header ads

ភ្នំពេញៈ ទម្លាប់ពេលស្រវឹងកាច! នាយទាហាន​ពាក់ស័ក្តិ​ម្នាក់ ចេញពីញាំការ​ បើក​ម៉ូតូ​ក្នុង​ពេល​ស្រវឹងស្រាទ្រេតទ្រោត ឆ្លងកាត់គោលដៅត្រួតពិនិត្យ អនុវត្ត​ច្បាប់ចរាចរណ៍​របស់អធិការដ្ឋាននគរបាលខណ្ឌទួលគោក សមត្ថកិច្ចហៅឲ្យឈប់អែបខាងសិន ដើម្បីត្រួតពិនិត្យ​ បែរជា​ប្រើសម្ដីអសីលធម៌ដាក់មន្ត្រី​នគរបាល​ចរាចរណ៍​ ទើ​បសមត្ថកិច្ចចាប់វាស់ជាតិអាកុល​ ផាកពិន័យ​តែម្ដង។

ហេតុការណ៍នេះ កើតឡើងកាលពីវេ​លាម៉ោង៩៖៥០នាទីយប់​ថ្ងៃសុក្រ​ ទី២៥ ខែមករា​ ឆ្នាំ២០១៩នេះ នៅត្រង់ចំណុចខាងមុខសណ្ឋាគារផ្កាឈូកទិព្វ​ តាមបណ្តោយផ្លូវមុន្នីរ៉េត ស្ថិតក្នុងសង្កាត់ផ្សារដើមគរ ខណ្ឌទួលគោ​ក រាជធានីភ្នំពេញ​។

បុរសដែលត្រូវសមត្ថកិច្ចចាប់វាស់ជាតិអាកុលនោះ​ ឈ្មោះ​ ស្រ៊ាង ពិសិដ្ឋ​ មុខរបរ​ នាយទាហាន​កងយោធពលខេមរភូមិន្ទ​ កងឯកភាព មជ្ឃមណ្ឌលបោសសំអាតមីន ក.ម.ជ ឋានន្តរសក្ដិ​វរសេនីយ៍ត្រី​ (ស័ក្តិ​៤) អត្តលេខ 058613​ ។

លោក ជិន រតនៈ អធិការរងទទួលបន្ទុកផ្នែកសណ្តាប់ធ្នាប់ចរាចរណ៍​ នៃអធិកាដ្ឋាននគរបាលខណ្ឌទួលគោក ដែលបានដឹកនាំកម្លាំងប៉ុស្តិ៍​ និងកម្លាំងអន្តរាគមន៍ខណ្ឌ បានដាក់គោលដៅ​ចុះ​ត្រួតពិនិត្យ​អនុវត្តន៍​ច្បាប់​ចរាចរណ៍​ផ្លូវគោក​ថ្មី​ និងអាវុធជាតិផ្ទុះ ព្រមទាំង​ត្រួតពិនិត្យ​ជាតិ​អាល់កុល នៅចំណុចមុខសណ្ឋាគារផ្កាឈូកទិព្វខាងលើ បាន​ប្រាប់ភ្នាក់ងារ​ ខេមប៉ុស្តិ៍​​ ថា មុនពេលឃាត់ខ្លួននាយទានហាន​ពាក់​ស័ក្តិ​៤នោះ គឺកម្លាំងកំពុងត្រួតពិនិត្យ​នៅចំណុចខាងលើ ដោយធ្វើ​ការត្រួតពិនិត្យប្រជាពលរដ្ឋ និងអ្នកដំណើរដែលឆ្លងកាត់ មិនគោរពច្បាប់ចរាចរណ៍ និងធ្វើការផាក​ពិន័យ​ដូចសព្វដង ក្រោយមកស្រាប់តែ មានបុរសជានាយទាហានម្នាក់ បានជិះម៉ូតូមួយគ្រឿង ម៉ាក Zoomer X ពណ៌ខ្មៅលាយក្រហម ពាក់ស្លាកលេខភ្នំពេញ ​1GR-6654 ដោយមានពាក់មួកសុវត្ថិភាព​ និងដាក់កញ្ចក់ត្រឹមត្រូវដែរ​ ចូលមកដល់ដោយមានលក្ខណៈស្រវឹងទ្រេតទ្រោត ហើយក៏ឃើ​ញនៅលើម៉ូតូមានស្រាបៀរ ABC ៣កំប៉ុងច្រកថង់ នៅកន្លែងដាក់ជើង ទើ​បលោកហៅឲ្យឈប់អែបខាងសិន ដើម្បីត្រួតពិនិត្យ​ ហើយពេលនោះបុរសខាងលើនោះ​ មិនចង់ឈប់ទេ ចង់ជិះគេចពីសមត្ថកិច្ច តែគេចមិនរួច ទើ​បសមត្ថកិច្ចអោយជិះឡើ​ងមកលើចិញ្ចើ​មផ្លូវ ។

