ភ្នំពេញៈ សល់ត្រឹមរយៈពេល២ថ្ងៃទៀតប៉ុណ្ណោះ ទិវាជ័យជំនះ ៧មករា នឹងឈានចូលមកដល់ ហេតុនេះទើបនៅពហុកីឡដ្ឋានជាតិអូឡាំពិក បានរៀបចំការហាត់សមជាថ្មីម្តងទៀត ដើម្បីធានាបានថា ទិវានេះ នឹងប្រព្រឹត្តទៅដោយរលូនតាមការគ្រោងទុក ដើម្បីរំឮកដល់ខួបលើក៤០ឆ្នាំ ដែលកម្ពុជា រួចផុតពីសម័យកម្ពុជាប្រជាធិបតេយ្យ។
ពិធីហាត់សមនេះ បានប្រព្រឹត្តទៅ នៅព្រឹកថ្ងៃសៅរ៍ ១៤រោច ខែមិគសិរ ឆ្នាំច សំរឹទ្ធិស័ក ព.ស.២៥៦២ នៅពហុកីឡដ្ឋានជាតិអូឡាំពិក ដោយមានមហាជនចូលរួមហាត់សមយ៉ាងច្រើនកុះករ។ សូមជម្រាបជូនថា នេះជាការហាត់សម លើកទី៣ហើយ ដោយលើកទី១ បានប្រព្រឹត្តទៅនាព្រឹកថ្ងៃចន្ទ ២រោច និងលើកទី២ នាព្រឹកថ្ងៃព្រហស្បតិ៍ ៥រោច ខែមិគសិរ ឆ្នាំច សំរឹទ្ធិស័ក ព.ស.២៥៦២។
ក្នុងអំឡុងពេលប្រារព្ធខួបលើកទី៤០ នៃទិវាជ័យជម្នះ ៧មករា រដ្ឋបាលរាជធានីភ្នំពេញ ក៏បានប្រកាសពីបិទផ្លូវជុំវិញបរិវេណពហុកីឡាដ្ឋានជាតិ ដើម្បីឲ្យសាធារណជនបញ្ចៀសចរាចរណ៍លើតម្រាយផ្លូវដែលបានកំណត់ទាំងនោះ។
តាមសេចក្តីជូនដំណឹងរបស់រដ្ឋបាលរាជធានីភ្នំពេញ បានឲ្យដឹងថា នៅតំបន់ជុំវិញពហុកីឡាដ្ឋានជាតិអូឡាំពិក នាថ្ងៃទី៧ ខែមករា ឆ្នាំ២០១៩ ចាប់ពីម៉ោង៦ព្រឹករហូតដល់បញ្ចប់ពិធីប្រារព្ធខួបលើកទី៤០ នៃទិវាជ័យជម្នះ ៧មករា ត្រូវបានបិទទាំងស្រុង ដើម្បីឲ្យប្រព្រឹត្តទៅដោយរលូន រក្សាបាននូវសុវត្ថិភាព សន្តិសុខ សណ្ដាប់ ធ្នាប់ និងរបៀបរៀបរយសាធារណៈ ។ ពិសេសកាត់បន្ថយបាននូវការកកស្ទះចរាចរណ៍ ក្នុងរាជធានីភ្នំពេញ ខណៈក្នុងពហុកីឡាដ្ឋានជាតិអូឡាំពិក នឹងមានអ្នកចូលរួមសរុបប្រមាណ ៤ម៉ឺននាក់។
រដ្ឋបាលរាជធានីភ្នំពេញ សង្ឃឹមជឿជាក់យ៉ាងមុតមាំថា ប្រជាពលរដ្ឋ និងម្ចាស់អាជីវកម្មទាំងអស់ យោគយល់ អធ្យាស្រ័យ និងការចូលរួមអនុវត្ត តាមការជូនដំណឹងខាងលើ ដើម្បីធានាបាននូវសន្តិសុខ និងសុវត្ថិភាព ពិសេសបញ្ចៀសបាននូវការកកស្ទះចរាចរណ៍។
ទិវាជ័យជម្នះ ៧មករា ឆ្នាំ២០១៩នេះ ត្រូវបានរាជរដ្ឋាភិបាលសម្រេចធ្វើទ្រង់ទ្រាយធំ និងមានលក្ខណៈប្លែកអស្ចារ្យជាងឆ្នាំមុនៗ ពហុកីឡាដ្ឋានជាតិអូឡាំពិក ដោយមានមហាជនចូលរួមយ៉ាងច្រើនកុះករ រួមជាមួយនឹងការសម្តែងសិល្បៈនិងការក្បួនដង្ហែរថយន្តបុស្បុកមកពីបណ្តារាជធានីខេត្ត ដើម្បីបង្ហាញពីសក្តានុពល និងការអភិវឌ្ឍរយៈពេល៤០ឆ្នាំ របស់រាជធានីខេត្តនីមួយៗផងដែរ។
ជាមួយគ្នានេះដែរ សហភាពសហព័ន្ធយុវជនកម្ពុជា UYFC ក៏សូមគោរពអញ្ជើញបងប្អូន ពុកម៉ែ មាមីង បងប្រុស បងស្រី សមាជិកា សមាជិកា ប្អូនៗ ក្មួយៗ ចូលរួមរីករាយកំសាន្តជាមួយការប្រគំតន្រ្តី យុវជន "៧មករា ខ្ញុំ៤០ឆ្នាំ" ទាំងអស់គ្នាដោយសេរី ដោយសប្បាយរីករាយ និងរាំកម្សាន្តទាំងអស់គ្នា ក្នុងស្មារតីសាមគ្គីភាព និងក្នុងនាមជាមហាគ្រួសារខ្មែរ នាវេលាម៉ោង០៥:០០នាទីល្ងាច ដល់ម៉ោង១០:០០នាទីយប់ ថ្ងៃទី០៧ ខែមករា ឆ្នាំ២០១៩នេះ នៅបរិវេណទីតាំងសួនច្បារ ខាងមុខវត្តបុទុមវត្តី ខណ្ឌដូនពេញ រាជធានីភ្នំពេញ៕
