ភ្នំពេញៈ មានហេតុការណ៍ដ៏ភ្ញាក់ផ្អើលមួយស្រដៀងទៅនឹងករណីជះស្រាលើកញ្ញា ទេព បូព្រឹក្ស កន្លងទៅដែរ តែករណីនេះ ឈានដល់ការប្រើហិង្សា ខណៈបុរសម្នាក់ អះអាងថា ខ្លួនជាមន្រ្តីយោធាផ្កាយ៣ ទះកំផ្លៀងនារីជាអ្នកចំរៀងក្នុងភោជនីយដ្ឋាន "បឹងមាស“ ចំនួន២កំផ្លៀង ព្រោះខឹងបបួលនាងទៅគេងជាមួយ តែនាងបដិសេធ បង្កឲ្យមានការភ្ញាក់ផ្អើលពេញក្នុងភោជនីយដ្ឋាន “ បឹងមាស “ ដែលស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ កាលពីវេលាម៉ោង១១យប់ ថ្ងៃទី២៧ ខែកុម្ភៈ ឆ្នាំ២០១៩។
នារីរងគ្រោះ អាយុ៣៥ឆ្នាំ មុខរបរអ្នកចម្រៀង ស្នាក់នៅសង្កាត់ព្រែកលាភ ខណ្ឌជ្រោយចង្វារ។ ចំណែកបុរសដៃដល់ ត្រូវបានគេស្គាល់ថា ជាមន្រ្តីយោធា ពាក់ផ្កាយ៣ ជិះរថយន្ត Mazda ពាក់ស្លាកលេខ ខេមរភូមិន្ទ០២ 2-1215 ។ បន្ទាប់ពីបានទះកំផ្លៀងនារីរងគ្រោះរួច ជនដៃដល់បានឡើងជិះរថយន្តចេញពីហាងយ៉ាងព្រងើយ គ្មានខ្វល់ពីទង្វើ ដែលមិនគប្បីរបស់ខ្លួនឡើយ។
ក្រោយពីឃើញទង្វើអាក្រក់បែបនេះ ទើបនារីរងគ្រោះកើតទុក្ខមិនសុខចិត្ត បានទៅដាក់ពាក្យបណ្តឹងនៅប៉ុស្តិ៍នគរបាលជ្រោយចង្វារ ដើម្បីរង់ចាំចំណាត់ការរបស់សមត្ថកិច្ចជួយដោះស្រាយតាមនីតិវិធីច្បាប់។
គួររំលឹកផងដែរថា កំពូលតារាចម្រៀងស្រីដ៏ល្បីឈ្មោះប្រចាំផលិតកម្មរស្មីហង្សមាស កញ្ញា ទេព បូព្រឹក្ស ត្រូវបានបុរសម្នាក់ ក្នុងហាងលក់គ្រឿងសមុទ្រមួយកន្លែង គប់កំប៉ុងស្រាបៀរទៅលើរូបនាង ខណៈនាងកំពុងតែច្រៀងនៅលើឆាក បង្កការភ្ញាក់ផ្អើលយ៉ាងខ្លាំងកាលពីវេលាម៉ោង១០៖០៥នាទីយប់ ថ្ងៃអង្គារ ទី២៥ ខែធ្នូ ឆ្នាំ២០១៨ នៅក្នុងភោជនីយដ្ឋានមួយយីហោ សមុទ្រ ជិតមន្ទីរពេទ្យកុមារជាតិ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។
ទើបធ្វើអោយកញ្ញា ទេព បូព្រឹក្ស កើតទុក្ខមិនសុខចិត្ត ធ្វើការ Live វីដេអូចេញពីគណនេយ្យផេកហ្វេសប៊ុករបស់កញ្ញា ដើម្បីដង្ហើយរកក្រុមអ្នកសារព័ត៌មានអោយចុះទៅជួយផ្សាយរកយុត្តិធម៌ជូននាងផង រហូតមហាជនពេញហ្វេសប៊ុក Likes និង Shares ចែកចាយ Video បន្តបន្ទាប់គ្នា បង្កមានការភ្ញាក់ផ្អើលយ៉ាងខ្លាំង ដោយសារតែកញ្ញាស្រែកយំខ្លាំងៗតាមរយៈ Live Video នោះ ព្រោះតែកញ្ញាមកចម្រៀងតាមការអញ្ជើញរបស់ភោជនីយដ្ឋានខាងលើ ដែលជា Events របស់ក្រុមហ៊ុនស្រាបៀរហៃ Hite របស់ប្រទេសកូរ៉េនោះ។
