ភ្នំពេញៈ អាជ្ញាធរសម្រេចបិទទីតាំងអាជីវកម្មខារ៉ាអូខេ PRO KTV ស្ថិតតាមបណ្តោយមហាវិថីព្រះមុនីវង្ស ផ្ទះលេខ៧៥៧ និង៧៥៨ ស្ថិតនៅក្រុម២៦ ភូមិ៧ សង្កាត់បឹងត្របែក ខណ្ឌចំការមន រាជធានីភ្នំពេញ មិនឲ្យបើកដំណើរការអាជីវកម្មប្រភេទនេះទៀតឡើយ បន្ទាប់ពីកម្លាំងនគរបាលមន្ទីរប្រឆាំងគ្រឿងញៀន ចុះបង្ក្រាប និងឃាត់ខ្លួនជនសង្ស័យ៥៨នាក់ ជាមួយនឹងថ្នាំញៀនមួយចំនួន។ នេះតាមការបញ្ជាក់របស់នាយឧត្តមសេនីយ៍ មាស វីរិទ្ធ អគ្គលេខាធិការ អាជ្ញាធរជាតិប្រយុទ្ធប្រឆាំងគ្រឿងញៀនប្រាប់ឲ្យដឹងនៅរសៀលថ្ងៃទី២០ ខែមករា ឆ្នាំ២០១៩នេះ។
សូមបញ្ជាក់ថា កន្លងទៅលោក ឃួង ស្រេង អភិបាលរាជធានីភ្នំពេញ បានចេញបញ្ជាឲ្យអាជ្ញាធរខណ្ឌទាំង១២ ត្រូវបន្តពង្រឹងការងារសន្តិសុខសណ្តាប់ធ្នាប់២៤ម៉ោងលើ២៤ម៉ោង ជូនប្រជាពលរដ្ឋឲ្យបានល្អជាប្រចាំ ជាពិសេសត្រូវលុបបំបាត់ឲ្យបានចំពោះអ្នកជូញដូរ និងប្រើប្រាស់គ្រឿងញៀននៅក្នុងទឹកដីរាជធានី ដើម្បីជាការឆ្លើយតបទៅវិញ បន្ទាប់ពីប្រជាពលរដ្ឋបានបោះឆ្នោត ជូនគណបក្សប្រជាជនកម្ពុជា (CPP) ដែលលោកអភិបាល លើកឡើងក្នុងកិច្ចប្រជុំបញ្ជាការឯកភាពរាជធានីភ្នំពេញ កាលពីល្ងាចថ្ងៃទី១២ ខែកញ្ញា ២០១៨ នៅសាលារាជធានីភ្នំពេញ ថា “សន្តិសុខ គឺជាសេចក្តីត្រូវការរួមរបស់ប្រជាពលរដ្ឋគ្រប់រូប មិនអាចខ្វះបាន មិនថាអ្នកមាន ឬអ្នកក្រនោះទេ គឺសុទ្ធតែត្រូវការសន្តិសុខទាំងអស់។ លោកអភិបាលបន្តថា ការដែលពង្រឹងសន្តិសុខសណ្តាប់ធ្នាប់ និងការផ្តល់សេវាសាធារណៈជូនប្រជាពលរដ្ឋនេះ គឺជាការឆ្លើយតបមួយដ៏ចាំបាច់ ក្រោយពីប្រជាពលរដ្ឋទូទាំងប្រទេស ក៏ដូចជានៅរាជធានីភ្នំពេញ បានបោះឆ្នោតទុកចិត្តលើគណបក្សប្រជាជនកម្ពុជា ដើម្បីបន្តដឹកនាំរដ្ឋាភិបាលនីតិកាលទី៦នេះ។ ដូច្នេះហើយ អាជ្ញាធរខណ្ឌទាំង១២ និងសង្កាត់ទាំង១០៥ ត្រូវធ្វើយ៉ាងណាផ្តល់សេវាកម្មអោយបានល្អជូន ប្រជាពលរដ្ឋមានភាពកក់ក្តៅ រក្សាបានសន្តិសុខ សុវត្ថិភាពសណ្តាប់ធ្នាប់របៀបរៀបរយសាធារណៈបានល្អ”។
