Friday, January 4, 2019

ស្ដែងណាស់​! កាមរីឆ្លាម ពន្លះកុងតឺន័រ គាបជាប់មនុស្ស២នាក់ ក្នុងកាប៊ីន​ ហើយរលំទូកុងតឺន័រ​ សង្កត់លើ​តូបលក់ទឹកអំពៅ ​មុខផ្សារគគីរថែមទៀត

កណ្ដាលៈ ​បុរស២នាក់ បានរងរបួសធ្ងន់​ ដោយ​គាបជាប់ក្នុងកាប៊ីនរថយន្ត ក្នុងហេតុការណ៍គ្រោះថ្នាក់ចរាចរណ៍រវាងរថយន្តកាមរីឆ្លាមមួយគ្រឿង បើ​កទៅបុកបញ្ឆិត​ពីមុខរថយន្តកុងតឺន័រមួយគ្រឿងទៀតពេញទំហឹង បណ្ដាលឲ្យរថយន្តឆ្លាម​រួញជាប់កាប៊ីនមុខ ខ្ទេចផ្នែកខាងមុខស្ទើរទាំងស្រុង ចំណែ​ករថយន្តកុងតឺន័របានផ្ទុះកង់ក្រោយខាងឆ្វេងចំនួន៣ និងដាច់កង់ចេញពីរថយន្តអស់១ ខ្ទាតនៅក្បែរកន្លែងកើ​តហេតុ រីឯ​ទូកុងតឺន័រផ្ទុកខ្លាញ់ត្រី រលំធ្លាក់ទៅចំកន្លែងលក់ទឹកអំពៅ​ ហូរហៀរ​ខ្លាញ់ត្រីពេញផ្លូវ។

គ្រោះថ្នាក់ចរាចរណ៍ដ៏សាហាវនេះ បានកើតមានឡើងកាលពីវេលាម៉ោង២​៖៤០នាទីទៀ​បភ្លឺ​ ឈានចូលថ្ងៃ​សុក្រ​ ទី៤ ខែមករា​ ឆ្នាំ២០១៩នេះ នៅលើ​កំណាត់ផ្លូវជាតិលេខ១​ ត្រង់ចំណុចមុខផ្សារគគីរ ឃុំគគីរ​ ស្រុកកៀនស្វាយ ខេត្តកណ្តាល។

អ្នកបើ​កបរ​រថយន្ត ដែលគាបជាប់ក្នុងកាប៊ីនឈ្មោះ យ៉ង​ ម៉ាច​ ភេទប្រុស អាយុជាង​​៣៥ឆ្នាំ ​ មុខរបរ​ធ្វើ​ការនៅកំពង់ផែ មានទីលំនៅឃុំបន្ទាយដែក ស្រុកកៀនស្វាយ​ ខេត្តកណ្ដាល​។ រីឯអ្នករួមដំណើ​រ​ មិនទាន់ស្គាល់អត្តសញ្ញាណទេ​។ ចំណែកអ្នកបើ​កបររថយន្តកុងតឺន័រ​ ក៏មិនទាន់ស្គាល់អត្តសញ្ញាណនៅឡើយ​ ហើយ​ត្រូវបានសមត្ថកិច្ចឃាត់ខ្លួន។