ក្នុងវិដេអូ Live នោះដែរ គេលឺសំលេងម្ចាស់ហាងបានព្យាយាមនិយាយទៅកាន់កញ្ញា ទេព បូព្រឹក្ស ដើម្បីសុំសម្រួលបានអត់? តែកញ្ញាតបវិញថា រឿងគេយកកំប៉ុងស្របៀរគប់មកនាងខ្ញុំប៉ុណ្ណឹងហើយ សម្រួលយ៉ាងម៉េច? ដោយកញ្ញា បូព្រឹក្ស មិនព្រមសម្រួល ព្រោះកំពុងតែស្រែកច្រៀងសុខៗ ស្រាប់តែមានគេយកកំប៉ុងស្រាបៀរគប់លើកញ្ញា ធ្វើឲ្យកញ្ញាខ្មាសគេ និងខឹងសម្បារយ៉ាងខ្លាំង ដោយសារតែទង្វើមើលងាយ និងមិនឲ្យតម្លៃមកលើកញ្ញា។
រហូតក្រោយមក កញ្ញា ទេព បូព្រឹក្ស បានមកដាក់ពាក្យប្តឹងនៅប៉ុស្តិ៍ទឹកល្អក់១ ទារសំណងទឹកប្រាក់ ចំនួន១០ម៉ឺនដុល្លារ ពីបុរសជនបង្ក រួមទាំងថៅកែហាង នឹងក្រុមហ៊ុនស្រាបៀរ(hite) ដែលបាននាំនាងមកច្រៀង ដែលមិនបានគិតពីសុវត្ថិភាពរបស់នាង បណ្តោយឲ្យជនសង្ស័យជះស្រាមកលើនាង។ តាមការបញ្ជាក់របស់ បូព្រឹក្ស ផ្ទាល់ថា គឺទាមទារសំណងជំងឺចិត្តចំនួន១០ម៉ឺនដុល្លារនេះ នាងនឹងយកទៅឧបត្តម្ភកុមារកំព្រា និងមនុស្សធម៌។
តែទីបំផុត បុរសដែលជាជនបង្ក ជះស្រាបៀរលើកញ្ញា ទេព បូព្រឹក្សនោះ នៅរសៀលថ្ងៃទី២៨ ខែធ្នូ ឆ្នាំ២០១៨នេះ បានចេញមុខសុំទោសជាសាធារណៈ តាមការចង់បានរបស់កញ្ញា ទេព បូព្រឹក្ស ដែលជាជនរងគ្រោះ ខណៈដែលសំណងរដ្ឋប្បវេណីខូចខាតកិត្តិយស បញ្ចុះត្រឹម១ម៉ឺនដុល្លារ ។ ហើយ ទេព បូព្រឹក្ស បានធ្វើសន្និសីទសារព័ត៌មាន ប្រាប់អោយដឹងថា លុយ១ម៉ឺនដុល្លារនេះ នឹងត្រូវបែងចែកជាពីរផ្នែក ទី១ ចំនួន ៣.០០០ដុល្លារ នឹងបរិច្ចាគទៅមន្ទីរពេទ្យគន្ធបុប្ផា និងចំនួន ៧.០០០ដុល្លារទៀត នឹងយកទៅជួយសង្គម និងកុមារកំព្រារជាដើម។
ពាក់ព័ន្ធនឹងអ្នកចម្រៀងតាមភោជនីយដ្ឋានវិញ នារីរងគ្រោះក៏ជាអ្នកចម្រៀងដែរ តែត្រូវបានបុរសម្នាក់ ដែលអះអាងខ្លួនឯងពាក់ផ្កាយ៣នោះ បានប្រើហិង្សាលើនាង ដោយទះកំផ្លៀងមួយទំហឹងដៃ បន្ទាប់ពីខឹងបបួលនាងទៅគេងជាមួយ តែនាងបដិសេធថា នាងលក់តែសំឡេងប៉ុណ្ណោះ នាងមិនលក់ខ្លួនទេ បន្ទាប់ពីបានទះកំផ្លៀងនារីរងគ្រោះរួច បុរសជើងខ្លាំងរូបនោះ ប្រញាប់ប្រញាល់ដើរចេញពីហាង រួចបើករថយន្ត Mazda ពាក់ស្លាកលេខខេមរភូមិន្ទ ០២ 2-1215 ចេញពីហាងយ៉ាងព្រងើយ គ្មានខ្វល់ពីទង្វើ ដែលមិនគប្បីរបស់ខ្លួនឡើយ។
រឿងនេះ សង្ឃឹមថា ច្បាប់នឹងមិនបណ្ដោយអោយមនុស្សអាងស័ក្តិ អាងអំណាចបែបនេះ ដើរបង្កបញ្ហាដាក់អ្នកទៃ ជាពិសេសស្ត្រីអ្នកចម្រៀងតាមភោជនីយដ្ឋាន ដែលលោកបានទះកំផ្លៀងនាង ព្រោះតែនាងបដិសេធ មិនព្រមទៅគេងជាមួយនោះ ដែលនេះបង្ហាញពីការមិនអោយតម្លៃស្ត្រី និងមាក់ងាយស្ត្រីថែមទៀតផង យើងខ្ញុំទាំងអស់គ្នាជាក្រុមអ្នកសារព័ត៌មានពេលយប់ទាំងអស់ សូមគោរពស្នើសុំឲ្យសមត្ថកិច្ចមេត្តាជួយរកយុត្តិធម៌ដល់ស្ត្រីអ្នកចម្រៀងក្នុងភោជនីយដ្ឋានខាងលើនេះផង និងស្នើឲ្យជនបង្កហេតុចូលខ្លួនដោះស្រាយឲ្យឆាប់បំផុត និងតាមសន្តិវិធី៕