នាយឧត្តសេនីយ៍ មាស វីរិទ្ធ បានបញ្ជាក់ថា បន្ទាប់ពីធ្វើការស្រាវជ្រាវរួចមក ទីតាំងខាងលើនេះ មិនត្រូវបានអាជ្ញាធរអនុញ្ញាតឲ្យបើកដំណើរការទៀតទេ ព្រោះសមត្ថកិច្ចធ្លាប់ង្ក្រាបករណីគ្រឿងញៀនម្តងរួចមកហើយ និងទើបបង្ក្រាបម្តងទៀតនៅយប់ឈានចូលថ្ងៃទី១៩ ខែមករា ឆ្នាំ២០១៩។ ដូច្នេះអាជ្ញាធរមិនអនុញ្ញាតឲ្យទីតាំងដដែលនេះ បើកអាជីវកម្មប្រភេទនេះទៀតឡើយ គឺសម្រេចបិទតែម្តង។
សូមជម្រាបថា កម្លាំងសមត្ថកិច្ចជំនាញ (ក៨)និង(ក៣) នៃមន្ទីរប្រឆាំងគ្រឿងញៀន នៅរាត្រីថ្ងៃទី១៨ ខែមករា ឆ្នាំ២០១៩ ម៉ោង១២ និង១៥នាទី ឈានចូលថ្ងៃទី១៩ ខែមករា ឆ្នាំ២០១៩នេះ បានបើកកិច្ចប្រតិបត្តិការ បង្ក្រាបករណីជួញដូរគ្រឿងញៀន និងផ្តល់ទីតាំងអោយជួញដូរ និងប្រើប្រាស់គ្រឿងញៀន នៅចំណុចខារ៉ាអូខេ PRO KTV (ក្លឹបប្រូ) ផ្ទះលេខ៧៥៧និង៧៥៨ ផ្លូវព្រះមុន្នីវង្ស ស្ថិតនៅក្រុម២៦ ភូមិ៧ សង្កាត់បឹងត្របែក ខណ្ឌចំការមន រាជធានីភ្នំពេញ ។
ក្នុងប្រតិបត្តិការបង្ក្រាបគ្រឿងញៀនក្នុងខារ៉ាអូខេ PRO KTV នេះ កម្លាំងបានធ្វើការឃាត់ខ្លួនជនសង្ស័យ បានចំនួន ៥៨នាក់ (ស្រី២៤នាក់) ក្នុងនោះមានជនជាតិចិន ២៩នាក់ (ស្រី៥នាក់) និងជនជាតិវៀតណាម ២៣នាក់ (ស្រី១៥នាក់) និងជនជាតិថៃ ២នាក់ (ស្រី)និងជនជាតិខ្មែរ៣នាក់ (ស្រី២នាក់) និងជនជាតិកូរ៉េម្នាក់ (ប្រុស) រួចធ្វើតេស្តទឹកម៉ូត រកសារធាតុញៀន ក្នុងនោះ វិជ្ជមាន ៥២នាក់ និង អវិជ្ជមាន៦នាក់។
ប្រភេទជនសង្ស័យដែលសមត្ថកិច្ចឃាត់ខ្លួនមាន ៖ ១. ឈ្មោះ 차청민 Chea Cheong Min ជនជាតិកូរ៉េ ជាម្ចាស់ទីតាំង និងជាអនុប្រធានក្រុមហ៊ុន ។ ២. មេការធំឈ្មោះ Nguyen Tuan Nah ភេទប្រុស ជនជាតិវៀតណាម និងមេការតូចឈ្មោះ ហ៊ត ជឿង ភេទប្រុស ជនជាតិខ្មែរ ជាអ្នកចាត់ចែង។ ចំណែកឯអ្នកប្រើប្រាស់ ចំនួន ៥៣នាក់ និងអ្នកកំដរ ចំនួន ០២នាក់។
សមត្ថកិច្ចបានចាប់យកវត្ថុតាងរួមមាន ៖ អ៊ិចស្តាស៊ីគ្រាប់ ទម្ងន់២,០៥ក្រាម និងម្សៅគេតាមីន ៦,៥៨ក្រាម និងម្សៅកាហ្វេអ៊ិចស្តាស៊ី ៩៧,០៨ ក្រាម។ ប៉ុន្តែវត្ថុតាងខាងលើនេះ មិនទាន់មានអ្នកទទួលខុសត្រូវទេ ដោយថ្នាំទាំងនេះរាយបាយលើតុ ជ្រុះដី ខណៈពួកគេបដិសេធន៍ទាំងអស់គ្នា។
