កំពតៈ លោក រស់ សាត និងបក្ខពួក បានរឹតបន្តឹងគាបយកលុយពីក្រុមឈ្មួញនាំចូលនាំចេញទំនិញតាមច្រកព្រែកចាកយ៉ាងកំរោលតែម្តង ហើយលោក យី ថុល បានឃុបឃិតឲ្យឈ្មួញធំៗបន្តនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់យ៉ាងរលូន ដើម្បីជាថ្នូរនឹងផលប្រយោជន៍។
ប្រភពដែលស្និទ្ធនឹងលោក យី ថុល បានឲ្យដឹងថា ពេលមកធ្វើជាមេគយច្រកព្រែកចាកភ្លាមនោះ គឺលោក យី ថុល បាន បញ្ជាឲ្យលោក រស់ សាត ដែលជាអនុប្រធានស្នាក់ការ ព្រមទាំង បក្ខពួក២នាក់ទៀត ពិនិត្យមើលឡើងវិញចំពោះការនាំចូលនាំចេញទំនិញគ្រប់ប្រភេទនៅច្រកទ្វារអន្តរជាតិព្រែកចាក។
ប្រការនេះគឺជារឿងដែលលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករ ពិនិត្យឡើងវិញជាបន្ទាន់ ហើយចាត់វិធានការទប់ស្កាត់អំពើពុករលួយច្រើនបែបច្រើនយ៉ាងរបស់លោក យី ថុល ព្រមទាំងបក្ខពួកខ្លះៗផង។
ប្រភពពីមន្ត្រីពាក់ព័ន្ធនៅច្រកទ្វារអន្តរជាតិព្រែកចាក ស្រុកកំពង់ត្រាច ខេត្តកំពត បានឲ្យដឹងថា គ្រាន់តែទទួលបានតំណែងជាប្រធានការិយាល័យគយច្រកព្រែកចាក មិនទាន់បានមួយខែផង ស្រាប់តែលោក យី ថុល ប្រើតួនាទី និងអំណាចប្រមូលលុយតាមរបៀបពុករលួយ ដោយគ្មានញញើតអ្វីទាំងអស់។
ប្រភពបានឲ្យដឹងទៀតថា គ្រាន់តែមកកាន់តំណែងជាប្រធានការិយាល័យគយ និងរដ្ឋាករច្រកទ្វារអន្តរជាតិព្រែកចាកភ្លាម គឺលោក យី ថុល បានចាត់តាំងមន្ត្រីក្រោមឱវាទរបស់ខ្លួនឲ្យគាបយកលុយពីក្រុមឈ្មួញនាំចូលនាំចេញទំនិញតាមច្រកព្រែកចាក យ៉ាងគឃ្លើន។ ប្រភពខ្លះបានឲ្យដឹងថា ការដែលលោក យី ថុល ហ៊ានធ្វើអ្វីៗតាមអំពើចិត្ត គឺដោយសារមានការសម្របសម្រួលពីសំណាក់លោក ហេង សំបូរ ដែលជាមេគយខេត្តកំពត ផងដែរ។
មន្ត្រីគយ និងភ្នាក់ងារគយក្នុងខេត្តកំពត មួយចំនួនបានឲ្យដឹងថា លោក យី ថុល ល្បីល្បាញតាំងពីនៅធ្វើជាមេគយច្រក៤០០ ក្នុងស្រុកសំឡូត ខេត្តបាត់ដំបង ហើយនៅពេលប្ដូរមកធ្វើជាប្រធានការិយាល័យគយច្រកទ្វារអន្តរជាតិព្រែកចាក ជំនួសលោក ញ៉ែម សេង គឺលោក យី ថុល ប្រព្រឹត្តអំពើពុករលួយកាន់តែខ្លាំងថែមទៀត។
ប្រភពពីមន្ត្រីគយនៅខេត្តកំពត បានឲ្យដឹងថា បច្ចុប្បន្នឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់តាមច្រកទ្វារអន្តរជាតិព្រែកចាក គឺបង់ពន្ធត្រឹមតែ៣០ភាគរយទៅ៤០ភាគរយប៉ុណ្ណោះ ក្រៅពីនេះ គឺលោក យី ថុល ឃុបឃិតបែងចែកផលប្រយោជន៍លើតុក្រោមតុជាមួយឈ្មួញយ៉ាងសុខស្រួល។
បញ្ហានេះគឺជារឿងដែលលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ គួរពិនិត្យមើលឡើងវិញជាបន្ទាន់ ព្រោះគ្រាន់តែមកកាន់តំណែងជាប្រធានការិយាល័យគយច្រកទ្វារអន្តរជាតិព្រែកចាក មិនទាន់មួយខែស្រួលបួលផង បែរជាលោក យី ថុល និងបក្ខពួកឃុបឃិតគ្នាប្រព្រឹត្តអំពើពុករលួយតាមច្រើនរូបភាព។
ទោះបីយ៉ាងណាអង្គភាពសារព័ត៌មាន CAM POST មិនទាន់ទទួលបានការបកស្រាយពីលោក យី ថុល ប្រធានការិយាល័យគយច្រកព្រែកចាក ថាពិតដូចការចោទខាងលើនេះទេ ហើយអង្គភាពយើងរង់ចាំការឆ្លើយបំភ្លឺពីលោកជានិច្ច៕
ផ្ដល់សិទ្ធិដោយ៖ campost.news