Tuesday, January 15, 2019

ផ្អើលស្រុកកណ្ដាលស្ទឹង! ស្ត្រី​​ម្នាក់​ ត្រូវចោរ​សម្លាប់​ ប្លន់​យក​ទ្រព្យ​សម្បត្តិ​​ អស់​ជិត​៤ម៉ឺន​ដុល្លារ

កណ្ដាលៈ ស្ត្រី​អាយុ​៥៦ឆ្នាំ​ម្នាក់​ ត្រូវ​ចោរដៃ​ឆៅ​​ ប្លន់​សម្លាប់​យក​ទ្រព្យ​សម្បត្តិ ​អស់​ជិត៤ម៉ឺន​ដុល្លារ​។ ហេតុការណ៍​នេះ ​បាន​បង្ក​ឲ្យ​មាន​ការ​ភ្ញាក់​ផ្អើល​យ៉ាង​ខ្លាំង​កាល​ពី​វេលាម៉ោង​៥ល្ងាច​ថ្ងៃ​ទី​១៤ ខែ​មករា ​ឆ្នាំ​២០១៩ ​ស្ថិត​នៅ​ភូមិ​បឹង​ ឃុំ​រកា​ ស្រុក​កណ្ដាល​ស្ទឹង​ ខេត្ត​កណ្ដាល​។

​ស្ត្រី​រងគ្រោះ​ឈ្មោះ​ ឈុន​ ទូ​ អាយុ​៥៦ឆ្នាំ​ មុខរបរ​ មេផ្ទះ​ មាន​ស្រុក​កំណើត​ស្ថិត​នៅ​ឃុំ​ស្រៃ​អំបិល​ ស្រុក​បុទុមសាគរ​ ខេត្ត​កោះកុង​។ បច្ចុប្បន្ន​ស្នាក់​នៅ​ភូមិ​បឹង​ ​ឃុំ​រកា​ ស្រុក​កណ្ដាល​ស្ទឹង ​ខេត្ត​កណ្ដាល​។

សម្ភាដែល​​បាត់បង់​រួម​មាន​៖ លុយ​ដុល្លារ​ចំនួន​ ៣០០០០ដុល្លារ​, លុយ​ខ្មែរ​ចំនួន​២លាន​រៀល​​, ខ្សែ​ក​មាស​ ២តម្លឹង​, ចិញ្ចៀន​មាស​ ៥ជី​, ខ្សែ​ដៃ​មាស​ ៥ជី​។

តាម​សម្ដី​របស់​ក្រុម​គ្រួសារ​ បាន​ប្រាប់​ឲ្យ​ដឹង​ថា​ មុន​ពេល​កើតហេតុ ​ប្ដី​របស់​គាត់​បាន​ត្រឡប់​មក​ពី​ធ្វើ​ការ​វិញ ​ស្រាប់​តែ​អត់​ឃើញ​ប្រពន្ធ​របស់​គាត់​ ភ្លាម​ៗ​នោះ​គាត់​បាន​ហៅ​ពី​រ​ទៅ​បី​ដង​តែ​អត់​តប​វិញ​សោះ​ ហើយ​ទ្វារ​ផ្ទះ​បើក​ចំហទៀត​។ គាត់(​ប្ដី)​ ក៏​មិន​ចាំ​អារម្មណ៍​ដែរ​ ហើយ​គាត់​បាន​ចូល​ទៅ​ក្នុង​ផ្ទះ​ ដើម្បី​ទុក​សម្ភារៈ​មួយ​ចំនួន ​រួច​ក៏​ដើ​រ​ចេញ​មក​វិញ ​ដើម្បី​ទៅ​កាត់​សក់ ​តែ​ពេល​ទៅ​ដល់​ផ្ទះ​ជាង​ ជាង​ថា​រវល់​ ភ្លាមៗ​នោះ​គាត់​បាន​ធ្វើ​ដំណើរ​​​ត្រឡប់​មក​ផ្ទះ​វិញ ​គាត់​បាន​ស្រែក​ហៅ​ប្រពន្ធ​​ម្ដង​ទៀត ​តែ​នៅ​តែ​មិន​ឃើញ ​ក៏​បាន​ដើរ​រក​ជុំ​វិញ​ផ្ទះ​នៅ​តែ​អត់​ឃើញ​ ហើយ​ទ្វារ​ផ្ទះ​នៅ​តែ​ចំហដ​ដែល។

​ក្រុម​គ្រួសារ​ បានបន្តថា មួយ​សន្ទុះ​ក្រោយ​មក​គាត់​បាន​ដើ​រ​ចូល​ទៅ​ក្នុង​ផ្ទះ​ ហើយ​បើ​ក​ទ្វារ​បន្ទប់​​ដើរ​ចូល ​ស្រាប់​តែ​ឃើញ​ប្រពន្ធ​របស់​គាត់​បាន​ដេក​ស្លាប់​នៅ​ពីមុខ​ទូលុយ​យ៉ាង​អាណោចអាធ័ម​ ភ្លាមៗ​នោះ​គាត់​បាន​ស្រែក​ឆោឡោ​ឲ្យ​អ្នក​ជិត​ខាង​​ជួយប្រពន្ធ​គាត់​​ផង ​ព្រោះ​​ប្រពន្ធ​របស់​គាត់​បាន​​បាត់បង់​បាត់​ទៅ​ហើយ​ ចំណែក​ឯ​ទូ​ដាក់​លុយ ​និងគ្រឿង​អលង្ការ​មួយ​ចំនួន​ ត្រូវ​បាន​បាត់​បង់​គ្មាន​សល់​ឡើយ​។

ក្រោយកើតហេតុសមត្ថកិច្ចមូលដ្ឋាន បានចុះមកដល់កន្លែងកើត​ហេតុ​រួចបាន​ធ្វើ​ការ​ទាក់ទង​ទៅ​សមត្ថកិច្ច​ជំនាញ ​ដើ​ម្បី​ចុះមកធ្វើកោសល្យវិច័យ​នឹងប្រគល់​សាក​សព​ទៅ​ឲ្យ​​ក្រុម​គ្រួសារ​​យកទៅធ្វើបុណ្យតាមប្រពៃណី។ ចំណែកជនសង្ស័យសមត្ថកិច្ច​កំពុង​តែ​ធ្វើការស្រាវជ្រាវនិងតាមចាប់ខ្លួនយកមក​ផ្ដន្ទាទោស​ទៅតាមផ្លូវច្បាប់៕

Feature Ads