កំពង់ស្ពឺៈ រឿងដ៏ហួសចិត្ត ទោះខំប្រកែកក៏គ្មានន័យ ពាក្យចាស់ពោលថា “ស្រីប្រកាន់ ប្រុសប្រកែក” ទោះត្រូវរ៉ូវគ្នាក៏ដោយ ក៏ខាងប្រុសនៅតែខុស ជាក់ស្ដែង គូស្នេហ៍វ័យចំណាស់១គូ ត្រូវរ៉ូវនាំគ្នាចូលផ្ទះសំណាក់ក្រេបទឹកឃ្មុំបានសម្រេច ត្រូវម្តាយខាងស្រី បានប្តឹងពីបទរំលោភសេពសន្ថវៈ ត្រូវនគរបាលជំនាញឃាត់ខ្លួន។
ហេតុការណ៍ដ៏គួរឲ្យភ្ញាក់ផ្អើលនេះ បានកើតឡើងកាលពីរសៀលថ្ងៃសុក្រ ទី១៥ ខែកុម្ភៈ ឆ្នាំ២០១៩នេះ នៅចំណុចភូមិទី៤ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។
ជនសង្ស័យឈ្មោះ ង៉ែត ស៊ីថុង អាយុ៧០ឆ្នាំ រស់នៅភូមិទី៤ ឃុំត្រែងត្រយឹង។ ស្ត្រីរងគ្រោះ អាយុ៤៤ឆ្នាំ រស់នៅភូមិឃុំជាមួយគ្នា។
ប្រភពព័ត៌មានពីបានអោយដឹងថា មុនពេលកើតហេតុ ជនសង្ស័យ និងស្ត្រីរងគ្រោះ បានត្រូវរ៉ូវគ្នា រួចក៏នាំគ្នាទៅផ្ទះសំណាក់មួយ ដើម្បីរួមមេត្រីជាមួយគ្នាយ៉ាងល្អូកល្អឺន លុះចេញពីផ្ទះសំណាក់វិញ មកដល់ផ្ទះ ក៏ត្រូវកម្លាំងជំនាញឃាត់ខ្លួន យោងតាមបណ្តឹងរបស់ម្តាយខាងស្រី រួចបញ្ជូនមកកាន់អធិការដ្ឋាននគរបាលស្រុកភ្នំស្រួច ដើម្បីសាកសួរនិងកសាងសំណុំរឿងចាត់ការតាមនីតិវិធីច្បាប់៕