ភ្នំពេញៈ ទំនងប្រចណ្ឌពេលភ្ញៀវមើលមុខប្អូនស្រីម្ចាស់ហាងញឹកពេក ក្រុមចុងភៅ និងសន្តិសុខហាងលក់សាច់អាំងមួយកន្លែង នាំគ្នាទាញសោច្រវ៉ាក់ វាយទៅលើបុរសដែលជាភ្ញៀវម្នាក់ បែកក្បាលជាច្រើនកន្លែង ហូរឈាមជោកខ្លួន ហើយមានអ្នកចូលទៅជួយឃាត់ ក៏ត្រូវក្រុមចុងភៅ និងសន្តិសុខ កាន់ច្រវ៉ាក់ និងទាញកែវគប់ បណ្ដាលឲ្យរបួសបែកក្បាលម្នាក់ និងរបួសស្រាល២នាក់ទៀត ភ្លាមៗនោះក្រុមចុងភៅ និងសន្តិសុខ ដែលបង្កបាននាំគ្នារត់ចូលទៅក្នុងហាង ទើបអ្នកគ្រប់គ្រងហាងប្រាប់អោយបុគ្គលិកទាញទ្វារបិទ រួចចាក់សោជាប់ បង្កឲ្យមានការភ្ញាក់ផ្អើលដល់សមត្ថកិច្ចចុះទៅអន្តរាគមន៍ទាំងយប់។
ហេតុការណ៍វាយគ្នាបង្កការភ្ញាក់ផ្អើលយ៉ាងខ្លាំងនេះ បានកើតឡើងនៅវេលាម៉ោង១៖២០នាទីរំលងអធ្រាត្រឈានចូលថ្ងៃទី១១ ខែមករា ឆ្នាំ២០១៨ នៅចំណុចហាងសាច់អាំងមួយកន្លែង យីហោ "ភ្នំពេញសាច់អាំង BBQ & Streamboat" ស្ថិតនៅតាមបណ្តោយផ្លូវ១៣៦ ក្នុងសង្កាត់ផ្សារកណ្ដាលទី២ ខណ្ឌដូនពេញ រាជធានីភ្នំពេញ។
បើតាមសម្ដីបុរសរងគ្រោះបានរៀបរាប់ប្រាប់ភ្នាក់ងារ “ខេមប៉ុស្តិ៍” ឲ្យដឹងថា រូបគាត់និងមិត្តភក្តិបួនប្រាំនាក់ទៀត សុទ្ធតែធ្លាប់ចូលមកផឹកស៊ីក្នុងហាងនេះជាច្រើនសារមកហើយ ព្រោះមិត្តភក្តិរបស់ខ្លួនម្នាក់ ក៏ជាសន្តិសុខយាមម៉ូតូក្នុងហាងនោះដែរ ហើយរាល់លើកពួកគាត់មិនធ្លាប់មានបញ្ហាជាមួយអ្នកណានោះទេ លុះមកដល់ពេលកើតហេតុ រូបគេនឹងមិត្តភក្តិមានគ្នា៤-៥នាក់ បានចូលមកហូបសាច់អាំង និងផឹកស៊ីជួបជុំគ្នាក្នុងហាងខាងលើ បានសើចសប្បាយក្អាកក្អាយជាមួយគ្នា រហូតផឹកស៊ីចប់ ពួកគាត់បានឲ្យបុគ្គលិកមកគិតលុយដូចរាល់ដង ព្រោះចង់ទៅបន្តមួយកន្លែងទៀត។
ជនរងគ្រោះ បន្តថា ពេលគិតលុយរួច ពួកគាត់បាននាំគ្នាដើរចេញទៅក្រៅ តែគ្រាន់តែដើរដល់ខាងមុខហាង ស្រាប់តែក្រុមបុគ្គលិកមានទាំងចុងភៅ និងសន្តិសុខនៅក្នុងហាង បាននាំគ្នាចេញមកព្រួតវាយគាត់ មានទាំងសោច្រវ៉ាក់ និងកែវស្រា បណ្ដាលឲ្យរងរបួសបែកក្បាលជាច្រើនកន្លែង ហូរឈាមជោកខ្លួន ទើបមិត្តភក្តិរបស់គាត់ ក្នុងនោះមានម្នាក់ ក៏ជាសន្តិសុខហាងនោះដែរ បានស្ទុះចូលមកជួយឃាត់ តែបែរជាទាស់ពាក្យសម្ដីគ្នាទៀត ធ្វើឲ្យផ្ទុះហិង្សាទៅវិញទៅមក ដោយក្រុមចុងភៅ និងសន្តិសុខហាងនោះ បានវាយទាំងមិត្តភក្តិគាត់ បណ្ដាលអោយរងរបួសធ្ងន់ស្រាល៤នាក់។
