ភ្នំពេញៈ បុរសខ្លាំងម្នាក់ ចេញពីផឹកស៊ីស្រវឹង ធ្លាក់ភ្នែកបើករថយន្ត 4Runner ទៅបុកបបង្គោលភ្លើងបំភ្លឺផ្លូវ ដែលជាទ្រព្យសម្បត្តិរដ្ឋ រួចបើករត់ តែសមត្ថកិច្ចឃើញក៏មកសួរនាំ បែរជាបុរសខ្លាំងរូបនោះ មកសំឡុតសមត្ថកិច្ច ដោយប្រើសម្ដីអសីលធម៌ ហើយហៅក្រុមគ្រួសារយករថយន្តមួយគ្រឿងទៀត យកខ្សែពួរមកចងសណ្ដោងអូសយកទៅផ្ទះ ទើបសមត្ថកិច្ចធ្វើការអន្តរាគមន៍ ស្ទាក់ឃាត់បាន ផ្អើលដល់ក្រុមអ្នកយកព័ត៌មានចុះទៅផ្ដិតយកទិដ្ឋភាពផ្សាយផ្ទាល់ បែរជាមានបក្ខពួកចេញមកកាង រារាំងមិនអោយថត ដេញវាយក្រុមអ្នកសារព័ត៌មាន នាំគ្នារត់ចែកជើងគ្នាព្រាតទាំងកណ្ដាលយប់។
គ្រោះថ្នាក់ចរាចរណ៍ឈានដល់កើតមានហិង្សានេះ បានកើតឡើងកាលពីវេលាម៉ោង១២:៤០នាទីរំលងអធ្រាត្រឈានចូលថ្ងៃសៅរ៍ ទី១៦ ខែកុម្ភៈ ឆ្នាំ២០១៩នេះ ត្រង់ចំណុចម្ដុំផ្សារបឹងតាម៉ាត តាមបណ្ដោយផ្លូវបេតុង ស្ថិតក្នុងសង្កាត់ដង្កោ ខណ្ឌដង្កោ រាជធានីភ្នំពេញ។
តាមប្រភព័ត៌មានពីកន្លែងកើតហេតុ បានឲ្យដឹងថា មុនកើតហេតុ គេឃើញបុរសម្នាក់ បើករថយន្តមួយគ្រឿង ម៉ាក 4Runner ពណ៌ខ្មៅ ពាក់ស្លាកលេខភ្នំពេញ 2L-4338 ធ្វើដំណើរតាមបណ្តោយផ្លូវ២១៧ ទិសដៅពីត្បូងទៅជើង លុះមកដល់ចំណុចផ្លូវបេតុងបត់ចូលផ្ទះ ស្រាប់តែជ្រុលទៅបុកបង្គោលភ្លើងថ្មមួយដើមពេញទំហឹង បណ្ដាលឲ្យបង្គោលភ្លើងបាក់បែកខូចខាតបន្តិចបន្តួច តែរថយន្តរងការខូចខាតខ្ទេចមួយកំណាត់មុខ បើកទៅមុខលែងរួច ស្របពេលដែលនៅកន្លែងកើតហេតុ មានសភាពស្ងាត់ផង បុរសខ្លាំង ដែលជាអ្នកបើកបរ បានទូរស័ព្ទហៅបុរសជើងខ្លាំងម្នាក់ទៀត បើករថយន្តមួយគ្រឿងមកកន្លែងកើតហេតុ រួចយកខ្សែពួរមកចងដើម្បីសណ្ដោងអូសយកទៅផ្ទះ។
សាក្សីបន្តថា លុះពេលអូសយករថយន្តចេញពីកន្លែងកើតហេតុបានប្រហែល២០០ម៉ែត្រ មកដល់ផ្លូវបេតុង ខាងក្រោយវត្តចំការដូង រួចបម្រុងយករថយន្តទៅទុកនៅមុខផ្ទះ ស្រាប់តែកម្លាំងសមត្ថកិច្ចប៉ុស្តិ៍ដង្កោ ដែលល្បាតពួនស្ទាក់ ទប់ស្កាត់បទល្មើសក្នុងមូលដ្ឋាន បានមកដល់ឃើញ ហើយក៏ចុះមកសួរនាំ ស្រាប់តែបុរសម្ចាស់រថយន្តបង្កនោះ ទំនងជាមន្ត្រីរាជការជាន់ខ្ពស់ហើយ បានជាមានអំណាចបែបនេះ សូម្បីតែប៉ូលិសប៉ុស្តិ៍ក្នុងមូលដ្ឋានមិនហ៊ានជាមួយដែរ ឬមកពីឃើញមានកាំភ្លើងសៀតនៅជាប់ចង្កេះទៀត? ហើយបុរសជើងខ្លាំង រួមទាំងបក្ខពួកនាំគ្នាឆ្លើយតប ដោយស្រែកសំឡុតសមត្ថកិច្ច ទាំងទទឹងទទែង និងប្រើសម្ដីអសីលធម៌ ប្រមាថមាក់ងាយ សមត្ថកិច្ចរូបនោះថែមទៀតផង។