បច្ចុប្បន្នជនសង្ស័យ ព្រមទាំងវត្ថុតាង បានបញ្ជូនទៅមន្ទីរប្រឆាំងគ្រឿងញៀន ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី នៅថ្ងៃទី២១ ខែមករា ឆ្នាំ២០១៩។
សូមបញ្ជាក់ថា ទីតាំងខាងលើត្រូវបានសមត្ថកិច្ចបង្ក្រាបម្តងរួចមកហើយ ដោយបានឃាត់ខ្លួនមនុស្ស១៧នាក់ (ស្រី៣) ក្នុងនោះ អ្នកជួញដូរ២នាក់ និងអ្នកប្រើប្រាស់១៥នាក់ (ស្រី៣នាក់) និងបានចាប់យកវត្ថុតាងថ្នាំញៀនប្រភេទខេតាមីន ៣០គ្រាប់ និងម៉េតំហ្វេតាមីន ICE ១៨កញ្ចប់តូចទៀតផង កាលពីថ្ងៃទី១៨ ខែកញ្ញា ឆ្នាំ២០១៨នេះ ដោយរដ្ឋបាលរាជធានីភ្នំពេញ បានចេញលិខិតលេខ ២៣២/១៨ ឆត.ច្រ ជម្រាបមកលោក Nguyen Thanh Tu ម្ចាស់អាជីវកម្មខារ៉ាអូខេឈ្មោះ PRO KTV PRO ស្ថិតនៅផ្ទះលេខ៧៨៧ មហាវិថីព្រះមុនីវង្ស សង្កាត់ក្នុងសង្កាត់បឹងត្របែក ខណ្ឌចំការមន ។
កម្មវត្ថុស្ដីពី សំណើសុំអនុញ្ញាតអាជ្ញាប័ណ្ណទេសចរណ៍ប្រកបអាជីវកម្មខារ៉ាអូខេ ឈ្មោះ PRO KTV PRO ស្ថិតនៅផ្ទះលេខ៧៨៧ មហាវិថីព្រះមុនីវង្ស សង្កាត់បឹងត្របែក ខណ្ឌចំការមន រាជធានីភ្នំពេញ ។
-វិញ្ញាបនបត្រលេខ(NO) MOC-87003371 ចុះថ្ងៃទី២៨ ខែសីហា ឆ្នាំ២០១៨ របស់ក្រសួងពាណិជ្ជកម្ម
-ចំណារ ឯកឧត្តមអភិបាលនៃគណៈ អភិបាលរាជធានីភ្នំពេញ ចុះថ្ងៃទី១៩ ខែតុលា ឆ្នាំ២០១៨
-កំណត់ហេតុចុះថ្ងៃទី១៨ ខែកញ្ញា ឆ្នាំ២០១៨ របស់រដ្ឋបាលខណ្ឌចំការមន
-លិខិតចុះថ្ងៃទី១៩ ខែកញ្ញា ឆ្នាំ២០១៨ របស់លោក Nguyen Thanh Tu ។
តបតាមកម្មវត្ថុ និងយោងខាងលើ ខ្ញុំសូមជម្រាបលោកជ្រាបថា រដ្ឋបាលរាជធានីភ្នំពេញ មិនអនុញ្ញាតចេញអាជ្ញាប័ណ្ណ ប្រកបអាជីវកម្មខារ៉ាអូខេ PRO KTV PRO ដែលមានទីតាំងនៅតាមបណ្តោយផ្លូវខាងលើជូនលោកបានទេ ពីព្រោះទីតាំងដែលសុំប្រកបអាជីវកម្មខារ៉ាអូខេនេះ ត្រូវបានផ្អាកអាជីវកម្មជាបណ្តោះអាសន្ន ដោយរដ្ឋបាលខណ្ឌចំការមន មូលហេតុគឺពាក់ព័ន្ធនឹងបទល្មើសគ្រឿងញៀន មិនមានលិខិតអនុញ្ញាតពីស្ថាប័នពាក់ព័ន្ធ នឹងមិនបានសហការជាមួយនឹងមូលដ្ឋាន។ អាស្រ័យហេតុនេះសូមលោកជ្រាបតាមការគួរអភិបាលនៃគណៈអភិបាលរាជធានីភ្នំពេញ អភិបាលរង ហួត ហៃ៕