកសពនោះ​ទេ ទើបអ្នកដែលប្រទះឃើ​ញ​ប្រញាប់រាយការណ៍​ប្រាប់សមត្ថកិច្ចចុះមក​ត្រួតពិនិត្យ​មើលតែម្ដង៕

Feature Ads