អ្នកឃើញហេតុការណ៍ផ្ទាល់បានប្រាប់ភ្នាក់ងារ​ ខេមប៉ុស្តិ៍​ ដឹងថា មុនពេលកើតហេតុ​ គេឃើញរថយន្តកាមរីឆ្លាមមួយគ្រឿង ពណ៌ស្ករ​ ពាក់ស្លាកលេខភ្នំពេញ​ 2K-7730 បើកបរក្នុងទិសដៅមកលិចមកកើត ក្នុងល្បឿនយ៉ាងលឿន លុះដល់ចំណុចកើតហេតុ​មុខផ្សារគគីរ​ ដែលជាចំណុចផ្លូវកោង​ ស្រាប់តែមានរថយន្តកុងតឺន័រ​មួយគ្រឿង​ ក្បាលពណ៌ស​ សណ្ដោង​កន្ទុយដឹកទូកុងតឺន័រ បើកក្នុងទិសដៅបញ្ច្រាសគ្នា​ ពេលនោះស្រាប់តែរថយន្តកាមរីឆ្លាម​ បានបើកទៅបុកចំបញ្ឆិត​ពីមុខរថយន្តកុងតឺន័រ រួចខ្ទាតទៅបុកពាក់កណ្ដាលរថយន្តកុងតឺន័រទៀត បណ្ដាលឲ្យរថយន្តឆ្លាម​រួញជាប់កាប៊ីន ខ្ទេចផ្នែកខាងមុខស្ទើរទាំងស្រុង និងបណ្ដាលឲ្យបុរស២នាក់ (ម្នាក់ជាអ្នកបើ​ក​ និងម្នាក់ជាអ្នករួមដំណើ​រ) រងរបួសធ្ងន់​បោកនឹងកញ្ចក់ ឈាមហូរជោកខ្លួន ហើយគាបជាប់ក្នុងកាប៊ីនរថយន្ត ចំណែករថយន្តកុងតឺន័រ បានផ្ទុះកង់ក្រោយខាងឆ្វេងចំនួន៣ និងដាច់កង់ចេញពីរថយន្តអស់១ ខ្ទាតនៅក្បែរកន្លែងកើតហេតុ រីឯទូកុងតឺន័រផ្ទុកខ្លាញ់ត្រី បានរលំធ្លាក់សង្កត់លើ​តូបលក់ទឹកអំពៅ​ ហូរហៀរ​ខ្លាញ់ត្រីពេញផ្លូវ ពេលនោះ​រថយន្តកុងតឺន័រ​ មិនទាន់អស់ល្បឿន បាន​បន្តទៅមុខប្រហែលជាង១០០ម៉ែត្រទៀតទើបឈប់ ហើយក៏ត្រូវប្រជាពលរដ្ឋឃាត់ខ្លួនតៃកុងរថយន្តកុងតឺន័របានភ្លាមៗ រួចទាក់ទងប្រគល់ឲ្យសមត្ថកិច្ចនៅកន្លែងនោះផងដែរ។

ចំណែកបុរសពីរនាក់ ដែលជាប់ក្នុងកាប៊ីនរថយន្តកាមរីឆ្លាមនោះ ត្រូវបានកម្លាំងប្រជាពលរដ្ឋសហការជាមួយនឹងកម្លាំងសមត្ថកិច្ចនាំគ្នាជួយគាស់យកចេញមកខាងក្រៅបានម្នាក់ ហើយក៏បានទាក់ទងទៅកាន់រថយន្តសង្គ្រោះមន្ទីរពេទ្យបង្អែកស្រុកកៀនស្វាយមកដឹកបញ្ជូនទៅសង្គ្រោះនៅមន្ទីរពេទ្យកាល់ម៉ែត។ ចំណែកអ្នកបើកបរម្នាក់ទៀតនៅជាប់ក្នុងកាប៊ីនរថយន្ត ត្រូវបានប្រជាពលរដ្ឋ ក៏ដូចជាសមត្ថកិច្ចនាំគ្នាជួយគាស់យកជាង២ម៉ោងនៅមិនទាន់យកចេញបាន​ រហូតមានក្រុមគ្រូពេទ្យ​បង្អែកស្រុកកៀនស្វាយ​ ចុះមកដល់កន្លែងកើតហេតុ​ ជួយដាក់​សេរ៉ូម​កម្លាំងឲ្យអ្នករបួស និងបន្តការជួយគាស់យកអ្នកគាបជាប់ក្នុងកាប៊ីនដដែល។ ឃើ​ញស្ថានភាពកាន់តែលំបាកយកមនុស្សចេញមកក្រៅ ទើបក្រុមអ្នកយកព័ត៌មានបាន​ទាក់ទងហៅ​ក្រុមសង្គ្រោះ​៧១១​ នៃកងពលតូចលេខ៧០ ចេញរថយន្ត​កាត់​ដែក​ និងរថយន្តសង្គ្រោះបន្ទាន់​ មកជួយអន្តរាគមន៍ផង ព្រោះ​ជាង២ម៉ោងហើ​យ​ នៅមិនទាន់យកមនុស្សចេញបាន​ទេ។

