Sunday, January 13, 2019

​ភេទទី៣មួយក្រុម បើ​ករថយន្ត​ PRIUS បុកម៉ូតូយុវជនម្នាក់​ រងរបួស​ រួចហៅកង់បីដឹកទៅពេទ្យ ហើយ​ចេញថ្លៃព្យាបាល

ភ្នំពេញៈ គ្រោះថ្នាក់ចរាចរណ៍មួយបានកើតឡើង ដោយមាននារីរូបស្រស់ភេទទី៣ មួយក្រុ​ម បើ​ករថយន្ត​ TOYOTA PRIUS បត់ស្ដាំ ខ្វះការប្រុងប្រយត្ន័​ ជ្រុលទៅបុក Zoomer-X គ្រឿងទៀត បណ្ដាលឲ្យបុរសម្នាក់ រងរបួសធ្ងន់គួរសម ភ្លាមនោះនារីរូបស្រស់ភេទទី៣ ជាអ្នកបើកបរ​ ទុករថយន្តនៅកន្លែងកើ​តហេតុ ​រួចប្រាន់ឲ្យ​មិត្តភក្តិនៅរង់ចាំដោះស្រាយ ចំណែករូបនាងបានចុះមកហៅកង់បី Pass App ដឹកជនរងគ្រោះទៅគ្លីនិកឯកជន​ និងចេញថ្លៃព្យាបាលរបួសឲ្យ​ជន​រងគ្រោះផងដែរ។ សូមសរសើ​រ ទោះជាភេទទី៣ពិតមែន តែមានទឹកចិត្ត និងការទទួលខុសត្រូវ ដែលផ្ទុយពីអ្នកបើ​កបរមួយចំនួន​អាងរត់យករួចខ្លួន។

គ្រោះថ្នាក់ចរាចរណ៍នេះ បានកើតមានឡើងនៅវេលាម៉ោង២៖៤០នាទីទៀ​បភ្លឺ​ ឈានចូលថ្ងៃអាទិត្យ​ ទី១៣ ខែមករា ឆ្នាំ២០១៩ នៅត្រង់ចំណុចច្រមុះជ្រូកនាគបាញ់ទឹក ស្ថិតតាមបណ្ដោយផ្លូវព្រះសីហនុ កែងផ្លូវសុធារស ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

សាក្សីដែលឃើញហេតុការណ៍ផ្ទាល់បានរៀបរាប់ភ្នាក់ងារ ​ខេមប៉ុស្តិ៍​ បានឲ្យ​ដឹងថា​ មុនពេលកើតហេតុ គេឃើញយុវជនម្នាក់ ជិះម៉ូតូមួយគ្រឿង ម៉ាក​ Zoomer X ពណ៌​សលាយខ្មៅ​ ពាក់ស្លាកលេខ​ក្រចេះ 1E-1518 បានធ្វើដំណើរតាមបណ្តោយផ្លូវសុធារស ទិសដៅពីត្បូងទៅជើងលុះមកដល់ចំណុចច្រមុះជ្រូកក្បាលនាគបាញ់ទឹក ជាកន្លែងកើ​តហេតុនោះ ស្រាប់តែមានរថយន្ត TOYOTA PRIUS មួយគ្រឿង ពណ៌ស ពាក់ស្លាកលេខភ្នំពេញ 2AA-2823 បើកបរដោយនារីរូបស្រស់ភេទទី៣ មួយក្រុម (មិនដឹងថាមានគ្នាប៉ុន្មាននាក់នោះទេ) បានធ្វើដំណើរតាមបណ្តោយផ្លូវព្រះសីហនុ បត់ស្ដាំមកផ្លូវសុធារសវិញ ក៏ជ្រុលទៅបុកម៉ូតូ Zoomer X ខាងលើនោះបណ្ដាលឲ្យដួលមុខរថយន្ត​ និងបណ្ដាលឲ្យយុវជនម្ចាស់ម៉ូតូរងរបួសធ្ងន់គួរសម​។

សាក្សីបន្តថា ភ្លាមនោះនារីរូបស្រស់ភេទទី៣ ជាអ្នកបើ​កបរ​ បានទុករថយន្តឲ្យមិត្តភក្តិនៅរង់ចាំ និងជួយមើ​លនៅកន្លែងកើ​តហេតុ​សិន ចំណែកនារីភេទទី៣នោះ ចុះពីលើ​រថយន្តរួចប្រញាប់ហៅកង់បី PassApp ដឹកជនរងគ្រោះ រួចឡើ​ងទៅជាមួយគ្នា ហើ​យកង់បីបានដឹកទៅគ្លីនិកឯកជន សុខា មានចម្ងាយប្រហែល៦០០ម៉ែត្រ ពីកន្លែងកើ​តហេតុនោះ រួចប្រញាប់អោយគ្រូពេទ្យជួយពិនិត្យ​ និងព្យាបាលរបួសផងដែរ​ នេះសូមសរសើ​រនារីៗភេទទី៣ទាំងនោះ ចំពោះការទទួលខុសត្រូវក្នុងហេតុការណ៍គ្រោះថ្នាក់ចរាចរណ៍នេះ។

ក្រោយមកសមត្ថកិច្ចប៉ុស្តិ៍ទន្លេបាសាក់បានមកដល់កន្លែងកើ​តហេតុ​ រួចអោយភាគីទាំងសងខាង​ដោះស្រាយ​គ្នាមួយជំហានទៀតសិន​ ចំណែកជនរងគ្រោះ​បានទូរស័ព្ទប្រាប់បងស្រី​អោយមកកន្លែងកើ​តហេតុដោះស្រាយគ្នា​ ដោយនារីរូបស្រស់ភេទទី៣ ម្ចាស់រថយន្តបានទទួលសុខត្រូវ និងព្រមចេញសំណងលើ​ការខូចខាតនោះ និងថ្លៃព្យាបាលរបួសទៅកាន់ជនរងគ្រោះ ដើម្បីបញ្ចប់រឿងនៅកន្លែងកើតហេតុផងដែរ​៕

Feature Ads