Thursday, January 24, 2019

រថយន្តទំនើប១គ្រឿង ចតទុកស្ងៀមសុខៗ ស្រាប់ឆាបឆេះឡើង ខូចខាតស្ទើរទាំងស្រុង នៅក្នុងបុរី​ ប៉េង​ ហួត​ បឹងស្នោ​

ភ្នំពេញៈ​ រថយន្តសេរីទំនើបមួយគ្រឿង ត្រូវអគ្គិភ័យឆាបឆេះខូចខាតស្ទើរទាំងស្រុង​ ខណៈដែលម្ចាស់ចតទុកចោលក្នុងផ្ទះវិឡាលេខ១៩​ ផ្លូវ​បេ៧​ ក្នុង​បូរី​ ប៉េង​ ហួត​ ភូមិបឹងស្នោរ​ សង្កាត់និរោធ​ ខណ្ឌច្បារអំពៅ​ រាជធានីភ្នំពញ​។ ហេតុការណ៍នេះ បង្កការភ្ញាក់​ផ្អើល​ឡើង កាលពីវេលាម៉ោង១២រសៀល ថ្ងៃទី២៤​ ខែ​មករា​ ឆ្នាំ​២០១៩​នេះ។

បើតាមសម្តីម្ចាស់រថយន្ត បានឲ្យដឹងថា មុនពេលកើតហេតុ​ គឺរថយន្តរបស់ខ្លួន ម៉ាកមែកសឺដេស​ ដែលរងការឆាប់ឆេះនេះ គឺចតទុកចោលនៅក្នុងផ្ទះជាច្រើនថ្ងៃមកហើយ​ ដោយមិនបានជិះចេញទៅណាទេ​ ស្រាប់តែថ្ងៃនេះមិនដឹងថាឆ្លងចរន្តអ្វី ឬក៏មូលហេតុអីទេ​ ក៏ឆេះឡើងយ៉ាងសន្ធោសន្ធៅតែម្តង​។

ប្រភពដែលបន្តថា ភ្លាមៗនោះគាត់បានយកបំពងពន្លត់អគ្គិភ័យបាញ់ពន្លត់អណ្តាតភ្លើងដែល​ ប៉ុន្តែមិនរលត់ក៏ស្រែកឆោឡោផ្អើលដល់កម្លាំងសន្តិសុខដែលយាមនៅក្នុងបូរីនាំគ្នាយកបំពងពន្លត់អគ្គិភ័យជាច្រើនជួយបាញ់អន្តរាគមន៍ រហូតឲ្យរលត់សូន្យសុងទៅវិញ​ ដោយមិនបានរៀលដាលឆាបឆេះដល់លំនៅដ្ឋាន និងសម្ភារៈផ្សេងឡើយ​ ប៉ុន្តែ រថយន្តដែលឆាបឆេះនោះ គឺរងការខូចខាតស្ទើរទាំងស្រុងទៅហើយ​។

ជុំវិញនឹងករណីខាងលើនេះ សមត្ថកិច្ច ក៏ដូចជាម្ចាស់រថយន្ត នៅតែង្ងីឆ្ងល់ថា មិនដឹងបណ្តាលមកពីមូលហេតុអ្វី បានរថយន្តចតទុកស្ងៀមត្រូវភ្លើងឆេះដែល​ ប៉ុន្តែមជ្ឈដ្ឋានជុំវិញសន្និភាពថាអាចបណ្តាលមកឆ្លងចរន្តខ្សែភ្លើងក្នុងរថយន្ត ទើបបង្កឡើងជាអគ្គិភ័យបែបនេះទៅ៕

Feature Ads