បន្ទាប់ពីទទួលដំណឹងភ្លាម​ មេបញ្ជាការរង​កងពលតូចលេខ៧០ បានបញ្ជាឲ្យក្រុមសង្គ្រោះ៧១១ ចេញរថយន្តកាត់ដែកពីបន្ទាយ​កងពលតូចលេខ៧០ នៅតាមផ្លូវជាតិលេខ៣ ខណ្ឌពោធិ៍សែនជ័យ​ ឲ្យទៅចំណុចកើ​តហេតុ​មុខផ្សារ​គគីរ ស្រុកកៀនស្វាយ​ ដើម្បីជួយសង្គ្រោះកាត់ដែក​យកមនុស្សចេញ​ តែខណៈពេលមកដល់ហួសវិទ្យាល័យព្រែកឯង ជិតដល់កន្លែងកលតហេតុហើ​យ ស្រាប់តែជនរងគ្រោះត្រូវបានប្រជាពលរដ្ឋ និងសមត្ថកិច្ច​ជួយទាញយកចេញមកក្រៅបាន ទើ​បក្រុមសង្គ្រោះត្រឡប់ទៅបន្ទាយវិញ។

ក្រោយកើតហេតុកម្លាំងសមត្ថកិច្ចវាស់វែងនៃស្រុកកៀនស្វាយ បានចុះមកដល់កន្លែងកើតហេតុ ដើម្បីធ្វើការវាស់វែងយករថយន្តទាំងពីរគ្រឿង ​ទៅរក្សាទុករង់ចាំធ្វើការដោះស្រាយទៅតាមផ្លូវច្បាប់ផងដែរ។

ជាមួយ​គ្នានេះ​លោក​ឧត្តមសេនីយ៍ទោ សូយ​ ណារិទ្ធ​ មេបញ្ជាការរង​កងពលតូចថ្មើរជើងលេខ​៧០ បានមានប្រសាសន៍​ប្រាប់ភ្នាក់ងារ​​ ខេមប៉ុស្តិ៍​ ដឹងថា​ បើ​សិនជាបានជួបហេតុការណ៍គ្រោះថ្នាក់ និងគាបជាប់មនុស្សបែបនេះ​ សូមប្រញាប់ទាក់ទងទៅកាន់ពួកគាត់ឲ្យបានលឿនជាងនេះ​ ពួកគាត់នឹងចេញអន្តរាគមន៍ជួយសង្គ្រោះ​ ២៤ម៉ោង​ តាមរយៈលេខប្រចាំបញ្ជា (២៤ម៉ោង) តាមរយៈ​លេខ 016700700​ ។

សូមបញ្ជាក់ថា​ ជារៀងរាល់ថ្ងៃ កងអនុសេនាធំចល័ត ​សង្គ្រោះបន្ទាន់​៧១១ ឬហៅកាត់ថា (ក្រុមសង្រ្គោះបន្ទាន់៧១១ - RRC 711) បានដាក់កម្លាំងឈរជេីង ប្រចាំការ (២៤ម៉ោងលើ២៤ម៉ោង) ចំនួន ៣គោលដៅដូចជា ៖ គោលដៅទី១ : នៅភូមិព្រៃព្រីងត្បូង សង្កាត់ចោមចៅទី៣ ខណ្ឌពោធិសែនជ័យ រាជធានីភ្នំពេញ។ គោលដៅទី២ : នៅ DN ក្នុងបរិវេណអគ្គបញ្ជាការកងទ័ព ភ្នំពេញ​ និងលេខប្រចាំបញ្ជា​ 016700700​ ។ គោលដៅទី៣ : គឺនៅសាលាមិត្តភាពកម្ពុជាជប៉ុន ភូមិ៣ សង្កាត់លេខ១ ក្រុងកំពង់សោម ខេត្តព្រះសីហនុ។ បងប្អូនប្រជាពលរដ្ឋអាចទាក់ទងហៅឡានសង្រ្គោះបន្ទាន់បានតាមរយៈលេខទូរស័ព្ទ 096 925 4440 / 088 777 1115 ។

ឧត្តមសេនីយ៍ទោ សូយ​ ណារិទ្ធ​ បានបញ្ជាក់ទៀតថា​ រាល់ការចេញជួយសង្គ្រោះ​ (ទាំងសង្គ្រោះបន្ទាន់ ទាំងអគ្គិភ័យ) គឺមិនគិតថ្លៃសេវាកម្មអ្វីទាំងអស់៕

ផ្ដល់សិទ្ធិដោយ៖ Campost.news

Feature Ads