ភ្នំពេញៈ រថយន្ត CRV មួយគ្រឿង បើកឆ្លងស្តុប ខណៈដែលភ្លើងស្តុបពណ៌ខៀវ ត្រូវបុរសនារី២នាក់ បើករថយន្ត CAMRY LE មួយគ្រឿងទៀត ក្នុងល្បឿនយ៉ាងលឿនដូចហោះ មិនគោរពភ្លើងស្តុបក្រហមហើយនៅបំពាន ក៏ជ្រុលទៅបុកចំពីមុខរថយន្ត CRV បណ្ដាលឲ្យរថយន្ត CAMRY រេចង្កូតទៅបុករបាំងថ្មក្បាលព្រួញពុះចែកផ្លូវ ប៉ើងខ្ទាតជិត១០ម៉ែត្រ ចំណែករថយន្តបុកផ្ទប់ជាប់ទ្រូងផ្លូវ និងរថយន្ត CRV ខ្ទេចរថយន្តកំណាត់មុខ កាលពីវេលាម៉ោង១២៖៣៥នាទីរំលងអធ្រាត្រ ឈានចូលថ្ងៃសៅរិ៍ ទី១៩ ខែមករា ឆ្នាំ២០១៩ នៅត្រង់ចំណុចផ្លូវបំបែកជាបួន ស្ថិតលើកំណាត់ផ្លូវម៉ៅសេទុង កែងផ្លូវ១៩៩ ក្នុងសង្កាត់ទួលស្វាយព្រៃ១ ខណ្ឌចំការមន។
សាក្សីដែលឃើញហេតុការណ៍ផ្ទាល់ បានរៀបរាប់ភ្នាក់ងារ CAM POST ឲ្យដឹងថា នៅមុនពេលកើតហេតុ គេឃើញរថយន្ត CRV មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 2AC-5187 បើកបរដោយបុរសម្នាក់ ធ្វើដំណើរពីជើងទៅត្បូង តាមបណ្ដោយផ្លូវ១៩៩ ខណៈមកដល់ចំណុចកែងផ្លូវម៉ៅសេទុង រថយន្តក៏បន្តបើកទៅមុខទៀត ព្រោះភ្លើងស្តុបលោតពណ៌ខៀវ ស្រាប់តែមានបុរសនារី២នាក់ បើករថយន្តមួយគ្រឿងទៀត ម៉ាក CAMRY LE ពណ៌ទឹកមាស ពាក់ស្លាកលេខ ភ្នំពេញ 2R-2202 ធ្វើដំណើរតាមបណ្ដោយផ្លូវម៉ៅសេទុង ពីកើតមកលិច ក្នុងល្បឿនយ៉ាងលឿនដូចហោះ ក៏ជ្រុលបុកបញ្ជិតពីមុខរថយន្ត CRV ធ្វើឲ្យរថយន្ត CAMRY រេចង្កូតទៅបុករបាំងថ្មក្បាលព្រួញពុះចែកផ្លូវ ប៉ើងខ្ទាតជិត១០ម៉ែត្រ ចំណែកឯរថយន្តបុកផ្ទប់ជាប់ទ្រូងផ្លូវ និងរថយន្ត CRV ខ្ទេចកំណាត់មុខ តែក្នុងគ្រោះថ្នាក់នេះពិតជាសំណាងល្អមែន ដែលអ្នកបើកបរ និងអ្នករួមដំណើរ មិនមានអ្នកណារងរបួស គ្រាន់តែខូចខាតខ្ទេចរថយន្តស្ទើទាំងស្រុងប៉ុណ្ណោះ។
សាក្សីបន្តថា ភ្លាមៗនោះគេឃើញអ្នកបើកបររថយន្ត CAMRY បើកទ្វារចេញមក រួចប្រញាប់ប្រញាល់ដើរគេចចេញពីកន្លែងកើតហេតុ។
ក្រោយកើតហេតុ កម្លាំងល្បាតមូលដ្ឋានប៉ុស្តិ៍នគរបាលទួលស្វាយព្រៃ១ បានចុះមកដល់កន្លែងកើតហេតុ រួចរាយការណ៍ប្រាប់សមត្ថកិច្ចផ្នែកវាស់វែង នៃអធិការដ្ឋាននគរបាលខណ្ឌចំការមន ចុះមកពិនិត្យមើលជាក់ស្ដែង រួចរាយការណ៍ប្រាប់ខាងសមត្ថកិច្ចជំនាញ ចុះមកវាស់វែង រួចស្ទូចយករថយន្តទាំង២គ្រឿង យកទៅរក្សាទុកនៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ ដើម្បីរងចាំធ្វើការដោះស្រាយគ្នាពេលក្រោយ រួមទាំងសងការខូចខាតរបាំងថ្មដែលជាសម្បត្តិសាធារណៈ ដែលរៀបចំមន្ទីរសាធារណៈការរាជធានីភ្នំពេញផងដែរ៕
