កំពង់ឆ្នាំងៈ ក្រោយពីមានសេចក្តីរាយការណ៍ថា ល្បែងស៊ីសងគ្រប់ប្រភេទ ក្នុងស្រុកសាមគ្គីមានជ័យ ជាប់នឹងព្រំប្រទល់ស្រុកឧុដង្គ ខេត្តកំពង់ស្ពឺ ខណ្ឌដោយស្ទឹង នារសៀលថ្ងៃទី២២ ខែមករា ឆ្នាំ២០១៩ ម្សិលមិញ កម្លាំងសមត្ថកិច្ចស្រុកសាមគ្គីមានជ័យ បានបើកកិច្ចប្រតិបត្តិការ ចុះបង្ក្រាប រុះរើ និងដុតកម្ទេចចោល សង្វៀនបញ្ជល់មាន់ដ៏ធំមួយកន្លែង ដែលមានបង្កប់ ជាមួយនិងល្បែងវង់បៀ អាប៉ោង ស្ថិតក្នុងឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។
សេចក្តីរាយការណ៍ បានឲ្យដឹងទៀតថា ការបង្ក្រាបកន្លែងជល់មាន់ រួមជាមួយនិងវង់ល្បែងស៊ីសងអាប៉ោង បៀ ខាងលើនេះ ដឹកនាំកម្លាំង និងបញ្ជាផ្ទាល់ពីលោក វ័ន្នស៊ីផា អភិបាលស្រុកសាមគ្គីមានជ័យ និងកម្លាំងជំនាញស្រុកជាច្រើនរូប ចូលរួមផងដែរ។
ក្នុងប្រតិបត្តិការខាលើនេះ សមត្ថកិច្ចមិនបានការឃាត់ខ្លួនអ្នកលេងល្បែងស៊ីសងទាំងនោះទេ ដោយសារពេលសមត្ថកិច្ចឆ្លងស្ទឹង មានអ្នកមើលផ្លូវ ហើយនៅពេលមកដល់ពួកអ្នកញៀនល្បែងបានរត់អស់ទៅហើយ។
សូមបញ្ជាក់ផងដែរថា កន្លែងលេងល្បែងខាងលើនេះ គេលេងនៅថ្ងៃសៅរ និងថ្ងៃអាទិត្យ ដែលជាថ្ងៃលេងធំៗ ហើយកន្លែងមួយនេះ ក៏ធ្លាប់ត្រូវបានសមត្ថកិច្ចធ្វើការបង្ក្រាបជាច្រើនលើកច្រើនសារមកហើយ តែងតែបែកការរហូត ដោយសារសមត្ថកិច្ចមានការពិបាកក្នុងការបង្ក្រាប ព្រោះត្រូវឆ្លងចូលតាមទឹកដីស្រុកឧដ្តុង និងឆ្លងស្ពានកាត់ស្ទឹង ទម្រាំពេលសមត្ថកិច្ចទៅដល់ ក្រុមអ្នកញៀនល្បែងរត់អស់៕