បើតាមសម្ដីអ្នកគ្រប់គ្រងហាងរូបស្រស់ បានបញ្ជាក់ប្រាប់ “ខេមប៉ុស្តិ៍” ដែរថា ក្រុមបុគ្គលិកក្នុងហាងរបស់គាត់ ក៏រងរបួសដែរ បន្ទាប់ពីវាយគ្នាទៅវិញទៅមក ដោយមិនទាន់ដឹងមូលហេតុនោះ បន្ទាប់មកពួកគេបាននាំគ្នារត់ចូលក្នុងហាងវិញ ទើបគាត់ប្រាប់ឲ្យបុគ្គលិកបិទទ្វារចាក់សោសិន ព្រោះខ្លាចមានការវាយគ្នាម្ដងទៀត កុំឲ្យខូចខាតសម្ភារៈក្នុងហាង ពេលនោះទើបបង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋរាយការណ៍ប្រាប់សមត្ថកិច្ចចុះទៅអន្តរាគមន៍ទាំងយប់។
ស្ត្រីរូបស្រស់សម្ដីស្រទន់បន្តថា ទោះបីជាយ៉ាងណាក៏ដោយ ក្នុងនាមគាត់ជាអ្នកគ្រប់គ្រងហាង គាត់នៅតែទទួលខុសត្រូវ តាមរូបភាពជាក់ស្ដែង តាមដែលអាចធ្វើទៅបាន ព្រោះជនរងគ្រោះជាភ្ញៀវ ពួកគាត់បានចូលមកហូបចុកលក្ខណៈធម្មតាប៉ុណ្ណោះ និងមិនមែនមកអុកឡុកហាងអ្វីឡើយ ហើយពេលចប់ពួកគាត់បានមកគិតលុយគ្រប់ចំនួនផងដែរ ដូច្នេះគាត់សុំជួយដោះស្រាយសិន។
បើតាមជនរងគ្រោះម្នាក់ទៀត ដែលជាសន្តិសុខហាងនោះដែរ បានប្រាប់ “ខេមប៉ុស្តិ៍” ថា រឿងនេះ គឺកើតឡើងដោយសារប្រចណ្ឌ ព្រោះគ្រាន់តែមិត្តភក្តិរបស់គាត់ ដែលរបួសក្បាលបែកនោះ ក្រឡេកមើលមុខប្អូនស្រីម្ចាស់ហាងញឹកញាប់ពេក ទើបធ្វើឲ្យបុគ្គលិកហាងនោះប្រចណ្ឌ ទើបបង្កជាហិង្សាមកលើពួកគាត់ បណ្ដាលឲ្យរងរបួសបែបនេះ។
បន្ទាប់មក ស្ត្រីរូបស្រស់ម្នាក់ជាអ្នកគ្រប់គ្រងហាង បានចូលមកសម្របសម្រួលជាមួយអ្នករងរបួសធ្ងន់ស្រាលទាំង៤នាក់នោះ ដោយភាគីខាងជនរងគ្រោះ សុំទាមទារជំងឺចិត្ត និងថ្លៃព្យាបាលរបួស ព្រោះមិនចង់ទៅប៉ុស្តិ៍ដាក់ពាក្យបណ្ដឹងនាំវែងឆ្ងាយទេ ទើបស្ត្រីរូបស្រស់ជាអ្នកគ្រប់គ្រងហាង សុំសម្រួលនិងព្រមចេញថ្លៃព្យាបាលរបួស ចំនួន៧០០$ ដោយក្នុងនោះសងជំងឺចិត្តទៅកាន់អ្នករបួសក្បាលធ្ងន់២នាក់ ៥០០$ (ក្នុងម្នាក់២៥០$) និងនៅសល់២០០$ សម្រាប់ថ្លៃព្យាបាលរបួសស្រាល។
ជាមួយគ្នានេះដែរ បុរសដែលជាសន្តិសុខរងគ្រោះ ក៏សុំឈប់ធ្វើការផងដែរ ចំណែកអ្នកគ្រប់គ្រងហាងរូបស្រស់សម្ដីស្រទន់រូបនោះ ក៏មិនបានបង្ខិតបង្ខំ ឬដាក់លក្ខខណ្ឌអ្វី អោយបុរសសន្តិសុខនោះទេ គឺគាត់សុំឈប់ពីការងារដោយខ្លួនឯងប៉ុណ្ណោះ។
ក្រោយកើតហេតុ ភាគីទាំងសងខាង បានយល់ព្រមសម្របសម្រួលគ្នា នៅចំពោះមុខក្រុមអ្នកសារព័ត៌មាន រួមទាំងសមត្ថកិច្ចប៉ុស្តិ៍ផ្សារកណ្ដាលទី២ ដោយអ្នកគ្រប់គ្រងហាង សងជំងឺចិត្តនិងថ្លៃព្យាបាលរបួសចំនួន៧០០$ ទៅអោយភាគីជនរងគ្រោះទាំង៤នាក់នោះ ដើម្បីបញ្ចប់រឿង ដោយមិនមានការប្ដឹងផ្ដល់អ្វីនោះទេ គ្រាន់តែធ្វើកិច្ចសន្យាជាមួយគ្នាប៉ុណ្ណោះ៕