លោកអធិការងបន្តថា ក្រោយពេលចុះពីលើ​ម៉ូតូមក​ លោកក៏បានអប់រំណែនាំ សូមកុំបើកបរ​ ដោយពិសាគ្រឿងស្រវឹងបែបនេះទៀត តែនាយទាហានរូបនោះ បែរជា​ចុចទូរស័ព្ទទៅអ្នកដទៃអោយជួយអន្តរាគមន៍ហើ​យ​ ដោយមិនស្ដាប់ការអប់រំណែនាំរបស់លោកឡើយ រួចបែរជាហុចទូរស័ព្ទអោយលោកនិយាយ​ជាមួយ អ្នកដែលចង់ជួយអន្តរាគមន៍​ទៅវិញ តែលោកមិននិយាយ​ទេ​ ទើ​បនាយទាហាននោះ​ខឹងចិត្តពេក​ ក៏បានប្រើ​សម្ដីអសីលធម៌ដាក់លោកអធិការរងថា​ "ហ៊ែងនឹង​ស្អីហា អាប៉ូលិសថោក" ទើ​បលោកអធិការ​បញ្ជាឲ្យកម្លាំង​នគរបាល​អនុវត្ត​ច្បាប់ នាំនាយទាហាននោះសុំ​ធ្វើការ​ត្រួតពិនិត្យ​ជាតិ​អាកុល​តែម្ដង ។

ជាក់ស្ដែង​​បើ​តាម​ការ​ផ្លុំពិនិត្យ​នោះ ​រក​ឃើញ​ថា ​មាន​កម្រិត​ជាតិ​អាល់កុល ​១,០៣​ មី​លី​ក្រាម /ក្នុង​១​លី​ត្រ​ខ្យល់ ទើបសមត្ថកិច្ចចេញលិខិតផាកពិន័យ យោងតាមច្បាប់ចរាចរណ៍ដែលបានចែងក្នុង​មាត្រា​៧៧​ នៃច្បាប់ចរាចរណ៍ផ្លូវគោកថ្មី​។

បន្ទាប់មកនគរបាលចរាចរណ៍ ក៏អនុញ្ញាតអោយត្រឡប់ទៅផ្ទះវិញ  ក្រោយធ្វើ​ការផាកពិន័យតាមច្បាប់រួច៕

សូមបញ្ជាក់ថា ​ច្បាប់ចរាចរណ៍ផ្លូវគោកថ្មី​ មាត្រា៧៧​ បានចែងដូចខាងក្រោម ៖ មាត្រា៧៧ ជនណាបើកបរយានយន្តនៅពេលដែលខ្លួនស្ថិតក្នុងភាពស្រវឹង ដោយមានជាតិអាល់កុលចាប់ពី 0,40 (សូន្យក្បៀសសែសិប) មីលីក្រាមក្នុងមួយលីត្រខ្យល់ ឬចាប់ពី 0,80 (សូន្យក្បៀសប៉ែតសិប) ក្រាមក្នុងមួយលីត្រឈាម ឡើងទៅ ត្រូវផ្ដន្ទាទោស ដាក់ពន្ធនាគារពី ១ខែ ទៅ ៦ខែ និងពិន័យជាប្រាក់ ៨០០,០០០ រៀល (ប្រាំបីសែនរៀល) ទៅ ៤០០០,០០០ រៀល (បួនលានរៀល)៕

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post