ចំណែកឯសមត្ថកិច្ចល្បាតនោះ បានរាយការណ៍សុំកម្លាំងបន្ថែមឲ្យជួយអន្តរាគមន៍ផង ព្រោះភាគីសែស្រឡាយបុរសម្ចាស់រថយន្តបង្ក បាននាំគ្នាប្រកែកឆោឡោទទឹងទែង ដោយប្រើសម្ដីមិនសមរម្យមាក់ងាយសមត្ថកិច្ចខ្លាំងណាស់ ។
សាក្សីខាងលើបន្តទៀតថា មួយសន្ទុះក្រោយមក គេឃើញមានកម្លាំងសមត្ថកិច្ចចុះមកកន្លែងកើតហេតុ និងឃើញក្រុមអ្នកសារព័ត៌មានពេលរាត្រីជាច្រើននាក់ បានមកដល់កន្លែងកើតហេតុបន្តបន្ទាប់គ្នា ដោយអ្នកខ្លះថតផ្តិតយករូបភាព អ្នកខ្លះធ្វើការផ្សាយផ្ទាល់ (Live) ហើយខណៈពេលដើរមកសួរនាំហេតុការណ៍នោះ មូលហេតុអ្វី នៅចំណុចណាដែរ ហើយមិនទាន់បានសួរចប់ផង ស្រាប់តែបុរសជើងខ្លាំងម្នាក់ ដែលជាអ្នកបើករថយន្តបង្ក និងបុរសម្នាក់ទៀត រួមទាំងបងប្អូនប្រុសស្រីសែស្រឡាយម្ចាស់រថយន្តបង្ក បានចេញមករារាំងមិនអោយថតផ្សាយ ហើយថែមទាំងជេរស្ដីប្រមាថមាក់ងាយ ដោយសម្ដីអសីលធម៌ ស្រែកសំឡុតខ្លាំងៗ និងចង្អុលមុខក្រុមអ្នកសារព័ត៌មានខាងលើនោះ ហើយចង់ស្ទុះទៅវាយ ទើបអ្នកសារព័ត៌មានខ្លះទៀត បានចូលមកជួយឃាត់ផងដែរ។
ក្រោយមកទៀត ក្រុមអ្នកយកព័ត៌មានដទៃទៀត បានមកដល់យឺតជាងគេបន្តិច ទើបធ្វើការផ្សាយផ្ទាល់ រួចក៏ចូលទៅសួរនាំជាមួយគ្នា ទើបធ្វើអោយក្រុមភាគីម្ចាស់រថយន្តបង្កហេតុនោះ មានការខឹងសម្បារ ស្ទុះចេញមក លោតវាយអ្នកសារព័ត៌មានផ្អើលពេញមុខផ្ទះកើតហេតុ តែអ្វីដែលហួសចិត្តយ៉ាងខ្លាំងនោះ គឺអំឡុងពេលដែលក្រុមសាច់ញាតិសែស្រឡាយម្ចាស់រថយន្តបង្ក រត់ដេញវាយក្រុមអ្នកសារព័ត៌មាននោះ សមត្ថកិច្ចបានត្រឹមឈរមើល មិនជួយអន្តរាគមន៍ ឬជួយឃាត់នោះទេ ទើបកើតមានការប្រើហិង្សាកើតឡើង រហូតដល់ថ្នាក់វាយអ្នកសារព័ត៌មាន ត្រូវជាច្រើនដៃ និងលោតធាក់អ្នកសារព័ត៌មានមួយជើងទៀត ស្ទើរដាច់ផ្ងារហើយ នៅតែសមត្ថកិច្ចមិនជួយឃាត់ទៀត ។
ក្រោយកើតហេតុសមត្ថកិច្ចមូលដ្ឋាន និងជំនាញបានរថយន្តបង្កទៅរក្សាទុកនៅអធិការដ្ឋាននគរបាលខណ្ឌដង្កោ រង់ចាំដោះស្រាយគ្នានៅពេលក្រោយ។
បន្ទាប់ក្រុមអ្នកសារព័ត៌មានពេលយប់បានធ្វើការបញ្ចប់ទំនាស់នោះនៅកន្លែងកើតហេតុ ដោយមិនឲ្យមានរឿងវែងឆ្ងាយ តែយ៉ាងណាមិញ អ្នកយកព័ត៌មានមួយរូប ដែលត្រូវបានបុរសខ្លាំងនោះលោតវាយ២ដៃនោះ និងដាក់ពាក្យបណ្ដឹងតាមច្បាប់ឬយ៉ាងណា សូមរង់ចាំព័ត៌មានពិស្ដារបន្តទៀត៕